Read Maltese Bible with DC – IL-BIBBJA IL-KOTBA MQADDSA APOKALISSI 16 Bible Online

APOKALISSI 16 - Maltese Bible with DC – IL-BIBBJA IL-KOTBA MQADDSA bible

APOKALISSI 16

¹U smajt leħen qawwi ġej mit-Tempju u jgħid lis-seba’ anġli: “Morru, ferrgħu s-seba’ bwieqi tal-korla ta’ Alla fuq l-art.”

²U l-ewwel wieħed mar u ferragħ il-bieqja tiegħu fuq l-art. U ġerħa kerha u ta’ wġigħ kbir ġiet fuq il-bnedmin li kellhom fuqhom il-marka tal-Bhima u fuq dawk li nxteħtu jqimu x-xbieha tagħha.

³U t-tieni wieħed ferragħ il-bieqja tiegħu fuq il-baħar. U dan sar qisu d-demm ta’ wieħed mejjet, u nqerdet kull ħliqa ħajja li kien hemm fil-baħar.

⁴Imbagħad it-tielet wieħed ferragħ il-bieqja tiegħu fuq ix-xmajjar u l-għejun tal-ilmijiet. U dawn saru demm.

⁵U smajt l-anġlu tal-ilmijiet jgħid: “Ġust int, int li hu u li kien, Qaddis int, għax għamilt ħaqq minn dawn;

⁶għax huma xerrdu demm il-qaddisin u l-profeti, u lilhom tajthom demm x’jixorbu: hekk ħaqqhom.”

⁷U smajt l-artal jgħid: “Iva, Mulej, Alla li tista’ kollox, veri u ġusti huma l-ġudizzji tiegħek.”

⁸U r-raba’ wieħed ferragħ il-bieqja tiegħu fuq ix-xemx. U ngħata lilha li taħraq il-bnedmin bin-nar;

⁹u l-bnedmin inħarqu bi ħruq kbir, u bdew jidgħu bl-isem ta’ Alla li għandu s-setgħa fuq dawn il-kastigi, u ma nidmux biex jagħtuh glorja.

¹⁰Imbagħad il-ħames wieħed ferragħ il-bieqja tiegħu fuq it-tron tal-Bhima. U s-saltna tagħha ddallmet, u n-nies bl-uġigħ bdew igiddmu lsienhom bi snienhom,

¹¹u jidgħu b’Alla tas-sema minħabba l-uġigħat u l-ġerħat tagħhom, u ma ġithomx indiema mill-għemejjel tagħhom.

¹²U s-sitt wieħed ferragħ il-bieqja tiegħu fuq ix-xmara l-kbira tal-Ewfrat[62]. U l-ilma tagħha nixef, hekk li nfetħet triq għas-slaten tal-Lvant.

¹³Imbagħad minn fomm id-Dragun, minn fomm il-Bhima u minn fomm il-Profeta Qarrieq rajt ħerġin tliet spirti mniġġsin qishom żrinġijiet:

¹⁴għax dawn huma spirti ta’ demonji li jagħmlu sinjali li joħorġu għal għand is-slaten tad-dinja kollha ħalli jiġbruhom għall-gwerra ta’ nhar il-Jum il-kbir ta’ Alla li jista’ kollox.

¹⁵(Arani ġej bħal ħalliel! Hieni min jishar u jieħu ħsieb l-ilbiesi tiegħu biex ma jimxix għarwien u jarawlu l-għera tiegħu.)

¹⁶Imbagħad jiġbruhom fil-post li bil-Lhudi jsejħulu Ħarmagedon[63].

¹⁷U s-seba’ wieħed ferragħ il-bieqja tiegħu fl-ajru. U mit-Tempju, min-naħa tat-tron, ħareġ leħen qawwi jgħid: “Seħħ!”

¹⁸U beda jleħħ il-beraq, bi ħsejjes u tkarwit ta’ ragħad, u sar terremot hekk kbir li bħalu qatt ma sar kemm ilu l-bniedem fuq l-art, theżżiż bħal dak hekk kbir!

¹⁹U l-Belt il-Kbira nqasmet fi tlieta, u l-bliet tal-ġnus iġġarrfu, u Babilonja l-Kbira ftakar fiha Alla biex jagħtiha t-tazza bl-inbid ibaqbaq tal-qilla tiegħu.

²⁰U ħarbet kull gżira, u l-muntanji ma nstabux iżjed.

²¹U silġ oħxon, kull waħda tqila daqs talent, niżel mis-sema fuq il-bnedmin, u l-bnedmin ħaduha kontra Alla minħabba fil-kastig tas-silġ għax kbir wisq hu dan il-kastig.