Read Maltese Bible with DC – IL-BIBBJA IL-KOTBA MQADDSA RUT 3 Bible Online

RUT 3 - Maltese Bible with DC – IL-BIBBJA IL-KOTBA MQADDSA bible

RUT 3

¹U Nagħomi, il-kunjata, qalet lil Rut: “Binti, ma jidhirlekx li għandi nfittex li tinġabar għall-ġid tiegħek stess?

²U issa, forsi Bogħaż mhux qaribna, dak li int kont mat-tfajliet tiegħu? Ara llejla hu jkun iderri l-andar tax-xgħir.

³Mur inħasel, indilek bil-fwieħa, xidd fuqek l-aħjar ilbies, u mur l-andar. Tħallihx jagħrfek, sakemm ma jkunx kiel u xorob.

⁴Meta mbagħad jimtedd, sib il-post fejn ikun mimdud, mur ħdejh, ikxiflu n-naħa ta’ riġlejh, u mtedd hemm. Imbagħad hu jgħidlek x’għandek tagħmel.”

⁵Rut weġbitha: “Kulma tgħidli, nagħmlu.”

⁶U niżlet l-andar, u għamlet kulma wissietha l-kunjata.

⁷Bogħaż kiel u xorob, u ħassu ferħan, u mar jimtedd f’tarf il-munzell tax-xgħir. U Rut resqet ħdejh, inkiss inkiss, u kixfitlu n-naħa ta’ riġlejh, u mteddet hemm.

⁸Ġara li f’nofs ta’ lejl ħass bħal tkexkixa bard, dar fuq ġenbu, lemaħ mara mimduda ħdejn riġlejh,

⁹u staqsieha: “Min int?” U hi wieġbet: “Jiena Rut, il-qaddejja tiegħek. Ixħet djul mantarek fuq il-qaddejja tiegħek, għax int għandek il-jedd tal-fidwa[13].”

¹⁰Bogħaż weġibha: “Imbierka, binti, mill-Mulej! Din tjubitek tal-aħħar, aħjar mill-oħra ta’ qabel, għax int ma mortx tiġri wara ż-żgħażagħ, la għonja u lanqas foqra.

¹¹U issa, binti, la tibżax. Jien nagħmel miegħek kulma tgħidli, għax niesi kollha fil-bieb tal-belt jafu li int mara sewwa.

¹²Tassew li għandi l-jedd tal-fidwa, iżda hemm wieħed eqreb minni.

¹³Għaddi l-lejl hawn: għada filgħodu, jekk irid jifdik hu, tajjeb, ħa jifdik; jekk ma jogħġbux jifdik, nifdik jien. Ħaj il-Mulej! Ibqa’ rieqda hawn sa filgħodu.”

¹⁴Rut baqgħet rieqda n-naħa ta’ riġlejh sa filgħodu. U qamet Rut kmieni qabel ma bniedem jista’ jagħraf ieħor, għax Bogħaż qal: “Ma jmurx xi ħadd ikun jaf li ġiet mara l-andar.”

¹⁵U mbagħad qalilha: “Ġib il-mantar ta’ fuqek u żommu tajjeb.” Hi żammitu tajjeb, u hu kejlilha sitt tikjiliet xgħir; għabbihomlha, u rħitilha lejn il-belt.

¹⁶Meta waslet id-dar il-kunjata staqsietha: “X’minnek, binti?” U Rut għarrfitha b’kulma kien għamel magħha r-raġel

¹⁷u qaltilha: “Tani sitt tikjiliet xgħir u qalli: ‘Ma tmurx b’idek f’idek għand il-kunjata.”

¹⁸U Nagħomi wieġbet: “Stenna, binti, sakemm tara kif se tintemm il-biċċa, għax ma jsibx sabar qabel ma jirranġa kollox illum.”