Read Maltese Bible with DC – IL-BIBBJA IL-KOTBA MQADDSA APOKALISSI 18 Bible Online

APOKALISSI 18 - Maltese Bible with DC – IL-BIBBJA IL-KOTBA MQADDSA bible

APOKALISSI 18

¹Wara dan rajt anġlu ieħor nieżel mis-sema b’setgħa kbira, u l-art imtliet bid-dawl tal-glorja tiegħu.

²U għajjat b’leħen qawwi u qal: “Iġġarrfet, iġġarrfet Babilonja l-Kbira, u saret għamara tad-demonji, saret ħabs tal-ispirti mniġġsin kollha, ħabs tat-tajr imniġġes u mibgħud kollu;

³għax mill-inbid ibaqbaq taż-żina tagħha xorbu l-ġnus kollha, u s-slaten tal-art waqgħu fiż-żina magħha, u l-merkanti tal-art stagħnew bil-ħala bla rażan tagħha.”

⁴Imbagħad smajt leħen ieħor mis-sema jgħid: “Oħorġu minnha, poplu tiegħi, biex ma jkollkomx x’taqsmu magħha fi dnubietha, u biex mill-kastigi tagħha ma tiħdux sehem.

⁵Għax dnubietha saru munzell għoli sas-sema, u Alla ftakar fl-għemejjel ħżiena tagħha.

⁶Roddulha skont ma hi stess radditilkom, ħallsuha d-doppju għal li għamlitilkom, ħawrulha d-doppju fit-tazza li ħawret hi.

⁷Daqskemm issebbħet u tatha għall-ħala, daqshekk ieħor ġagħluha tbati u nikktuha, għax hija f’qalbha tgħid: ‘Jiena sultana bilqiegħda fuq it-tron, m’iniex armla, u tassew li n-niket ma nafx bih.’

⁸Għalhekk f’jum wieħed jiġuha l-kastigi tagħha: mewt u niket u ġuħ, u fin-nar għad tinħaraq, għax setgħani hu l-Mulej li jagħmel ħaqq minnha.”

⁹Imbagħad is-slaten tal-art, li kienu tawha għaż-żina u għall-ħala magħha, jibdew jibku u jagħtu fuq sidirhom minħabba fiha meta jaraw id-duħħan tal-ħuġġieġa tagħha,

¹⁰u jieqfu ’l bogħod, kollhom biża’ mit-tbatija tagħha, u jgħidu: “Jaħasra, jaħasra, il-Belt il-Kbira, Babilonja, il-belt setgħana! Kif sarlek f’siegħa waħda l-ħaqq tiegħek!”

¹¹Il-merkanti tal-art jibku u jitnikktu minħabba fiha, għax il-biegħa tagħhom ħadd iżjed ma jkun jixtriha,

¹²biegħa ta’ deheb u fidda, ħaġar prezzjuż u ġawhar, għażel fin, porpra, ħarir u drapp tal-iskarlatt, kull xorta ta’ injam ifuħ, kull xorta ta’ oġġetti tal-avorju u ta’ injam jiswa ħafna, bronż, ħadid, irħam,

¹³ħwawar tal-kannella u ħxejjex tal-balzmu, fwieħa, mirra, inċens, inbid u żejt, smid u qamħ, bhejjem u nagħaġ, żwiemel u karrijiet, ilsiera u nies għall-bejgħ.

¹⁴“U tbiegħed minnek il-frott imwaħħar li għalih kont tixxennaq, u kull tħaxxim u tlellix intilef għalik, u żgur li qatt iżjed ma jinstab!”

¹⁵Il-merkanti ta’ dawn il-ħwejjeġ, li stagħnew minn fuqha, jieqfu ’l bogħod, imbikkija u mnikkta, kollhom biża’ mit-tbatija tagħha,

¹⁶u jgħidu: “Jaħasra, jaħasra, il-Belt il-Kbira, li kienet tilbes għażel fin, u porpra u drapp tal-iskarlatt, b’tagħmir ta’ deheb fuqha, u ħaġar prezzjuż u ġawhar!

¹⁷Kif f’siegħa waħda ġie fix-xejn dan l-għana kollu.” U l-bdoti u n-nies kollha tal-baħar, il-baħrin u dawk kollha li jaħdmu fuq il-baħar, waqfu ’l bogħod,

¹⁸u bdew jgħajtu xħin raw id-duħħan tal-ħuġġieġa tagħha, u qalu: “Min kien bħall-Belt il-Kbira!”

¹⁹U xeħtu t-trab fuq rashom, u nfexxew f’biki u niket u qalu: “Jaħasra, jaħasra, il-Belt il-Kbira, li mill-kotra tal-ġid tagħha stagħna kull min għandu l-iġfna fuq il-baħar! Kif f’siegħa waħda ġiet fix-xejn!”

²⁰Ifraħ, sema, minħabba fiha, u intom ukoll, qaddisin u appostli u profeti, għax Alla tħallas minnha għalikom!

²¹Imbagħad wieħed anġlu ta’ saħħa kbira rafa’ ġebla kbira tal-mitħna, waddabha fil-baħar u qal: “Hekk b’saħħa tintrema Babilonja, il-Belt il-Kbira, u ma tinstabx iżjed.

²²U fik ma jinstemax iżjed id-daqq tal-kitarristi u l-leħen tal-għannejja; tad-daqqaqa tal-flawt u tat-trombi; ebda mgħallem ta’ ebda sengħa ma jinstab iżjed ġewwa fik; fik aktar ma tinstamax l-għanja tal-mitħna;

²³fik aktar ma jiddix id-dawl tal-musbieħ; l-għana tal-għarus u tal-għarusa fik aktar ma jinstamax. Għax il-merkanti tiegħek kienu l-kbarat tal-art, u bis-seħer tiegħek tqarrqu l-ġnus kollha.”

²⁴U fiha nstab id-demm tal-profeti u tal-qaddisin u tal-maqtulin kollha fuq l-art.