Read Maltese Bible with DC – IL-BIBBJA IL-KOTBA MQADDSA 1 SAMWEL 10 Bible Online

1 SAMWEL 10 - Maltese Bible with DC – IL-BIBBJA IL-KOTBA MQADDSA bible

1 SAMWEL 10

¹Samwel ħa l-kus taż-żejt f’idejh u sawwabhulu fuq rasu, u mbagħad biesu u qallu: “Mhuwiex il-Mulej li dilkek u għamlek prinċep fuq Iżrael, il-poplu tiegħu? Tkun int li tmexxi l-poplu tal-Mulej u teħilsu minn idejn l-għedewwa tiegħu, li għandu madwaru. U dan ikunlek is-sinjal li kien il-Mulej li dilkek u għamlek prinċep fuq il-wirt tiegħu:

²meta tkun tlaqt minn quddiemi, int issib żewġt irġiel ħdejn il-qabar ta’ Rakel, f’Selsa fl-art ta’ Benjamin, u jgħidulek: ‘Instabu l-ħmariet li int ħriġt tfittex. U ara, missierek neħħa l-ħsieb tal-ħmariet u qiegħed jitħasseb fuqkom u jgħid: X’se nagħmel b’ibni?’

³U minn hemm tibqa’ sejjer sal-balluta tat-Tabor u hemm tiltaqa’ ma’ tlitt irġiel telgħin għand Alla[14] f’Betel: wieħed iġorr tliet gidjien u wieħed iġorr tliet ħobżiet, u l-ieħor żaqq inbid,

⁴huma jsellmulek jagħtuk żewġ ħobżiet, u int teħodhom minn idejhom.

⁵Imbagħad tasal sa Gibgħat-eloħim fejn hemm l-għases tal-Filistin, u kif tasal hemm fi dħul il-belt, tiltaqa’ ma’ qatgħa profeti niżlin mill-għolja, b’arpa u tanbur, flawt u ċetra quddiemhom, u jintilfu f’estasi ta’ profeti[15].

⁶Inti mbagħad jinżel fuqek u jaħtfek l-ispirtu tal-Mulej, u int ukoll tintilef magħhom f’estasi ta’ profeta, u tinbidel fi bniedem ieħor.

⁷Meta jkunu seħħewlek dawn is-sinjali kollha, tista’ tagħmel kulma jiġi għal idejk, għax Alla jkun miegħek.

⁸Imbagħad inżel qabli f’Gilgal, u jien ninżel ħdejk biex noffri sagrifiċċju tal-ħruq u sagrifiċċju tas-sliem; iddum sebat ijiem tistenna sakemm niġi ħdejk, u ngħarrfek x’għandek tagħmel.”

⁹U ġara li malli dawwar spallejh biex jitlaq minn ħdejn Samwel, Alla biddillu qalbu f’oħra, u seħħew dawn is-sinjali kollha dakinhar stess.

¹⁰Kif wasal minn hemm fuq l-għolja ltaqa’ ma’ qatgħa profeti, u niżel fuqu u ħatfu l-ispirtu ta’ Alla, u ntilef f’estasi ta’ profeta f’nofshom.

¹¹Xħin dawk kollha li kienu jafuh qabel rawh f’estasi ta’ profeta, bdew jgħidu lil xulxin: “X’ġara lil bin Kis? Sawl ukoll mal-profeti?”

¹²Wieħed minn hemm wieġeb u qal: “Min hu missierhom?” Għalhekk xtered il-qawl: “Huwa Sawl ukoll fost il-profeti?”

¹³Meta spiċċa jipprofetizza mar fuq l-għolja.

¹⁴U z-ziju ta’ Sawl qal lilu u lill-qaddej tiegħu: “Fejn mortu?” u wieġeb: “Infittxu l-ħmariet; u xħin rajna li ma kienu mkien morna għand Samwel.”

¹⁵U z-ziju ta’ Sawl staqsiehom: “Għidli x’qalilkom Samwel.”

¹⁶U Sawl wieġeb lil zijuh: “Għarrafna li l-ħmariet kienu nstabu.” U fuq il-biċċa tas-sultan ma qallu xejn x’kien qallu Samwel.

¹⁷Samwel laqqa’ l-poplu quddiem il-Mulej f’Misfa.

¹⁸U qal lil ulied Iżrael: “Dan jgħid il-Mulej, Alla ta’ Iżrael: Jien tellajt lil Iżrael mill-Eġittu, u ħlistkom minn id l-Eġizzjani, u minn id is-slaten kollha li ħaqrukom.

¹⁹Imma intom illum ċħadtu lil Alla tagħkom, is-salvatur tagħkom fl-hemm u d-dwejjaq kollha, u għedtulu: ‘Le! agħmlilna sultan fuqna.’ Issa mela ersqu lejn il-Mulej u tqassmu skont it-tribujiet u l-familji tagħkom.”

²⁰Samwel imbagħad ressaq it-tribujiet kollha ta’ Iżrael, u ntgħażel bix-xorti t-tribù ta’ Benjamin.

²¹U ressaq it-tribù ta’ Benjamin skont il-familji tiegħu u telgħet bix-xorti l-familja ta’ Matri; u mbagħad tala’ bix-xorti Sawl bin Kis, u fittxewh u ma sabuhx.

²²U reġgħu staqsew lill-Mulej: “Ġie hawn ir-raġel?” U l-Mulej wieġeb: “Hawn hu moħbi qalb il-provvisti!”

²³Marru jiġru, u ħaduh minn hemm u qegħduh f’nofs il-poplu, u kien jgħaddi lil kulħadd minn spallejh ’il fuq.

²⁴U Samwel imbagħad fisser lill-poplu kollu: “Rajtu lil min ħatar il-Mulej? M’hawnx ieħor bħalu fil-poplu kollu.” U l-poplu għolla leħnu, għajjat għajta kbira, u qal “Viva s-sultan!”

²⁵Samwel imbagħad fisser lill-poplu d-dritt tas-sultan u kitbu fi ktieb[16] u qiegħdu quddiem il-Mulej, u Samwel bagħat il-poplu kollu, kulħadd lejn daru.

²⁶Sawl ukoll mar id-dar f’Gibgħa, u marru miegħu wkoll irġiel qalbiena, li Alla messilhom qalbhom.

²⁷Imma xi rġiel ħżiena qalu: “Biex se jsalvana dan?” Maqdruh u ma ġibulux offerti.