Read Maltese Bible with DC – IL-BIBBJA IL-KOTBA MQADDSA APOKALISSI 8 Bible Online

APOKALISSI 8 - Maltese Bible with DC – IL-BIBBJA IL-KOTBA MQADDSA bible

APOKALISSI 8

¹U meta l-Ħaruf fetaħ is-seba’ siġill, fis-sema waqa’ skiet għal madwar nofs siegħa.

²Imbagħad rajt illi lis-seba’ anġli li qegħdin quddiem Alla ngħatawlhom seba’ trombi.

³U ġie anġlu ieħor, b’ċensier tad-deheb, u qagħad ħdejn artal; u tawh ħafna inċens biex joffrih mat-talb tal-qaddisin kollha fuq l-artal tad-deheb ta’ quddiem it-tron.

⁴U d-duħħan tal-inċens tela’ mat-talb tal-qaddisin minn id l-anġlu quddiem Alla.

⁵L-anġlu mbagħad ħa ċ-ċensier, imlieh bin-nar tal-artal, u waddbu għal fuq l-art; u beda jinstema’ r-ragħad b’ħafna tkarwit u beraq, u l-art theżżet.

⁶Imbagħad is-seba’ anġli li kellhom is-seba’ trombi[35] tħejjew biex idoqquhom.

⁷U daqq it-tromba l-ewwel wieħed. U fuq l-art beda nieżel silġ u nar b’taħlita ta’ dmija, u nħarqet waħda minn kull tlieta tal-art, inħarqet waħda minn kull tlieta tas-siġar, u nħarqet il-ħdura kollha tal-ħxejjex.

⁸It-tieni anġlu daqq it-tromba. U waqgħet ġol-baħar bħal muntanja kbira ta’ nar iħeġġeġ, u waħda minn kull tlieta tal-baħar saret demm,

⁹mietu waħda minn kull tlieta tal-ħlejjaq ħajjin li hemm fil-baħar, u nqered ġifen minn kull tlieta.

¹⁰U daqq it-tromba t-tielet anġlu. U mis-sema waqgħet kewkba kbira tħeġġeġ qisha torċa, li xteħtet fuq waħda minn kull tlieta tax-xmajjar u fuq l-għejun tal-ilmijiet.

¹¹Issa l-kewkba kien jisimha “Absint[36]”. U waħda minn kull tlieta tal-ilmijiet saret imrar tal-għaġeb, u, billi l-ilmijiet imraru, mietu bihom ħafna nies.

¹²U r-raba’ anġlu daqq it-tromba. U waqgħet waħda minn tlieta tax-xemx u waħda minn tlieta tal-qamar, u wkoll kewkba minn kull tlieta, hekk li waħda minn kull tlieta minnhom iddallmet; id-dawl ma deherx aktar f’waħda minn tlieta tal-ħin ta’ binhar, u hekk ukoll ġralu l-lejl.

¹³Imbagħad ħarist, u smajt leħen qawwi ta’ ajkla tittajjar fl-għoli tas-sema u tgħajjat: “Jaħasra, jaħasra, u ħasra għalihom dawk li jgħammru fl-art meta jinstemgħu l-bqija tat-trombi li se jdoqqu t-tliet anġli l-oħra!”