Read Maltese Bible with DC – IL-BIBBJA IL-KOTBA MQADDSA APOKALISSI 6 Bible Online

APOKALISSI 6 - Maltese Bible with DC – IL-BIBBJA IL-KOTBA MQADDSA bible

APOKALISSI 6

¹Imbagħad il-Ħaruf fetaħ l-ewwel wieħed mis-seba’ siġilli u jien ħarist u smajt wieħed mill-erba’ Ħlejjaq Ħajjin jgħid b’leħen ta’ ragħda: “Ejja”.

²U jien ħarist, u ara, ġie żiemel abjad, u dak li kien riekeb fuqu kellu qaws, u ngħatatlu kuruna; u ħareġ hu, rebbieħ, biex ikompli jirbaħ.

³U wara li fetaħ it-tieni siġill, smajt it-tieni wieħed mill-Ħlejjaq Ħajjin jgħid: “Ejja!”

⁴U ħareġ żiemel ieħor, ta’ lewn aħmar nar, u lil dak li kien riekeb fuqu ngħatatlu s-setgħa li jeqred il-paċi minn fuq wiċċ l-art, ħalli b’hekk il-bnedmin jitqatlu bejniethom; u għalhekk ingħatatlu xabla kbira.

⁵Wara li l-Ħaruf fetaħ it-tielet siġill, smajt it-tielet wieħed mill-Ħlejjaq Ħajjin jgħid: “Ejja!” U jien ħarist, u ara, ġie żiemel iswed, u r-rikkieb tiegħu kellu miżien f’idu.

⁶Imbagħad f’nofs l-erba’ Ħlejjaq Ħajjin smajt bħal leħen jgħid: “Siegħ qamħ bigħu dinar; tliet sigħan xgħir dinar ukoll; imma ż-żejt u l-inbid la tmisshomx”.

⁷Meta l-Ħaruf fetaħ ir-raba’ siġill, smajt leħen ir-raba’ Ħliqa Ħajja jgħid: “Ejja!”

⁸Ħarist, u ara, ġie żiemel ta’ lewn aħdar jagħti fl-isfar, u r-rikkieb tiegħu kien jismu “Mewt” u Post il-Mejtin miexi warajh. U lilhom ingħatat is-setgħa fuq waħda mill-erba’ taqsimiet tad-dinja, biex joqtlu n-nies bix-xabla, bil-ġuħ, bil-pesta u bil-bhejjem selvaġġi tal-art.

⁹Meta mbagħad fetaħ il-ħames siġill, rajt taħt l-artal l-erwieħ ta’ dawk li kienu qatluhom minħabba l-Kelma ta’ Alla, u minħabba x-xhieda li kienu taw;

¹⁰u għollew leħenhom u qalu: “Sid Qaddis u Veru, kemm se ddum ma tagħmel ħaqq u titħallas ta’ demmna minn dawk li jgħammru fl-art?”

¹¹U lil kull wieħed minnhom ingħatatlu libsa twila bajda, u qalulhom jistennew ftit ieħor sa ma jintemm l-għadd tal-qaddejja sħabhom u ta’ ħuthom li bħalhom kienu se joqtluhom.

¹²U fetaħ is-sitt siġill. Jien ħarist, u sar terremot kbir; ix-xemx saret sewda faħma[32], il-qamar sar kollu qisu demm,

¹³u l-kwiekeb tas-sema bdew jaqgħu fuq l-art bħalma siġra tat-tin tarmi l-frott nej tagħha meta jħabbatha riefnu qawwi.

¹⁴Is-sema ma deherx aktar, kif jiġrilu ktieb meta jitkebbeb[33], u kull muntanja u gżira tħarrku minn fejn kienu.

¹⁵Imbagħad is-slaten tal-art, il-kapijiet, il-mexxejja l-kbar, l-għonja, is-setgħana u l-lsiera u l-ħielsa kollha, marru jinħbew fl-għerien u qalb il-blat tal-muntanji,

¹⁶u bdew jgħidu lill-muntanji u lill-blat: “Ordmuna u aħbuna minn wiċċ dak li hemm bilqiegħda fuq it-tron u mill-korla tal-Ħaruf,

¹⁷għax wasal il-Jum il-Kbir tal-korla tagħhom! U min jiflaħ iżomm?”