Read Maltese Bible with DC – IL-BIBBJA IL-KOTBA MQADDSA APOKALISSI 5 Bible Online

APOKALISSI 5 - Maltese Bible with DC – IL-BIBBJA IL-KOTBA MQADDSA bible

APOKALISSI 5

¹Imbagħad lil dak li kien bilqiegħda fuq it-tron rajtlu f’idu l-leminija ktieb miktub minn ġewwa u minn barra[27], magħluq b’seba’ siġilli[28].

²U rajt anġlu, ta’ saħħa kbira, qiegħed ixandar b’leħen jgħajjat: “Min hu li jistħoqqlu jiftaħ il-ktieb u jikser is-siġilli li għandu?”

³U ħadd, la fis-sema u la fl-art u lanqas taħt l-art[29], ma kellu l-ħila jiftaħ il-ktieb u jara x’fih.

⁴U jiena nfexxejt f’bikja kbira, għax ma nstab ħadd li kien jistħoqqlu jiftaħ il-ktieb u jara x’fih.

⁵Imbagħad wieħed mix-Xjuħ qalli: “Tibki xejn; ara, l-Iljun tat-tribù ta’ Ġuda, ir-Rimja ta’ David[30], ħareġ rebbieħ, u se jiftaħ il-ktieb u s-seba’ siġilli li għandu.”

⁶Imbagħad, bejn it-tron u l-erba’ Ħlejjaq Ħajjin u f’nofs ix-Xjuħ rajt li kien hemm Ħaruf, wieqaf, bħal maqtul, b’sebat iqrun u seba’ għajnejn[31], li huma s-seba’ spirti ta’ Alla mibgħutin fuq l-art kollha.

⁷U l-Ħaruf resaq jieħu l-ktieb mill-id il-leminija ta’ dak li qiegħed fuq it-tron;

⁸u kif ħa l-ktieb, marru jinxteħtu quddiem il-Ħaruf l-erba’ Ħlejjaq Ħajjin, u wkoll l-erbgħa u għoxrin Xiħ; kull wieħed minnhom kellu ċetra u xi bwieqi tad-deheb mimlija bl-inċens, li huma t-talb tal-qaddisin.

⁹U bdew jgħannu għanja ġdida u jgħidu: “Int jistħoqqlok tieħu l-ktieb, u tiftaħ is-siġilli tiegħu, għax int kont maqtul, u b’demmek ksibt għal Alla bnedmin minn kull tribù u lsien, minn kull poplu u ġens,

¹⁰u għamilthom għal Alla tagħna Saltna u Qassisin, li għad isaltnu fuq l-art.”

¹¹Imbagħad ħarist, u minn madwar it-tron u l-Ħlejjaq Ħajjin u x-Xjuħ smajt il-leħen ta’ ħafna anġli, li l-għadd tagħhom kien għaxriet ta’ eluf, u eluf ta’ eluf,

¹²jgħidu b’leħen qawwi: “Jistħoqqlu l-Ħaruf li kien maqtul li jirċievi l-qawwa u l-għana u l-għerf u s-saħħa u l-ġieħ u l-glorja u t-tifħir.”

¹³U fis-sema, fuq l-art, taħt l-art, u fil-baħar u l-ħlejjaq kollha li fihom, smajthom jgħidu: “Lil dak li qiegħed fuq it-tron u lill-Ħaruf, jingħata t-tifħir u l-ġieħ u l-glorja u l-ħakma, għal dejjem ta’ dejjem.”

¹⁴L-erba’ Ħlejjaq Ħajjin bdew iwieġbu: “Ammen!,” filwaqt li x-Xjuħ inxteħtu jagħtu qima.