Read Maltese Bible with DC – IL-BIBBJA IL-KOTBA MQADDSA APOKALISSI 2 Bible Online

APOKALISSI 2 - Maltese Bible with DC – IL-BIBBJA IL-KOTBA MQADDSA bible

APOKALISSI 2

¹“Lill-anġlu tal-knisja li hemm f’Efesu iktiblu hekk: ‘Dan jgħidlek Dak li għandu s-seba’ kwiekeb f’idu l-leminija: Dak li jimxi fost is-seba’ kandelabri tad-deheb:

²Jiena naf l-opri tiegħek, u l-keded li tieħu, u s-sabar tiegħek, naf li int lill-ħżiena ma tiflaħx għalihom, u li ġa stħarriġt lil dawk li jriduha ta’ appostli bla ma huma, u sibthom qarrieqa.

³Naf li stabart u ġarrabt ħafna minħabba f’ismi, u għadek ma għejejtx.

⁴Imma kontra tiegħek għandi li inti ħallejt dik l-imħabba li kont urejt fil-bidu[10].

⁵Mela issa ġib quddiem għajnejk fiex waqajt, indem, u erġa’ aqbad l-opri tiegħek tal-bidu. Għax inkella niġik u nneħħilek il-kandelabru tiegħek minn postu, jekk ma tindimx.

⁶Iżda favur tiegħek għandek li inti tobgħod l-opri tad-dixxipli ta’ Nikola[11], bħalma nobgħodhom jiena wkoll.

⁷Min għandu widnejn, ħa jisma’ xi jgħid l-Ispirtu lill-knejjes. Lir-rebbieħ nagħtih jiekol mis-siġra tal-Ħajja li hemm fil-Ġenna ta’ Alla[12].’

⁸“U lill-anġlu tal-knisja li hemm fi Żmirna iktiblu hekk: ‘Dan jgħidlek Dak li hu l-Ewwel u l-Aħħar, li kien mejjet u raġa’ ħaj:

⁹Jiena naf it-taħbit u l-faqar tiegħek, għad li inti għani; u naf kemm jinfamawk dawk li jgħidu li huma Lhud mingħajr ma huma, meta huma sinagoga tax-Xitan.

¹⁰Tibżax minn dak li se jkollok issofri; ara, id-Demonju se jixħet ’il xi wħud minnkom fil-ħabs biex iġarrabkom, u intom tgħaddu minn għaxart ijiem ta’ taħbit[13]. Ibqa’ fidil sal-mewt, u jien nagħtik il-kuruna tal-ħajja[14].

¹¹Min għandu widnejn, ħa jisma’ x’jgħid l-Ispirtu lill-knejjes. Lir-rebbieħ ebda ħsara ma hi se tagħmillu t-tieni mewt.’

¹²“U lill-anġlu tal-knisja li hemm f’Pergamu iktiblu hekk: ‘Dan jgħidlek Dak li għandu x-xabla misnuna miż-żewġ naħat:

¹³Jiena naf fejn int qiegħed; qiegħed fejn hemm it-tron tax-Xitan. Imma għadek iżżomm sħiħ ma’ ismi u ma ċħadtx il-fidi tiegħek fija, anqas f’dawk il-jiem li fihom Antipa, ix-xhud fidil tiegħi, qatluh hemm fostkom, fejn joqgħod ix-Xitan.

¹⁴‘Madankollu għandi xi ftit ħwejjeġ kontra tiegħek, jiġifieri li hemmhekk inti għandek xi wħud li qegħdin iżommu mat-tagħlim ta’ Balgħam[15], dak li kien għallem lil Balak kif jiskandalizza lil ulied Iżrael billi jieklu ikel issagrifikat lill-idoli u jaqgħu fiż-żina[16].

¹⁵Barra minn dan, għandek ukoll min qiegħed iżomm it-tagħlim tad-dixxipli ta’ Nikola[17].

¹⁶Isa, indem; inkella niġi bla telf ta’ żmien, u naħbat għalihom bix-xabla ta’ fommi.

¹⁷‘Min għandu widnejn, ħa jisma’ x’jgħid l-Ispirtu lill-knejjes. Lir-rebbieħ nagħtih mill-manna l-moħbija[18], u nagħtih ukoll ċagħka bajda, b’isem ġdid minqux fuqha li ħadd ma jkun jafu ħlief min jirċeviha.’

¹⁸“U lill-anġlu tal-knisja li hemm f’Tjatira iktiblu hekk: ‘Dan jgħidlek l-Iben ta’ Alla, dak li għandu għajnejh bħal ġamra nar u saqajh qishom metall ileqq:

¹⁹Jiena naf l-opri tiegħek, l-imħabba u l-fidi tiegħek, is-servizz u s-sabar tiegħek, naf kemm l-opri tiegħek tal-aħħar huma aħjar minn dawk tal-bidu.

²⁰Iżda kontra tiegħek għandi li int lil Ġeżabel[19], il-mara li tridha ta’ profetissa, qiegħed tħalliha tgħallem u tqarraq bil-qaddejja tiegħi billi tħajjarhom jaqgħu fiż-żina u jieklu ikel issagrifikat lill-idoli.

²¹Jien tajtha żmien biex tindem, iżda ma riditx terġa’ lura miż-żina tagħha.

²²Ara, lilha se nixħetha marida ġo sodda, u ’l dawk li waqgħu fiż-żina magħha nibgħat fuqhom taħbit kbir jekk ma jerġgħux lura mill-għemejjel tagħha.

²³U lil uliedha[20] noqtolhomlha, ħalli jkunu jafu l-knejjes kollha li jiena hu dak li jifli l-ġewwieni u l-qalb u li jagħti lil kull wieħed minnkom skont ma ħaqqu għall-opri tiegħu.

²⁴U lilkom l-oħrajn li tinsabu f’Tjatira, intom li ma qgħadtux għal dan it-tagħlim u li ma ridtux tafu bit-tagħlim moħbi[21] fil-fond tax-Xitan, kif isejħulhom huma, lilkom ngħidilkom li fuqkom m’iniex se nixħet piż ieħor.

²⁵Biss, stabru b’dak li ġa għandkom, sa ma niġi jien.

²⁶Imbagħad lir-rebbieħ, lil dak li jħares sal-aħħar l-opri tiegħi, nagħtih setgħa fuq il-ġnus,

²⁷biex imexxihom b’xettru tal-ħadid bħal min ifarrak il-bwieqi tal-fuħħar, l-istess kif jien ukoll ħadt is-setgħa mingħand Missieri;

²⁸u nagħtih ukoll il-Kewkba ta’ filgħodu[22].

²⁹‘Min għandu widnejn, ħa jisma’ x’jgħid l-Ispirtu lill-knejjes.’