Read Maltese Bible with DC – IL-BIBBJA IL-KOTBA MQADDSA APOKALISSI 9 Bible Online

APOKALISSI 9 - Maltese Bible with DC – IL-BIBBJA IL-KOTBA MQADDSA bible

APOKALISSI 9

¹U daqq it-tromba l-ħames anġlu. U rajt kewkba[37] li kienet waqgħet mis-sema fuq l-art, u ngħatalha l-muftieħ tal-bir bla qiegħ.

²U hi fetħet il-bir bla qiegħ, u minn ġo fih telgħet daħna, qisha d-daħna ta’ forġa li ma bħalha, hekk li biha x-xemx u l-ajru ddallmu.

³U minn ġod-daħna tferrxu ġradijiet[38] fuq l-art, u lilhom ingħatat setgħa bħal dik li għandhom l-iskorpjuni[39] tal-art.

⁴U wissewhom biex ma jagħmlu ħsara lil ebda ħaxixa tal-art, lil ebda ħdura jew siġra, imma biss lil dawk il-bnedmin li ma għandhomx fuq ġbinhom il-marka tas-siġill ta’ Alla.

⁵Ordnawlhom, iżda, mhux li joqtluhom, imma li joqogħdu jaħqruhom għal ħames xhur, b’moħqrija bħal dik li jġibu l-iskorpjuni fuq il-bnedmin meta jigdmuhom.

⁶F’dawk il-jiem il-bnedmin jibdew ifittxu l-mewt bla ma jsibuha; u jixtiequ l-mewt u l-mewt taħrab minnhom!

⁷Is-sura tal-ġradijiet tixbah lil dik ta’ żwiemel imħejjija għat-taqbida; għandhom fuq rashom bħal kuruni qishom tad-deheb, l-uċuħ tagħhom bħall-uċuħ tal-bnedmin,

⁸xuxithom bħal xuxet in-nisa, snienhom bħal tal-iljuni,

⁹il-qoxra ta’ sidirhom qisha kurazza tal-ħadid, u l-ħoss ta’ ġwenħajhom tistħajlu l-ħoss ta’ ħafna karrijiet biż-żwiemel imlebbtin għall-gwerra.

¹⁰Kellhom denbhom bħal tal-iskorpjuni, għamla ta’ mqass, u sewwasew fih kienet is-setgħa tagħhom li jaħqru l-bnedmin għal ħames xhur.

¹¹U fuqhom kellhom bħala sultan tagħhom l-anġlu tal-bir bla qiegħ, li ismu bil-Lhudi hu Abaddon[40], u bil-Grieg Apolljon[41].

¹²Il-ħasra tal-ewwel għaddiet. Ara ġejjin it-tnejn l-oħra warajha.

¹³Is-sitt anġlu daqq it-tromba. U mill-erba’ rkejjen tal-artal tad-deheb ta’ quddiem Alla smajt leħen

¹⁴jgħid lis-sitt anġlu li kellu t-tromba: “Mur ħoll l-erba’ anġli li hemm marbutin fix-xmara l-kbira tal-Ewfrat[42]”.

¹⁵U nħallu l-erba’ anġli li kienu mħejjija għas-siegħa u l-jum u x-xahar u s-sena, biex joqtlu wieħed minn kull tlieta minn fost il-bnedmin.

¹⁶L-eżerċtu tal-ġellieda kien jgħodd mitejn miljun, kif smajt min jgħid.

¹⁷Fid-dehra li kelli, iż-żwiemel u r-rikkieba tagħhom rajthom hekk: il-kurazzi tagħhom kienu minn lewn in-nar u l-ġjaċint u l-kubrit; l-irjus taż-żwiemel kienu qishom irjus ta’ ljun; nar, duħħan u kubrit li kienu ħerġin minn fommhom.

¹⁸B’dawn it-tliet flaġelli, jiġifieri n-nar u d-duħħan u l-kubrit li kienu ħerġin minn fommhom, inqered bniedem minn kull tlieta,

¹⁹għax il-qawwa taż-żwiemel kienet tinsab f’fommhom u f’denbhom; għax denbhom kien qisu serp bir-ras, u bih bdew jagħmluha l-ħsara.

²⁰U l-bqija tal-bnedmin li ma nqerdux b’dawn il-flaġelli ma reġgħux lura mill-għemejjel ta’ idejhom u anqas ma waqfu milli jinxteħtu jqimu d-demonji u l-idoli tad-deheb u tal-fidda, tal-bronż, tal-ġebel u tal-injam, li la jistgħu jaraw, la jisimgħu u lanqas jimxu;

²¹anqas ma nidmu mill-qtil u mis-seħer, miż-żina u mis-serq tagħhom.