Read Maltese Bible with DC – IL-BIBBJA IL-KOTBA MQADDSA APOKALISSI 20 Bible Online

APOKALISSI 20 - Maltese Bible with DC – IL-BIBBJA IL-KOTBA MQADDSA bible

APOKALISSI 20

¹U rajt nieżel mis-sema anġlu, bil-muftieħ tal-bir bla qiegħ u katina kbira f’idu.

²U huwa qabad id-Dragun, is-Serp tal-qedem, li hu d-Demonju u x-Xitan, u rabtu għal elf sena,

³u waddbu fil-bir bla qiegħ, li mbagħad għalqu fuqu u ssiġillah biex ma jqarraqx iżjed bil-ġnus sa ma jintemmu l-elf sena. Wara dawn imbagħad ikun meħtieġ li jinħall għal ftit taż-żmien.

⁴U rajt tronijiet, u fuqhom qagħdu bilqiegħda xi wħud li lilhom ngħatat is-setgħa li jagħmlu l-ħaqq. Rajt ukoll l-erwieħ ta’ dawk li kienu qatgħulhom rashom minħabba fix-xhieda ta’ Ġesù u l-Kelma ta’ Alla, u lil dawk li ma kinux inxteħtu jagħtu qima lill-Bhima u lix-xbieha tagħha, u li ma ħadux il-marka fuq ġbinhom u fuq idhom. U dawn bdew jgħixu u jsaltnu ma’ Kristu għal elf sena.

⁵Il-bqija tal-mejtin ma reġgħux ħadu l-ħajja sa ma jkunu ntemmu l-elf sena. Dan hu l-ewwel qawmien tal-imwiet.

⁶Hieni u qaddis min għandu sehem fl-ewwel qawmien tal-imwiet; it-tieni mewt ma għandha ebda setgħa fuq dawn, imma jkunu qassisin ta’ Alla u ta’ Kristu, u jsaltnu miegħu matul l-elf sena.

⁷U meta jintemmu l-elf sena, ix-Xitan jinħall mill-ħabs tiegħu,

⁸u joħroġ iqarraq bil-ġnus li jinsabu fl-erba’ rkejjen tal-art, jiġifieri Gog u Magog[71], u jiġborhom għall-gwerra f’kotra kbira daqs ir-ramel tal-baħar.

⁹Huma telgħu fuq il-wisa’ kollu tal-art u dawru l-kamp tal-qaddisin u l-Belt l-għażiża. Imma mis-sema niżel nar u belagħhom.

¹⁰Imbagħad id-Demonju, li kien qarraq bihom, sab ruħu mwaddab fil-belliegħa ta’ nar u kubrit, fejn hemm ukoll il-Bhima u l-Profeta Qarrieq, u jibqgħu jbatu lejl u nhar għal dejjem ta’ dejjem.

¹¹Rajt imbagħad tron kbir abjad u ’l dak li hu bilqiegħda fuqu. L-art u s-sema ħarbu minn quddiemu, bla ma nstab post għalihom.

¹²U rajt il-mejtin, kbar u żgħar, quddiem it-tron. U nfetħu l-kotba. Infetaħ ukoll ktieb ieħor, dak tal-ħajja. Imbagħad il-mejtin sar ħaqq minnhom fuq l-għemejjel tagħhom, skont ma kienu mniżżla fil-kotba.

¹³Il-baħar radd lura l-mejtin li kien hemm ġo fih, u hekk ukoll il-Mewt u l-Qiegħ tal-art raddew lura l-mejtin li kien hemm ġo fihom, u kull wieħed minnhom sar ħaqq minnu fuq l-għemejjel tiegħu.

¹⁴Imbagħad il-Mewt u Post il-Mejtin ġew mixħuta fil-belliegħa tan-nar - din l-għadira tan-nar hija t-tieni mewt.

¹⁵Hekk ukoll min ma nstabx imniżżel fil-ktieb tal-ħajja, kien mixħut fil-belliegħa tan-nar.