Read Maltese Bible with DC – IL-BIBBJA IL-KOTBA MQADDSA APOKALISSI 19 Bible Online

APOKALISSI 19 - Maltese Bible with DC – IL-BIBBJA IL-KOTBA MQADDSA bible

APOKALISSI 19

¹Wara dan smajt bħal leħen qawwi ta’ kotra kbira fis-sema jgħidu: “Hallelujah[70]! Is-Salvazzjoni u l-glorja u l-qawwa ta’ Alla tagħna,

²għax veri u ġusti huma l-ġudizzji tiegħu; għax għamel ħaqq miż-Żienja l-Kbira, dik li ħassret l-art biż-żina tagħha, u tħallas minnha tad-demm tal-qaddejja tiegħu.”

³U reġgħu qalu: “Hallelujah! Iva, id-duħħan tagħha tiela’ għal dejjem ta’ dejjem.”

⁴U l-erbgħa u għoxrin Xiħ u l-erba’ Ħlejjaq Ħajjin inxteħtu jagħtu qima lil Alla li qiegħed fuq it-tron, u qalu: “Ammen! Hallelujah!”

⁵U ġie leħen mit-tron jgħid: “Faħħru lil Alla tagħna, qaddejja tiegħu kollha, u intom li tibżgħu minnu, kemm żgħar u kemm kbar.”

⁶U smajt bħal leħen ta’ kotra kbira u bħal ħoss ta’ ilmijiet kotrana u bħal tkarwit ta’ ragħad qawwi, jgħidu: “Hallelujah! Għax ħa s-saltna l-Mulej, Alla tagħna li jista’ kollox.

⁷Nifirħu u nithennew u nagħtuh glorja, għax wasal it-tieġ tal-Ħaruf, u l-Għarusa tiegħu ħejjiet ruħha,

⁸u lilha ngħata li tilbes għażel fin jgħammex l-għajnejn - għax l-għażel fin ifisser l-għemejjel tajba tal-qaddisin.”

⁹Imbagħad qalli: “Ikteb: Hienja dawk li kienu mistiedna għall-mejda tat-tieġ tal-Ħaruf.” Qalli: “Dan hu kliem tassew ta’ Alla.”

¹⁰U jiena nżilt f’riġlejh quddiemu u nxtħett nagħtih qima; iżda hu qalli: “Hekk le! Jiena qaddej bħalek u bħal ħutek li għandhom ix-xhieda ta’ Ġesù. Il-qima lil Alla tagħtiha.” Għax ix-xhieda ta’ Ġesù hi l-ispirtu tal-profezija.

¹¹Imbagħad rajt is-sema miftuħ, u kien hemm żiemel abjad! Dak li kien riekeb fuqu jissejjaħ Fidil u Veru; bil-ġustizzja hu jaqta’ l-ħaqq u jagħmel il-gwerra.

¹²Għajnejh qishom ħuġġieġa nar, b’ħafna dijademi fuq rasu, u b’isem miktub fuqu li ħadd ħliefu ma jafu.

¹³Kien liebes mantell imxarrab bid-demm, u jissejjaħ bl-isem “il-Kelma ta’ Alla”.

¹⁴Mexjin warajh, fuq żwiemel bojod, kien hemm l-eżerċti tas-sema, lebsin l-għażel abjad bla nikta.

¹⁵Minn fommu ħierġa xabla misnuna, biex jolqot il-ġnus, u jmexxihom b’xettru tal-ħadid. Huwa jisħaq l-inbid ibaqbaq fil-magħsra tal-korla ta’ Alla li jista’ kollox.

¹⁶Fuq il-mantell u fuq koxxtu għandu miktub isem: “Sultan tas-slaten u Sid tas-sidien.”

¹⁷U rajt wieħed anġlu wieqaf fuq ix-xemx, u qabad jgħajjat b’leħen qawwi u jgħid lit-tjur kollha li jittajru fl-għoli tas-smewwiet: “Ejjew, inġabru flimkien għall-mejda l-kbira ta’ Alla.

¹⁸Ħalli tieklu laħam is-slaten, laħam il-kaptani, laħam is-setgħana, laħam iż-żwiemel u r-rikkieba tagħhom, il-laħam ta’ kulħadd, sew ħielsa u sew ilsiera, kemm żgħar u kemm kbar.”

¹⁹Imbagħad rajt il-Bhima u s-slaten kollha tal-art u l-eżerċti tagħhom, miġbura flimkien biex jagħmlu gwerra lil dak li kien riekeb fuq iż-żiemel u lill-eżerċtu tiegħu.

²⁰U l-Bhima nqabdet, u wkoll il-Profeta Qarrieq li quddiemha kien jagħmel is-sinjali li bihom kien qarraq b’dawk li ħadu l-marka tal-Bhima u li nxteħtu jqimu x-xbieha tagħha. U t-tnejn twaddbu ħajjin fil-belliegħa tan-nar jaqbad tal-kubrit.

²¹U l-bqija sfaw maqtula bix-xabla li kienet ħarġet minn fomm dak li kien riekeb fuq iż-żiemel, u t-tajr kollu kililhom laħamhom sa xaba’.