Read Maltese Bible with DC – IL-BIBBJA IL-KOTBA MQADDSA 1 SAMWEL 18 Bible Online

1 SAMWEL 18 - Maltese Bible with DC – IL-BIBBJA IL-KOTBA MQADDSA bible

1 SAMWEL 18

¹Malli David spiċċa jitkellem ma’ Sawl, qalb Ġonatan intrabtet ma’ qalb David, u Ġonatan ħabbu bħalu nnifsu.

²Dakinhar Sawl ħadu miegħu, u ma ħalliehx imur f’dar missieru.

³U Ġonatan u David għamlu patt bejniethom, għax kien iħobbu bħalu nnifsu.

⁴U Ġonatan neħħa l-mantar li kellu fuqu, u tah lil David, u tah ukoll l-armatura tiegħu, u saħansitra x-xabla u l-qaws u l-ħżiem li kellu.

⁵U David kien joħroġ għall-ġlied, u kull fejn kien jibagħtu Sawl kien jirbaħ. U Sawl qiegħdu fuq in-nies tal-gwerra. U kien miġjub min-nies kollha u mill-qaddejja kollha ta’ Sawl.

⁶Ġara li, meta David raġa’ lura wara li kien qatel il-Filisti,

⁷ħarġu n-nisa mill-ibliet kollha ta’ Iżrael bit-tnabar u bl-arpi, jgħajtu bil-ferħ, jgħannu u jiżfnu madwar is-sultan Sawl, jaqbżu u jwieġbu ’l xulxin: “L-eluf tiegħu qatel Sawl; u David l-għaxriet tal-eluf tiegħu.”

⁸Dan deher ikrah f’għajnejn Sawl, u saħan bis-sħiħ: “Lil David tawh għaxriet l-eluf,” qal, “u lili tawni l-eluf; ma jonqoshomx jagħtuh ħlief is-saltna!”

⁹U minn dakinhar ’il quddiem beda jarah ikrah lil David.

¹⁰L-għada, spirtu ħażin mibgħut minn Alla ħakem lil Sawl li ntilef f’dagħdigħa f’daru. David kien qiegħed idoqq l-arpa bħas-soltu, u Sawl kellu f’idejh il-lanza.

¹¹U beda jxejjirha u jgħajjat: “Irrid noqtol lil David, u nwaħħlu mal-ħajt!” Imma David żgiċċa minn quddiemu darbtejn.

¹²Sawl beda jibża’ minn David, għax il-Mulej kien miegħu u tbiegħed minn Sawl.

¹³U dan warrbu minn quddiemu billi qiegħdu kap ta’ elf ruħ; u David kien ħiereġ u dieħel quddiem il-poplu.

¹⁴David kien għaqli fl-imġiba tiegħu, għax il-Mulej kien miegħu.

¹⁵U meta Sawl kien jarah hekk għaqli, kien jibża’ minnu,

¹⁶imma Iżrael u Ġuda kollha kienu jħobbu ’l David, għax kien imexxihom fit-taqbid[29].

¹⁷Sawl qal lil David: “Ara għandi ’l binti l-kbira Merab. Jien nagħtihielek b’martek, biss kun gwerrier qalbieni u ġġieled il-battalji tal-Mulej.” Għax Sawl qal bejnu u bejn ruħu: “Ma nerfax idi fuqu jien, iżda jerfgħuha l-Filistin.”

¹⁸U David qal lil Sawl: “Min jien, u min hi l-familja ta’ missieri fost Iżrael, biex inkun jien ħaten is-sultan?”

¹⁹Imma ġara li meta Merab bint Sawl kienet waslet għaż-żwieġ ma’ David, Sawl taha lil Għadrijel ta’ Meħola b’martu.

²⁰Mikal, bint Sawl, kienet tħobb lil David. Sawl qalulu b’dan u din il-ħaġa għoġbitu.

²¹U Sawl qal: “Nagħtihielu, iżda se tkunlu xibka, għax taqa’ fuqu id il-Filistin.” U Sawl qal lil David għat-tieni darba: “Illum int issir ħatni.”

²²Sawl imbagħad ordna lill-qaddejja tiegħu jkellmu lil David bil-moħbi u jgħidulu: “Ara, is-sultan mgħaxxaq bik u l-qaddejja kollha tiegħu jħobbuk; għalhekk issa hu l-waqt li ssir ħaten is-sultan.”

²³U l-qaddejja ta’ Sawl wasslu dan il-kliem f’widnejn David, u David wieġeb: “Taħsbu intom li hi ħaġa żgħira li tkun ħaten is-sultan? Jien bniedem fqir u ma jien xejn.”

²⁴U l-qaddejja ta’ Sawl għarrfuh b’dan u qalulu: “Dan hu kliem David.”

²⁵U Sawl weġibhom: “Dan jgħidu lil David: ‘Is-sultan ma jrid ebda rigal ieħor, ħlief mitt ħliefa tal-Filistin, biex jitħallas mill-għedewwa tas-sultan.’ ” Sawl kellu f’rasu li David jaqa’ f’idejn il-Filistin.

²⁶U l-qaddejja ta’ Sawl wasslu dan il-kliem lil David. U din li jiżżewweġ lil bint is-sultan lil David għoġbitu. Ma għaddiex ħafna żmien;

²⁷David qam u ħareġ, hu u n-nies tiegħu, u qatel mitejn raġel mill-Filistin u ħa ħlifiethom, u mar jgħoddhom quddiem is-sultan biex jiżżewweġ lil bintu. U Sawl tah lil bintu Mikal b’martu.

²⁸Sawl ra li l-Mulej kien ma’ David, u li Mikal bint Sawl[30] kienet tħobbu.

²⁹U baża’ minn David aktar minn qabel, u sar għadu tiegħu għal ħajtu kollha.

³⁰U l-kapijiet tal-Filistin baqgħu joħorġu għall-ġlied, u kull darba li kienu joħorġu David kien joħroġ u juri ħila aktar mill-qaddejja kollha ta’ Sawl, u ismu kien jissemma ma’ kullimkien.