Read Maltese Bible with DC – IL-BIBBJA IL-KOTBA MQADDSA APOKALISSI 7 Bible Online

APOKALISSI 7 - Maltese Bible with DC – IL-BIBBJA IL-KOTBA MQADDSA bible

APOKALISSI 7

¹Wara dan rajt erba’ anġli wieqfa fl-erba’ rkejjen tal-art, iżommu l-erbat irjieħ tal-art biex ebda riħ ma jonfoħ, la fuq l-art u la fuq il-baħar u fuq ebda siġra.

²U rajt anġlu ieħor tiela’ bis-siġill[34] ta’ Alla l-ħaj min-naħa tal-Lvant, u b’leħen għoli għajjat lill-erba’ anġli li lilhom kienet ingħatat is-setgħa li jagħmlu l-ħsara lill-art u lill-baħar,

³u qalilhom: “Tagħmlulhomx ħsara lill-art u lill-baħar, anqas lis-siġar, qabel ma nkunu stampajna s-siġill fuq il-ġbin tal-qaddejja ta’ Alla tagħna.”

⁴Imbagħad smajt x’kien l-għadd tal-issiġillati: mija u erbgħa u erbgħin elf issiġillati, minn kull tribù ta’ wlied Iżrael.

⁵Mit-tribù ta’ Ġuda ġew issiġillati tnax-il elf; tnax-il elf mit-tribù ta’ Ruben; tnax-il elf mit-tribù ta’ Gad;

⁶tnax-il elf mit-tribù ta’ Aser; tnax-il elf mit-tribù ta’ Neftali; tnax-il elf mit-tribù ta’ Manassi;

⁷tnax-il elf mit-tribù ta’ Simgħon; tnax-il elf mit-tribù ta’ Levi; tnax-il elf mit-tribù ta’ Issakar;

⁸tnax-il elf mit-tribù ta’ Żebulun; tnax-il elf mit-tribù ta’ Ġużeppi; tnax-il elf ġew issiġillati mit-tribù ta’ Benjamin.

⁹Wara dan ħarist, u ara, kien hemm kotra kbira li ħadd ma jista’ jgħoddha, minn kull ġens u tribù, minn kull poplu u lsien, weqfin quddiem it-tron u quddiem il-Ħaruf, lebsin ilbiesi twal bojod, u bil-friegħi tal-palm f’idejhom.

¹⁰U għollew leħenhom u bdew jgħidu: “Is-salvazzjoni nafuha lil Alla tagħna li qiegħed fuq it-tron, u lill-Ħaruf.”

¹¹L-anġli kollha kienu qegħdin madwar it-tron u madwar ix-Xjuħ u l-erba’ Ħlejjaq Ħajjin, u waqgħu wiċċhom fl-art quddiem it-tron jagħtu qima lil Alla

¹²u jgħidu: “Ammen. It-tifħir u l-glorja, l-għerf, ir-radd ta’ ħajr u l-ġieħ, il-qawwa u s-saħħa lil Alla tagħna, għal dejjem ta’ dejjem! Ammen.”

¹³Imbagħad wieħed mix-Xjuħ qabad u staqsieni: “Dawn li għandhom l-ilbiesi twal bojod fuqhom min huma, u minfejn ġejjin?”

¹⁴“Inti taf, sinjur”, għedtlu jien. Imbagħad qalli: “Dawn huma dawk li ġejjin mit-taħbit il-kbir, u l-ilbiesi tagħhom ħasluhom u bajduhom fid-demm tal-Ħaruf.

¹⁵Għalhekk jinsabu quddiem it-tron ta’ Alla, lejl u nhar jaqduh fit-tempju tiegħu; u dak li qiegħed fuq it-tron jeħodhom jgħammru taħt il-kenn tiegħu.

¹⁶Ma jbatux aktar ġuħ, anqas għatx ma jagħmel bihom aktar; ix-xemx ma taħkimhomx, u anqas ebda għomma,

¹⁷ladarba l-Ħaruf, li hemm f’nofs it-tron, ikun ir-ragħaj tagħhom; u hu jwassalhom ħdejn ilmijiet tal-għejun tal-ħajja. U Alla jixxuttalhom kull demgħa minn għajnejhom.”