Read Maltese Bible with DC – IL-BIBBJA IL-KOTBA MQADDSA RUT 4 Bible Online

RUT 4 - Maltese Bible with DC – IL-BIBBJA IL-KOTBA MQADDSA bible

RUT 4

¹Bogħaż mar ħdejn bieb il-belt[14] u qagħad hemm bilqiegħda; u għadda l-qarib li kien semma Bogħaż. Dan qallu: “Ersaq ’l hawn, ħabib, u oqgħod bilqiegħda.” Resaq lejh u qagħad bilqiegħda hemm.

²Imbagħad Bogħaż sejjaħ għaxra mix-xjuħ tal-belt, u qalilhom: “Oqogħdu bilqiegħda hawn” u qagħdu bilqiegħda.

³U Bogħaż qal lill-qarib: “Nagħomi, li reġgħet lura mill-inħawi ta’ Mowab, se tbigħ biċċa mill-għalqa li kellu ħuna[15] Elimelek.

⁴U jien għedt, ngħarrfek biha u ngħidlek: ‘Ixtriha int[16] quddiem dawn li hawn bilqiegħda, u quddiem ix-xjuħ ta’ niesi. Jekk tifdiha, tkun fdejtha; jekk ma tifdihiex, għarrafni ħalli nkun naf. Għax ma hemm ħadd aktar ħliefek li għandu d-dritt li jifdiha, u jien niġi warajk.” U hu wieġeb: “Nifdiha.”

⁵U Bogħaż qallu: “Dak in-nhar li tixtri l-għalqa mingħand Nagħomi, int tkun trid tieħu wkoll lil Rut il-Mowabija, mart il-mejjet, biex tqajjem isem il-mejjet fuq wirtu.”

⁶U l-qarib wieġeb: “Ma nistax nifdi, għax inkella nagħmel ħsara lil wirti. Ħu d-dritt li għandi jien, u ifdiha int, għax jien ma nistax nifdiha.”

⁷Dik il-ħabta kienet id-drawwa f’Iżrael, li meta wieħed kien jifdi jew jibdel xi ħaġa, biex iseħħ il-ftehim, kien jaqla’ l-qorq u jagħtih lill-ieħor[17]. Din kienet ix-xhieda f’Iżrael.

⁸Il-qarib imbagħad qal lil Bogħaż: “Ħudha int,” u qala’ l-qorq.

⁹U Bogħaż qal lix-xjuħ u lin-nies kollha: “Intom illum xhud li jien xtrajt kulma kellu Elimelek, u kulma kellu Kiljon, u kulma kellu Maħlon mingħand Nagħomi.

¹⁰Nieħu wkoll b’marti lil Rut il-Mowabija, il-mara ta’ Maħlon, biex inqajjem l-isem tal-mejjet fuq il-wirt tiegħu, u b’hekk ma jispiċċalux ismu minn fost ħutu u minn bwieb beltu. Intom illum ilkoll xhud ta’ dan.”

¹¹U n-nies kollha li kienu ħdejn il-bieb tal-belt u x-xjuħ qalulu: “Aħna xhud. Jagħmel Alla l-mara li daħlet f’darek bħal Rakel u bħal Lija, li t-tnejn bnew id-dar ta’ Iżrael. Stagħna f’Efrata u agħmel isem f’Betlehem.

¹²Ħa tkun darek bħad-dar ta’ Pereż li Tamar wildet lil Ġuda, min-nisel li jagħtik il-Mulej minn din il-mara żagħżugħa.”

¹³Bogħaż ħa lil Rut, u saret martu, u resaq lejha, u l-Mulej taha li titqal u tiled iben.

¹⁴U n-nisa bdew jgħidu lil Nagħomi: “Imbierek il-Mulej, li ma ċaħħdekx minn qarib feddej illum; ismu jkun magħruf f’Iżrael.

¹⁵Hu jfarraġlek ruħek u jwieżnek fi xjuħitek, għaliex wilditu mart ibnek, li tħobbok, u li għalik hi aħjar minn seba’ wlied.”

¹⁶U Nagħomi ħadet it-tarbija, u qegħditha f’ħoġorha[18] u ħaditha biex trabbiha.

¹⁷U n-nisa tawha isem u qalu: “Nagħomi tweldilha tifel.” U semmewh Għobed. Hu missier Ġesse, missier David.

¹⁸Din hi l-ġenerazzjoni ta’ Pereż; Pereż nissel lil Ħesron;

¹⁹Ħesron nissel lil Ram, u Ram nissel lil Għamminadab.

²⁰Għamminadab nissel lil Naħson, u Naħson nissel lil Salmon.

²¹Salmon nissel lil Bogħaż, u Bogħaż nissel lil Għobed.

²²U Għobed nissel lil Ġesse, u Ġesse nissel lil David.