Read kumam Génesis 1 Bible Online

Génesis 1 - kumam bible

Génesis 1

¹T-xe tnejel kub' tb'incha'n Dios kya'j ex tx'otx'.

²Minti'toq ttxolil tx'otx', ex minti'toq at twitz; attoq qlolj tib'aj mar ma' t-xe', ex in yukchtoq T-xew Dios tib'aj a'.

³Tmatzun Dios: E tb'ant spik'un. B'anttzun spik'un.

⁴O til Dios b'a'n e'la spik'un, ex el tpa'n spik'un ti'j qlolj.

⁵Q'ijl tb'i spik'un ok tq'o'n; atzun qlolj, qonik'an tb'i ok tq'o'n. Extzun jun q'ij tuk'ix jun qonik'an; ex atzun tnejel q'ij jlu.

⁶Tmatl Dios: E tb'ant jun pab'l tib' t-xol a', tu'n tel tpa'n tib' txqan a' ti'j txqantl. Iktzun tten o b'ant.

⁷Tb'incha Dios pab'l tib' t-xol a'. Txqan a' kyaj tjaq' pab'l tib', ex txqantl a' kyaj tib'aj pab'l tib'.

⁸Twitz kya'j tb'i pab'l tib' ok tq'o'n. Extzun juntl q'ij tuk'ix juntl qonik'an; ex atzun tkab'in q'ij jlu.

⁹Tmatl Dios: E tkub' tchmon tib' tuj junx lugar tkyaqil a' at tjaq' twitz kya'j, ex e tkyaj q'ancha'l aju tzqij. Iktzun tten o b'ant.

¹⁰Tx'otx' tb'i aju tzqij ok tq'o'n; atzun a' otoq kub' tchmon tib', mar tb'i ok tq'o'n. O til Dios b'a'n e'la jlu.

¹¹Tmatl Dios: E ttzaj poq'l k'ul twitz tx'otx' tuk'ix tkyaqil wiq awal in tq'o'n tiyjil, ex tze' in tq'o'n twitz ex at tiyjil tuj, teyle te junjun tiyjil. Iktzun tten o b'ant.

¹²Jaw poq'l k'ul twitz tx'otx', tuk'ix tkyaqil wiq awal in tq'o'n tiyjil, ex tze' in tq'o'n twitz ex at tiyjil tuj, teyle te junjun tiyjil. O til Dios b'a'n e'la jlu.

¹³Extzun juntl q'ij tuk'ix juntl qonik'an; atzun toxin q'ij jlu.

¹⁴Tmatl Dios: E kyb'ant q'ol spik'un twitz kya'j, tu'n tel kypa'n q'ijl ti'j qonik'an, tu'n kyajb'en te kyechal tq'ijlalil, q'ijl ex ab'q'i,

¹⁵ex tu'n kyqoptz'aj twitz kya'j, tu'n kyq'onte spik'un twitz tx'otx'. Iktzun tten o b'ant.

¹⁶Tb'incha Dios kab'e nmaq q'ol spik'un, aju q'ol spik'un mas matij tu'n t-spik'b'ante q'ijl, atzun juntl ch'in q'ol spik'un tu'n t-spik'b'ante qonik'an. Ax ikx tb'incha qe che'w.

¹⁷E ok tq'o'n Dios twitz kya'j tu'n kyq'onte spik'un twitz tx'otx'

¹⁸q'ijl ex qonik'an, ex tu'n tel kypa'n spik'un ti'j qlolj. O til Dios b'a'n e'la jlu.

¹⁹Extzun juntl q'ij tuk'ix juntl qonik'an; ex atzun tkyajin q'ij jlu.

²⁰Tmatl Dios: E kypoq'l nim kyajlal txkup tu'n kyyukch tuj a', ex e kypoq'l chyu'j ex txqantl jil tu'n kylipan twitz kya'j.

²¹Tb'inchatzun Dios qe nmaq txkup tuj mar ex kykyaqil qe jil nim kyajlal in che yukch tuj, aqeju ax e poq'l tuj mar, teyle te junjun tiyjil, ax ikx qe chyu'j ex qe txqantl txkup in che lipan twitz kya'j, teyle te junjun tiyjil. O til Dios b'a'n e'la jlu.

²²E kub'tzun tky'iwla'n ex tma kyja': Che poq'lxe, chmet-x kyb'aje ex kynojsame mar; ex e tchmet kyb'aj chyu'j twitz tx'otx' ex txqantl jil in che lipan twitz kya'j, chi Dios.

²³Extzun juntl q'ij tuk'ix juntl qonik'an; ex atzun tjwe'yin q'ij jlu.

²⁴Tmatl Dios: E kypoq'l alumaj twitz tx'otx', teyle te junjun tiyjil, ex txkup in xi kyjaqu'n kyk'u'j twitz tx'otx', ex txqantl txkup ate' twitz tx'otx', teyle te junjun tiyjil. Iktzun tten o b'ant.

²⁵Tb'incha Dios qe txkup twitz tx'otx', teyle te junjun tiyjil, qe alumaj, teyle te junjun tiyjil, ex kykyaqil txkup in xi kyjaqu'n kyk'u'j twitz tx'otx', teyle te junjun tiyjil. O til Dios b'a'n e'la jlu.

²⁶Tmatl Dios: Qb'inchan kub' xjal ik tza'nx qe qilb'ilal, ik tza'nx qe qo ke'yin, ex e tten tkawb'il kyib'aj kyiẍ tuj mar, kyib'aj chyu'j ex txqantl jil in che lipan twitz kya'j, kyib'aj alumaj, tib'aj tkyaqil twitz tx'otx', ex kyib'aj txkup in xi kyjaqu'n kyk'u'j twitz tx'otx'.

²⁷Kub'tzun tb'incha'n Dios xjal ik tza'nx te tilb'ilal, ik tza'nx tilb'ilal Dios kub' tb'incha'n; xinaq ex xu'j e kub' tb'incha'n.

²⁸E kub'tzun tky'iwla'n ex xi tma'n kye kyja': Che k'wa'line, chmet-x kyb'aje, kynojsame twitz tx'otx' ex che kawine tib'aj. Kb'el ten kykawb'ile kyib'aj kyiẍ tuj mar, kyib'aj chyu'j ex txqantl jil in che lipan twitz kya'j, ex kyib'aj kykyaqil txkup ate' twitz tx'otx'.

²⁹Tmatltzun Dios kye kyja': Ma txi nq'o'ne kyeye tkyaqil awal in tq'o'n tiyjil, aju tkub' tuj tkyaqil twitz tx'otx', ex tkyaqil tze' in tq'o'n twitz ex at tiyjil tuj. Atzun kxe'l kynik'b'e'ne.

³⁰Atzun kye kykyaqil txkup ate' twitz tx'otx', kyuk'ix qe chyu'j ex txqantl jil in che lipan twitz kya'j, kyuk'ix qeju in xi kyjaqu'n kyk'u'j twitz tx'otx', kykyaqil qeju itz' qe, cha'x k'ul k'okel te kywa, chi Dios. Iktzun tten o b'ant.

³¹O til Dios tkyaqilju otoq b'ant tu'n, tb'anilxix tkyaqil. Extzun juntl q'ij tuk'ix juntl qonik'an; ex atzun tqaqin q'ij jlu.