Read Maltese Bible with DC – IL-BIBBJA IL-KOTBA MQADDSA APOKALISSI 21 Bible Online

APOKALISSI 21 - Maltese Bible with DC – IL-BIBBJA IL-KOTBA MQADDSA bible

APOKALISSI 21

¹U rajt sema ġdid u art ġdida, għax is-sema ta’ qabel u l-art ta’ qabel għabu, u ma kienx hemm iżjed baħar.

²U l-Belt il-qaddisa, Ġerusalemm il-ġdida, rajtha nieżla mis-sema mingħand Alla, imħejjija bħal għarusa mżejna għall-għarus tagħha.

³U smajt leħen qawwi ġej mit-tron jgħid: “Din hi l-għamara ta’ Alla mal-bnedmin; u hu jgħammar magħhom, u huma jkunu l-poplu tiegħu, u Alla nnifsu jkun magħhom, Alla tagħhom.

⁴Hu jixxuttalhom kull demgħa minn għajnejhom; ma jkunx hemm iżjed mewt, anqas biki jew għajjat jew tbatija ma jkun hemm iżjed, għax għabu l-ħwejjeġ ta’ qabel.”

⁵Imbagħad dak li hu bilqiegħda fuq it-tron qal: “Ara, se nġedded kollox.” Qalli: “Ikteb, għax dawn il-kelmiet huma minnhom u ta’ min joqgħod fuqhom.”

⁶U qalli mbagħad: “Seħħu! Jiena l-Alfa u l-Omega, il-Bidu u t-Tmiem. Lil min hu bil-għatx jiena nisqih b’xejn mill-għajn tal-Ħajja.

⁷Dawn jirithom ir-rebbieħ; u jiena nkun Alla tiegħu u hu jkun ibni.

⁸Imma għall-ġwejjef, għal min ma baqax fidil, għal dawk ta’ ħajja mħassra, għall-qattiela, għaż-żienja, għas-saħħara, għall-idolatri u għall-giddieba kollha, sehemhom ikun fil-belliegħa tan-nar iħeġġeġ u tal-kubrit; din hi t-tieni mewt.”

⁹Imbagħad wieħed mis-seba’ anġli, dawk tas-seba’ bwieqi bl-aħħar seba’ kastigi, ġie jkellimni u qalli: “Ejja nurik l-Għarusa, mart il-Ħaruf.”

¹⁰U ħadni fl-ispirtu fuq muntanja kbira u għolja, u wrieni l-Belt il-Qaddisa, Ġerusalemm, nieżla mis-sema mingħand Alla,

¹¹bil-glorja ta’ Alla fiha, tiddi bħal ħaġra mill-aktar prezzjuża, bħal ġaspru jleqq daqs il-kristall.

¹²Għandha ħajt kbir u għoli, bi tnax-il bieb fih, u tnax-l anġlu fil-bibien li fuqhom hemm miktuba ismijiet, l-ismijiet tat-tnax-il tribù ta’ wlied Iżrael.

¹³Tlieta minn dawn il-bibien jagħtu għan-naħa tal-Lvant, tlieta għan-naħa tat-Tramuntana, tlieta għan-naħa tan-Nofsinhar, u tlieta għan-naħa tal-Punent.

¹⁴U l-ħajt tal-Belt għandu tnax-il pedament, li fuqhom hemm it-tnax-il isem tat-tnax-il appostlu tal-Ħaruf.

¹⁵Dak li kien qiegħed ikellimni kellu qasba tal-qjies, tad-deheb, biex jieħu l-qisien tal-Belt u tal-bibien u l-ħajt tagħha,

¹⁶belt kwadra, tul u wisa’ wieħed. U ħa l-qjies tal-Belt bil-qasba, tul ta’ tnax-il elf stadju; tul u wisa’ u għoli fiha l-istess.

¹⁷U ħa wkoll il-qjies tal-ħajt tagħha, mija u erbgħa u erbgħin driegħ b’qjies ta’ bniedem, jiġifieri ta’ anġlu.

¹⁸Il-bini tal-ħajt huwa tal-ġaspru, u l-Belt deheb fin, ċar bħall-ħġieġ.

¹⁹Il-ħajt tal-Belt għandu pedamenti mogħnija b’kull xorta ta’ ħaġar prezzjuż: l-ewwel pedament ġaspru, it-tieni żaffir, it-tielet kalċedonju, ir-raba’ żmerald,

²⁰il-ħames sardoniċi, is-sitta kornalina, is-seba’ krisolitu, it-tmienja berill, id-disa’ topazju, l-għaxar krisopazju, il-ħdax ġjaċint, u t-tnax ametist.

²¹U t-tnax-il bieb huma tnax-il ġawhra, kull bieb magħmul minn ġawhra waħda. Il-pjazza tal-belt hi tad-deheb fin, tleqq qisha ħġieġa.

²²Ebda tempju ma rajt fiha, għax il-Mulej hu t-tempju tagħha, Alla li jista’ kollox, u l-Ħaruf.

²³U l-Belt ma teħtieġ la xemx u lanqas qamar biex idawluha, għax biex iddawwalha għandha l-glorja ta’ Alla, u l-musbieħ tagħha l-Ħaruf.

²⁴Il-ġnus jimxu bid-dawl tagħha, u s-slaten tal-art iġibulha l-glorja tagħhom.

²⁵Il-bibien tagħha ma jingħalqux binhar, għax lejl hemmhekk ma jkunx hemm.

²⁶U jġibu fiha l-glorja u l-ġieħ tal-ġnus.

²⁷Imma ma tidħol fiha ebda ħaġa mniġġsa, ħadd li jagħmel ħwejjeġ mistkerrha, ebda ħaġa b’oħra ma tidħol, imma biss dawk li tniżżlu fil-ktieb tal-ħajja tal-Ħaruf.