Read Maltese Bible with DC – IL-BIBBJA IL-KOTBA MQADDSA RUT 2 Bible Online

RUT 2 - Maltese Bible with DC – IL-BIBBJA IL-KOTBA MQADDSA bible

RUT 2

¹Nagħomi kellha wieħed jiġi minnha min-naħa ta’ żewġha; kien bniedem għani ħafna, mill-familja ta’ Elimelek u kien jismu Bogħaż.

²U Rut, il-Mowabija, qalet lil Nagħomi: “Ħa mmur fir-raba’, u llaqqat is-sbul minn wara[10] min juri ħniena miegħi.” U Nagħomi weġbitha: “Mur binti.”

³U marret tlaqqat fir-raba’ minn wara l-ħassada. U messitha għalqa minn ta’ Bogħaż, li kien wieħed mill-familja ta’ Elimelek.

⁴U ara, Bogħaż ġie minn Betlehem u sellem lill-ħassada: “Il-Mulej magħkom[11].” U huma qalulu: “Ibierkek il-Mulej.”

⁵U Bogħaż qal lill-qaddej tiegħu, li kien fuq il-ħassada: “Ta’ min hi din it-tifla?”

⁶U wieġeb il-qaddej li kien fuq il-ħassada u qallu: “Tifla Mowabija, li ġiet ma’ Nagħomi mill-inħawi ta’ Mowab.

⁷U staqsietni: ‘Nista’ llaqqat u niġbor minn bejn il-qatet tal-ħassada?’ U ġiet u baqgħet hawn mis-sebħ sa issa, u anqas marret id-dar tistrieħ.”

⁸U Bogħaż qal lil Rut: “Ara, qiegħda tisma’, binti? Tmurx tlaqqat f’għalqa oħra. U lanqas ma għandek twarrab minn hawn: ibqa’ mal-ħaddiema bniet tiegħi.

⁹Żomm għajnejk fuq l-għalqa li jkunu jaħsdu, u imxi warajhom. Ara, wissejt lill-ħaddiema biex ma jmissukx. Meta jieħdok l-għatx mur ħdejn il-ġarar, u ixrob mnejn jixorbu l-ħaddiema.”

¹⁰U niżlet wiċċha fl-art u qaltlu: “Kif sibt ħniena f’għajnejk u ħarist lejja, jien, li jien mara barranija?”

¹¹U wieġeb Bogħaż: “Qaluli b’kulma għamilt mal-kunjata wara l-mewt ta’ żewġek; ħallejt lil missierek u lil ommok u lil art twelidek, u tlaqt għal għand poplu li int xejn ma kont tafu qabel.

¹²Il-Mulej iħallsek ta’ għemilek. Ħlasek ikun sħiħ mingħand il-Mulej, Alla ta’ Iżrael, li int ġejt tistkenn taħt ġwenħajh.”

¹³Rut wieġbet: “Jalla nsib ħniena f’għajnejk, Sidi, għax int farraġtni u kellimt il-qalb tal-qaddejja tiegħek, għalkemm jien m’iniex daqs waħda mill-qaddejja tiegħek.”

¹⁴F’ħin l-ikel Bogħaż qalilha: “Ersaq ’l hawn, u kul biċċa ħobż, u bill il-ftiet tiegħek fil-ħall.” U hi qagħdet bilqiegħda ħdejn il-ħassada. Hu taha qamħ inkaljat, u hi kielet, xebgħet, u fadlilha.

¹⁵U qamet biex tkompli tlaqqat. Bogħaż wissa lill-ħaddiema tiegħu u qalilhom: “Ħalluha tlaqqat bejn il-qatet ukoll, u la tgerrxuhiex.

¹⁶Anzi ħallu wkoll jaqa’ s-sbul mill-qatet biex tlaqqtu hi, u tlumuhiex.”

¹⁷U damet tlaqqat fir-raba’ sa filgħaxija. Meta, imbagħad, daqqet is-sbul li kienet laqqtet, sabet li kellha daqs efa xgħir.

¹⁸Ġabritu u marret lejn il-belt, u wriet lill-kunjata dak li kienet laqqtet; ħarġet li kien fadlilha meta kielet u xebgħet, u tathulha.

¹⁹Il-kunjata staqsietha: “Fejn mort tlaqqat il-qamħ illum? Fejn ħdimt? Imbierek minn ħa ħsiebek.” U Rut għarrfet lill-kunjata ma’ min kienet ħadmet u qaltilha: “Ir-raġel li ħdimt miegħu llum jismu Bogħaż.”

²⁰U Nagħomi wieġbet lil mart binha: “Imbierek hu mill-Mulej, li ma warrabx il-ħniena tiegħu la mill-ħajjin u lanqas mill-mejtin.” U Nagħomi ssuktat tgħidilha: “Dak ir-raġel hu qaribna, u hu li għandu d-dritt tal-fidwa fuqna[12].”

²¹Rut, il-Mowabija, qaltilha wkoll: “U qalli wkoll: Ibqa’ mal-qaddejja bniet tiegħi sakemm itemmu l-ħsad kollu tiegħi.”

²²U Nagħomi qalet lil Rut, mart binha: “Aħjar, binti, tmur mal-qaddejja bniet tiegħu, biex ma jaħqrukx f’xi għalqa oħra.”

²³U Rut baqgħet mal-qaddejja ta’ Bogħaż, sakemm intemm ħsad ix-xgħir u ħsad il-qamħ; u f’dan iż-żmien kienet toqgħod mal-kunjata.