Read Maltese Bible with DC – IL-BIBBJA IL-KOTBA MQADDSA RUT 1 Bible Online

RUT 1 - Maltese Bible with DC – IL-BIBBJA IL-KOTBA MQADDSA bible

RUT 1

¹Fi żmien meta kienu jaħkmu l-imħallfin[1], kien hemm l-għaks fil-pajjiż. Kien hemm raġel minn Betlehem ta’ Ġuda li mar joqgħod fl-inħawi ta’ Mowab, hu, martu u ż-żewġ uliedu.

²Ir-raġel kien jismu Elimelek, martu Nagħomi, u ż-żewġ uliedu Maħlon u Kiljon, Efratin minn Betlehem ta’ Ġuda[2]. Marru joqogħdu fl-inħawi ta’ Mowab.

³Ġara li miet Elimelek, żewġ Nagħomi, u baqgħu hi u ż-żewġ uliedha.

⁴U dawn ħadu b’nisa tagħhom tnejn mill-Mowabin: waħda jisimha Għorfa, u l-oħra Rut; u qagħdu hemm għal xi għaxar snin.

⁵U mietu ż-żewġ irġiel Maħlon u Kiljon; u l-mara baqgħet weħidha mingħajr iż-żewġ uliedha u żewġha.

⁶Qamet hi u n-nisa ta’ wliedha biex jerġgħu lura mill-inħawi ta’ Mowab, għax kienu semgħu f’Mowab li l-Mulej kien ħaseb fil-poplu tiegħu, u pprovdielhom il-ħobż.

⁷U ħarġet minn fejn kienet hi u ż-żewġ nisa ta’ wliedha, u qabdu t-triq biex jerġgħu lura lejn l-art ta’ Ġuda.

⁸U Nagħomi qalet liż-żewġ nisa: “Itilqu, erġgħu lura kull waħda f’dar ommha[3], u jalla jagħmel ħniena magħkom il-Mulej, kif intom għamiltu mal-mejtin u miegħi.

⁹U jagħtikom il-Mulej li ssibu l-mistrieħ, kull waħda f’dar żewġha.” U bisithom it-tnejn, u għollew leħinhom u bkew.

¹⁰Iżda huma qalulha: “Aħna niġu lura miegħek għand niesek.”

¹¹U Nagħomi wieġbet: “Erġgħu lura, uliedi. Għala tridu tiġu miegħi? Għandi jien, jaqaw, ulied f’ġufi biex ikunu żwieġkom[4]?

¹²Erġgħu lura, uliedi. Jien xjeħt wisq biex nerġa’ niżżewweġ. Kieku ngħid li għad fadalli tama, u llejla stess niżżewweġ u niled it-tfal,

¹³jaqaw se tistennewhom sakemm jikbru? Se toqogħdu intom mingħajr ma tiżżewġu? Le, uliedi, għax għandi mrar kbir minħabba fikom; tassew li laħqitni id il-Mulej.”

¹⁴U huma għollew leħinhom u reġgħu bkew. Għorfa bieset lil omm żewġha[5], imma Rut baqgħet imqabbda magħha.

¹⁵Nagħomi qaltilha: “Il-kunjata reġgħet lura għand niesha u l-allat tagħha. Mur lura mal-kunjata.”[6]

¹⁶U Rut wieġbet: “Iġġagħalnix nitilqek u nerġa’ lura minnek; fejn tmur int, immur jien; fejn toqgħod int, noqgħod jien; niesek, niesi; Alla tiegħek, Alla tiegħi[7];

¹⁷fejn tmut int, immut jien; u hemm nindifen. Dan jagħmilli, u aktar, il-Mulej, jekk ma tkunx il-mewt li tifridna.”

¹⁸U Nagħomi rat kif webbset rasha biex tmur magħha, u ma kellmithiex iżjed.

¹⁹U telqu t-tnejn sakemm waslu Betlehem. Kif waslu Betlehem qamet għagħa waħda mal-belt kollha, għax qalu: “Din hi Nagħomi?”

²⁰U hi qaltilhom: “Issejħulix Nagħomi[8]: sejħuli Mara, għax bl-imrar imlieni Alla li jista’ kollox.

²¹Mimlija tlaqt minn hawn u b’xejn reġġagħni lura l-Mulej. Għala ssejħuli Nagħomi, meta l-Mulej ċekkinni, u għakkisni Xaddaj?”

²²U hekk reġgħet lura Nagħomi u Rut il-Mowabija, mart binha, magħha, mill-inħawi ta’ Mowab. Kien żmien il-ħsad tax-xgħir[9] meta waslu Betlehem.