Read kumam Génesis 11 Bible Online

Génesis 11 - kumam bible

Génesis 11

¹Tuj tq'ijlalil ojtxi junx yol b'a'n kyu'n kykyaqil xjal twitz tx'otx'.

²Tej kyetz xjal tuj tjawitz q'ij o knet jun chq'ajlaj kyu'n tuj tx'otx' Sinar, ex axtzun e najan.

³E oktzun ten yolil kyxolx ex kyma kyja': Qo', qb'inchan kub' lagriy, ex qq'o'nkx tuj q'aq' tu'n ttzq'ajset, che chi. Ajb'entzun lagriy te t-xel ab'j, atzun asfalt ajb'en kyu'n te t-xel mescla.

⁴Kymatltzun kyja': Qb'inchan jaw jun tnam ex jun ja ma'xix twa'l ex japun pon twa'l max twitz kya'j, tu'n tkyaj jun nab'l qe, ex tu'n mi'n qel sputj twitz tx'otx', che chi.

⁵Ku'tztzun Qman ke'yilte aju tnam ex aju ja ma'xix twa'l in b'anttoq kyu'n qe xjal.

⁶Tmatzun kyja': Lu qe xjal lu junx kytanmi, ax ikx junx yol b'a'n kyu'n; ma tzyet aq'untl lu kyu'n ex mlay che mayet ti'j ju in kub' kyximan tu'n kyb'inchante.

⁷Ja'lotzun qo', qo ku'x tzpet-salte kyyol tu'ntzun mi'n tel tnik' jun ti'j tyol juntl, chi Qman.

⁸Iktzun tten e el t-sputun Qman qe xjal tuj tkyaqil twitz tx'otx', ex kyaj kykolin aq'untl ti'j tnam.

⁹Tu'ntzun jlu, Babel tb'i tnam ok, tu'nju atzun kub' ttzpet-sa'n Qman kyyol kykyaqil xjal. Tujtzun tnam lu e je'l t-sputun tuj tkyaqil twitz tx'otx'.

¹⁰Atzun tx'olb'ab'l jlu kyi'j tiyjil Sem. Otoq japun Sem twi' jun syent ab'q'i tej tul itz'j Arfaxad aju tky'ajal, kab'e ab'q'i tik'len q'eqab'.

¹¹Titz'jlenxi Arfaxad, anq'intl Sem jwe' syenttl ab'q'i, ex tzajtzun txqantl tky'ajal ex tme'jel.

¹²Otoq japun Arfaxad twi' 35 ab'q'i tej tul itz'j Sala aju tky'ajal.

¹³Titz'jlenxi Sala, anq'intl Arfaxad 403 ab'q'i, ex tzajtzun txqantl tky'ajal ex tme'jel.

¹⁴Otoq japun Sala twi' 30 ab'q'i tej tul itz'j Heber aju tky'ajal.

¹⁵Titz'jlenxi Heber, anq'intl Sala 403 ab'q'i, ex tzajtzun txqantl tky'ajal ex tme'jel.

¹⁶Otoq japun Heber twi' 34 ab'q'i tej tul itz'j Peleg aju tky'ajal.

¹⁷Titz'jlenxi Peleg, anq'intl Heber 430 ab'q'i, ex tzajtzun txqantl tky'ajal ex tme'jel.

¹⁸Otoq japun Peleg twi' 30 ab'q'i tej tul itz'j Reu aju tky'ajal.

¹⁹Titz'jlenxi Reu, anq'intl Peleg 209 ab'q'i, ex tzajtzun txqantl tky'ajal ex tme'jel.

²⁰Otoq japun Reu twi' 32 ab'q'i tej tul itz'j Serug aju tky'ajal.

²¹Titz'jlenxi Serug, anq'intl Reu 207 ab'q'i, ex tzajtzun txqantl tky'ajal ex tme'jel.

²²Otoq japun Serug twi' 30 ab'q'i tej tul itz'j Nacor aju tky'ajal.

²³Titz'jlenxi Nacor, anq'intl Serug kab' syenttl ab'q'i, ex tzajtzun txqantl tky'ajal ex tme'jel.

²⁴Otoq japun Nacor twi' 29 ab'q'i tej tul itz'j Taré aju tky'ajal.

²⁵Titz'jlenxi Taré, anq'intl Nacor 119 ab'q'i, ex tzajtzun txqantl tky'ajal ex tme'jel.

²⁶Otoq japun Taré twi' 70 ab'q'i tej tul itz'j Abram, Nacor ex Harán, aqeju tky'ajal.

²⁷Atzun tx'olb'ab'l jlu kyi'j qe tiyjil Taré. Ate Taré tman Abram, Nacor ex Harán, ex ate Harán tman Lot.

²⁸Nej kyim Harán twitz tman tujx tx'otx' jatum ul itz'j, tuj tnam Ur kyxol qe aj Caldeo.

²⁹Moje'tzun Abram tuk'il Sarai, atzunte Nacor moje' tuk'il Milca aju tme'jel Harán ex tanb' Isca.

³⁰Minti'toq tal Sarai tu'nju mib'antoq alin.

³¹Etztzun Taré tuj tnam Ur kyxol qe aj Caldeo tu'n tul tuj tx'otx' Canaán, ex tzaj tuk'in Abram aju tky'ajal, tuk'ix Lot aju tal tchman ex tky'ajal Harán, ex tuk'ix Sarai aju tlib'. Tejtzun kyul tuj tnam Harán, axtzun e kyaj ten najal.

³²Japun Taré twi' 205 ab'q'i, ex kyim ax tuj tnam Harán.