Read Maltese Bible with DC – IL-BIBBJA IL-KOTBA MQADDSA 1 SAMWEL 3 Bible Online

1 SAMWEL 3 - Maltese Bible with DC – IL-BIBBJA IL-KOTBA MQADDSA bible

1 SAMWEL 3

¹Iż-żagħżugħ Samwel kien jaqdi l-Mulej ma’ Għeli; imma l-kelma tal-Mulej kienet rari f’dak iż-żmien, ftit kien hemm dehriet.

²Ġara li, jum wieħed, Għeli kien mistrieħ f’postu, għax għajnejh kienu bdew jintfew, u ma kienx jista’ jara.

³Il-musbieħ ta’ Alla kien għadu ma ntefiex, u Samwel kien mimdud fit-tempju tal-Mulej, fejn kien hemm l-arka ta’ Alla.

⁴Il-Mulej sejjaħ: “Samwel!” U dan wieġeb: “Hawn jien!”

⁵U mar jiġri għand Għeli. “Hawn jien,” qallu, “għalfejn sejjaħtli?” “Ma sejjaħtlekx,” wieġeb, “erġa’ mur imtedd.” U raġa’ mar jorqod.

⁶U ssokta l-Mulej isejjaħ: “Samwel!” U Samwel qam u mar għand Għeli u qallu: “Hawn jien! Għalfejn sejjaħtli?” “Ma sejjaħtlekx, ibni,” wieġeb, “erġa’ mur orqod.”

⁷Samwel kien għadu ma għarafx il-Mulej, u anqas kienet għadha ma ttgħarrfitlu l-kelma tal-Mulej.

⁸U ssokta l-Mulej isejjaħ: “Samwel!” għat-tielet darba. U dan qam, u mar għand Għeli, u qallu: “Hawn jien! Għalfejn sejjaħtli?” U Għeli fehem li l-Mulej kien qiegħed isejjaħ iż-żagħżugħ.

⁹U qal lil Samwel: “Mur orqod. Jekk jerġa’ jsejjaħlek, wieġeb: Tkellem, Mulej, għax il-qaddej tiegħek qiegħed jisma’.” U Samwel mar jorqod f’postu.

¹⁰U l-Mulej ġie, waqaf ħdejh, u sejjaħ bħal drabi oħra: “Samwel! Samwel!” U Samwel wieġeb: “Tkellem, għax il-qaddej tiegħek qiegħed jisma’.”

¹¹U qal il-Mulej lil Samwel: “Ara, jien se nagħmel waħda f’Iżrael, li kull min jisma’ biha jdamdmu widnejh it-tnejn.

¹²Dakinhar inġib fuq Għeli kulma kont għedt kontra daru; nibda u ntemm.

¹³Ħabbartlu li jien għad nagħmel ħaqq minn daru għal dejjem, talli hu kien jaf li wliedu kienu qegħdin jagħmlu l-ħażen u jżebilħu ’l Alla, u hu ma ċanfarhomx.

¹⁴U għalhekk jien naħlef lil dar Għeli: Il-ħażen ta’ dar Għeli ma jinħafirx, la bis-sagrifiċċji u lanqas bl-offerti, qatt u qatt!”

¹⁵Samwel baqa’ rieqed sa filgħodu, u mbagħad fetaħ bwieb dar il-Mulej; imma baża’ jgħarraf lil Għeli bil-viżjoni li kellu.

¹⁶Għeli sejjaħ lil Samwel u qallu: “Samwel, ibni,” u hu wieġeb: “Hawn jien.”

¹⁷U staqsieh: “X’inhu li qallek? Taħbili xejn. Hekk u hekk jagħmillek Alla u iżjed[8] jekk taħbili xi ħaġa minn kulma qallek.”

¹⁸U Samwel għarrfu b’kollox bla ma ħbielu xejn. U Għeli qal: “Hu l-Mulej! - Jagħmel li jogħġbu!”

¹⁹Samwel kiber, u l-Mulej kien miegħu, u ma ħalla ebda kelma milli qal tmur fix-xejn.

²⁰U Iżrael kollu, minn Dan sa Birsaba, għaraf li Samwel kien tassew profeta tal-Mulej,

²¹u l-Mulej baqa’ jidher f’Silo, għax hemm kien għarraf lilu nnifsu lil Samwel, f’Silo, permezz tal-kelma tal-Mulej.