Read Maltese Bible with DC – IL-BIBBJA IL-KOTBA MQADDSA APOKALISSI 3 Bible Online

APOKALISSI 3 - Maltese Bible with DC – IL-BIBBJA IL-KOTBA MQADDSA bible

APOKALISSI 3

¹“U lill-anġlu tal-knisja li hemm f’Sardi iktiblu hekk: ‘Dan jgħidlek Dak li għandu s-seba’ spirti ta’ Alla u s-seba’ kwiekeb: Jiena naf l-opri tiegħek, inti għandek fama li inti ħaj, iżda int mejjet.

²Stenbaħ u tħeġġeġ f’dak li għad għandek imma li wasal biex jinqeridlek, għax l-opri tiegħek ma sibthomx perfetti f’għajnejn Alla tiegħi.

³Isa, ftakar f’dak li rċevejt u smajt[23], ħarsu sewwa, u indem. Għax jekk ma tistenbaħx, niġik bħal ħalliel, bla ma tkun taf is-siegħa li fiha niġik.

⁴Madankollu f’Sardi għandek ftit uħud li ma tebbgħux ilbieshom; huma għad jimxu miegħi lebsin l-abjad, għax jistħoqqilhom.

⁵Hekk ukoll ir-rebbieħ, għad ixidd fuqu lbies abjad; u jiena mhux talli ma nħassarlux ismu minn ktieb il-ħajja, imma nistqarrlu ismu quddiem Missieri u quddiem l-anġli tiegħu.

⁶Min għandu widnejn, ħa jisma’ x’jgħid l-Ispirtu lill-knejjes.’

⁷“U lill-anġlu tal-knisja li hemm f’Filadelfja iktiblu hekk: ‘Dan jgħidlek il-Qaddis, il-Veru li għandu l-muftieħ ta’ David[24], li jiftaħ u ħadd ma jagħlaq, jagħlaq u ħadd ma jiftaħ:

⁸Jiena naf l-opri tiegħek; ara, ftaħtlek quddiemek bieb li ħadd ma jista’ jagħlqu; għax għad li l-ħila tiegħek hija dgħajfa, naf li l-kelma tiegħi ħaristha u ismi ma ċħadthulix.

⁹Ara, lil xi wħud mis-sinagoga tax-Xitan - li jriduha ta’ Lhud iżda m’humiex ħlief giddieba! - ara, jiena se nġagħalhom jiġu jinxteħtu quddiemek f’riġlejk, ħa jkunu jafu li jiena lilek ħabbejtek.

¹⁰Talli int ħarist it-tagħlim tiegħi dwar is-sabar, jiena wkoll inħares lilek mis-siegħa tat-tiġrib li ġejja fuq id-dinja kollha biex iġġarrab lil kull min jgħammar fl-art.

¹¹Dalwaqt niġi; żomm sħiħ f’dak li għandek, biex ħadd ma jeħodlok il-kuruna tiegħek[25].

¹²Ir-rebbieħ nagħmlu kolonna fit-Tempju ta’ Alla tiegħi, minn fejn qatt iżjed ma joħroġ u fuqu nonqox isem Alla tiegħi, isem il-Belt ta’ Alla tiegħi, Ġerusalemm il-ġdida li nieżla mis-sema mingħand Alla tiegħi, u l-isem il-ġdid tiegħi.

¹³‘Min għandu widnejn, ħa jisma x’jgħid l-Ispirtu lill-knejjes.’

¹⁴U lill-anġlu tal-knisja li hemm f’Laodiċija iktiblu hekk: ‘Dan jgħidlek l-Ammen, ix-Xhud fidil u veru, minnu l-bidu tal-Ħolqien ta’ Alla:

¹⁵Jiena naf l-opri tiegħek, u naf li la inti kiesaħ u lanqas sħun. Mhux li kont jew kiesaħ jew sħun!

¹⁶U hekk, ladarba inti biered, u la sħun u lanqas kiesaħ, jiena sa nobżqok minn ġo ħalqi.

¹⁷Int tgħid, “Jiena għani, jiena stagħnejt u ma jonqosni xejn”, bla ma taf li l-imsejken huwa int, ta’ min jitħassrek, fqir, agħma u għeri.

¹⁸Jiena nagħtik parir biex tiġi tixtri mingħandi deheb imsoffi bin-nar, ħalli tistagħna; u lbies abjad, ħalli jkollok x’tilbes u tgħatti l-għajb tal-għera tiegħek; u wkoll ungwent, ħalli tidlek għajnejk u tkun tista’ tara.

¹⁹Lil dawk li nħobb, jiena nwiddibhom u rrażżanhom. Mela tħeġġeġ u indem.

²⁰Ara, jiena fil-bieb, u qiegħed inħabbat; jekk xi ħadd jismagħni u jiftaħli l-bieb, jiena nidħol għandu u niekol miegħu, u hu jiekol miegħi.

²¹Lir-rebbieħ nagħtih li joqgħod maġenbi fuq it-tron tiegħi; l-istess kif jien, meta rbaħt, qgħadt maġenb Missieri fuq it-tron tiegħu.

²²‘Min għandu widnejn, ħa jisma’ x’jgħid l-Ispirtu lill-knejjes.’ ”