Read Maltese Bible with DC – IL-BIBBJA IL-KOTBA MQADDSA 1 SAMWEL 7 Bible Online

1 SAMWEL 7 - Maltese Bible with DC – IL-BIBBJA IL-KOTBA MQADDSA bible

1 SAMWEL 7

¹U n-nies ta’ Kirjat-ġegħarim ġew u tellgħu l-arka tal-Mulej, u daħħluha f’dar Abinadab, li kienet fuq għolja, u kkonsagraw lil ibnu Elgħażar biex iħares l-arka tal-Mulej.

²Kien għadda ħafna żmien - għoxrin sena - mindu l-arka kienet waqfet f’Kirjat-ġegħarim, u d-dar kollha ta’ Iżrael bkew u daru lejn il-Mulej.

³U Samwel kellem lid-dar kollha ta’ Iżrael: “Jekk intom terġgħu lura b’qalbkom kollha għand il-Mulej, neħħu minn nofskom l-allat barranin u lil Għastarot, orbtu qalbkom mal-Mulej, u aqdu lilu biss, biex hu jeħliskom minn id il-Filistin.”

⁴U wlied Iżrael warrbu minn nofshom lill-allat Bagħlim u Għastarot, u bdew jaqdu l-Mulej waħdu.

⁵Samwel qalilhom: “Ħa jinġabar Iżrael kollu f’Misfa, biex nitlob lill-Mulej għalikom.”

⁶U huma ltaqgħu f’Misfa, imlew l-ilma u sawbuh quddiem il-Mulej[10]; u dak in-nhar samu u qalu: “Dnibna quddiem il-Mulej.” U f’Misfa Samwel sar imħallef fuq Iżrael.

⁷Il-Filistin semgħu li wlied Iżrael kienu nġemgħu f’Misfa; u l-kbarat tal-Filistin telgħu kontra Iżrael. Malli wlied Iżrael semgħu, beżgħu mill-Filistin.

⁸Ulied Iżrael qalu lil Samwel: “La tiqafx tgħajjat quddiem il-Mulej, Alla tagħna, għalina, ħalli jeħlisna minn idejn il-Filistin.”

⁹Samwel ħa ħaruf tal-ħalib u offrieh b’sagrifiċċju tal-ħruq lill-Mulej; u għajjat Samwel quddiem il-Mulej għal Iżrael, u l-Mulej semgħu.

¹⁰Ġara li meta Samwel kien qiegħed joffri s-sagrifiċċju tal-ħruq, il-Filistin resqu biex jaħbtu għal Iżrael. Dak in-nhar il-Mulej riegħed ragħda kbira kontra l-Filistin u ħarbathom; u huma tfarrku quddiem Iżrael.

¹¹U n-nies ta’ Iżrael ħarġu minn Misfa, u ħabtu għall-Filistin u għamlu ħerba minnhom sa Bet-kar.

¹²U Samwel ħa ġebla u waqqafha bejn Misfa u bejn Sen u semmieha: Eben-għeżer, u qal: “Sa hawn għenna l-Mulej.”

¹³U hekk trażżnu l-Filistin u ma baqgħux jidħlu f’art Iżrael, għax id il-Mulej kienet iżżomm il-Filistin il-jiem kollha ta’ Samwel.

¹⁴U l-ibliet kollha li kienu ħatfu l-Filistin mingħand Iżrael, reġgħu għal għand Iżrael; u l-art minn Għekron sa Gatt bl-inħawi tagħhom ħadha Iżrael minn id il-Filistin; u kien hemm il-paċi bejn Iżrael u bejn l-Amurrin.

¹⁵U Samwel kien imħallef ta’ Iżrael il-jiem kollha ta’ ħajtu;

¹⁶u minn sena għal sena kien imur u jdur Betel, Gilgal u Misfa u jagħmel il-ħaqq lil Iżrael f’dawn l-inħawi kollha.

¹⁷Imbagħad kien jerġa’ lura f’Rama, fejn kellu daru, u hemm kien jagħmel ħaqq lil Iżrael u hemm ukoll bena artal lill-Mulej.