Read Maltese Bible with DC – IL-BIBBJA IL-KOTBA MQADDSA APOKALISSI 17 Bible Online

APOKALISSI 17 - Maltese Bible with DC – IL-BIBBJA IL-KOTBA MQADDSA bible

APOKALISSI 17

¹Imbagħad ġie wieħed mis-seba’ anġli li kellhom is-seba’ bwieqi, kellimni u qalli: “Ejja ħa nurik il-ħaqq isir miż-Żienja l-Kbira[64] li hi bilqiegħda fuq ħafna ilmijiet;

²kien magħha li waqgħu fiż-żina s-slaten tal-art, u bl-inbid taż-żina tagħha[65] sikru dawk li jgħammru fuq l-art.”

³U bil-qawwa tal-Ispirtu ħadni fid-deżert, u rajt Mara riekba fuq Bhima ta’ lewn aħmar dagħmieni, mimlija b’ismijiet midgħajja, li kellha sebat irjus u għaxart iqrun.

⁴U l-Mara kellha fuqha lbies tal-porpra u ta’ lewn aħmar skarlatt[66], b’tagħmira deheb fuqha u ħaġar prezzjuż u ġawhar, u b’tazza tad-deheb f’idha, mimlija bil-qżiżijiet u l-ħmiġijiet taż-żina tagħha.

⁵Fuq ġbinha kellha miktub isem misterjuż: “Babilonja l-Kbira, omm in-nisa żienja u l-qżiżijiet tal-art.”

⁶U rajt il-Mara fis-sakra bid-demm tal-qaddisin u bid-demm tal-martri[67] ta’ Ġesù. Jien tnixxift inħares lejn dan l-għaġeb kbir.

⁷U qalli l-anġlu: “Għaliex tistagħġeb? Se ngħidlek jien x’inhu l-misteru tal-Mara u tal-Bhima b’sebat irjus u għaxart iqrun li qiegħda żżommha fuqha.”

⁸“Il-Bhima li int rajt, kienet, imma m’għadhiex iżjed; issa se titla’ mill-bir bla qiegħ biex tmur għall-qerda tagħha. U dawk li jgħammru fuq l-art, li sa mit-twaqqif tad-dinja isimhom mhuwiex imniżżel fil-ktieb tal-ħajja, jistagħġbu huma u jaraw il-Bhima, li kienet u li m’għadhiex iżjed u li għad terġa’ tidher.

⁹Hawn jenħtieġ moħħ li jkollu l-għerf! Is-sebat irjus huma s-seba’ muntanji[68] li fuqhom hi bilqiegħda l-Mara. U huma wkoll is-seba’ slaten.

¹⁰Ħamsa minnhom waqgħu, wieħed għadu hawn, u ieħor għadu ma ġiex, u, meta jiġi, ikollu jdum ftit.

¹¹U l-Bhima, li kienet u ma għadhiex iżjed, hi stess hija t-tmien waħda, imma wkoll waħda mis-sebgħa, u sejra għall-qerda tagħha.

¹²U l-għaxart iqrun li rajt huma għaxar slaten; huma għadhom ma ħadux is-saltna, iżda għad jieħdu s-setgħa ta’ slaten għal siegħa waħda biss flimkien mal-Bhima.

¹³Dawn fehma waħda għandhom, li jagħtu l-qawwa u s-setgħa tagħhom lill-Bhima.

¹⁴Għad jagħmlu gwerra lill-Ħaruf, u l-Ħaruf joħroġ rebbieħ fuqhom, għax hu Sid is-sidien u Sultan is-slaten, flimkien ma’ dawk li huma miegħu msejħin u magħżulin u fidili.”

¹⁵U ssokta jgħidli: “L-ilmijiet li rajt, fejn hemm bilqiegħda ż-Żienja, huma popli u folol ta’ nies u ġnus u ilsna.

¹⁶U l-għaxart iqrun u l-Bhima li rajt, dawn ikollhom mibegħda għall-Mara żienja, jagħmluha bħal deżert u jneżżgħuha, u jiklulha laħamha u jaħarquha bin-nar.

¹⁷Għax Alla webbilhom biex jagħmlu l-fehma tiegħu, ħalli huma wkoll fehma waħda jkollhom, li jagħtu s-saltna tagħhom lill-Bhima, sa ma l-kliem ta’ Alla jkun seħħ.

¹⁸U l-Mara li rajt hija l-Belt il-Kbira, li għandha s-saltna fuq is-slaten tal-art[69].”