Read Maltese Bible with DC – IL-BIBBJA IL-KOTBA MQADDSA APOKALISSI 4 Bible Online

APOKALISSI 4 - Maltese Bible with DC – IL-BIBBJA IL-KOTBA MQADDSA bible

APOKALISSI 4

¹Wara dan ħarist, u ara rajt bieb miftuħ fis-sema; u l-leħen ta’ qabel, li kont ġa smajtu jkellimni qisu tromba, qalli: “Itla’ hawn, ħa nurik x’għandu jiġri wara dan.”

²Minnufih ħassejtni merfugħ fl-Ispirtu, u rajt tron imwaqqaf fis-sema, u wieħed bilqiegħda fuq it-tron.

³U d-dehra ta’ dak li kien bilqiegħda kienet qisha dehra ta’ ħaġra tal-ġaspru u tal-kornalina, u madwar it-tron qawsalla donnha żmerald[26].

⁴Madwar it-tron, erbgħa u għoxrin siġġu, u fuqhom, bilqiegħda, erbgħa u għoxrin Xiħ, lebsin l-abjad, b’kuruna tad-deheb fuq rashom.

⁵Mit-tron rajt ħerġin beraq u ħsejjes u ragħad, u seba’ torċi mixgħula quddiemu, li huma s-seba’ spirti ta’ Alla.

⁶Quddiem it-tron rajt ukoll bħal baħar tal-ħġieġ, qisu kristall, u f’nofs it-tron u madwaru erba’ Ħlejjaq Ħajjin, kollhom għajnejn minn quddiem u minn wara;

⁷l-ewwel Ħliqa Ħajja donnha ljun, it-tieni Ħliqa Ħajja qisha għoġol, it-tielet Ħliqa Ħajja b’wiċċ ta’ bniedem, u r-raba’ Ħliqa donnha ajkla ttir.

⁸U l-erba’ Ħlejjaq Ħajjin, kull waħda minnhom b’sitt ġwienaħ, rajthom kollhom għajnejn, kemm madwarhom u kemm minn ġewwa, lejl u nhar ma jieqfu qatt itennu: “Qaddis, Qaddis, Qaddis il-Mulej, Alla li jista’ kollox, li kien, u li hu, u li ġej.”

⁹U kull darba li l-Ħlejjaq Ħajjin jagħtu glorja u ġieħ u radd il-ħajr lil dak li qiegħed fuq it-tron, u li hu għal dejjem ta’ dejjem,

¹⁰l-erbgħa u għoxrin Xiħ jinxteħtu quddiem dak li qiegħed fuq it-tron, jagħtu qima lilu li jgħix għal dejjem ta’ dejjem, iqiegħdu l-kuruni tagħhom quddiem it-tron, u jgħidu:

¹¹“Jistħoqqlok, Mulej Alla tagħna, li tilqa’ l-glorja u l-ġieħ u s-setgħa, għax int ħlaqt il-ħlejjaq kollha, u huma kienu u nħolqu bir-rieda tiegħek.”