Read kumam Génesis 12 Bible Online

Génesis 12 - kumam bible

Génesis 12

¹Tma Qman te Abram kyja': Tetza tuj ttanmiya, kyxol qe t-xjalila ex tuj tja tmana, ex txi'ya tuj tx'otx' kxel nyek'une teya.

²Ti'ja kb'el nb'incha'ne jun nasyon ma'xix, kb'el nq'o'ne nky'iwb'ile tib'aja, kjawil nnimsa'ne tb'iya, ex k'okela te jun ky'iwb'il kye txqantl xjal.

³Che b'el nky'iwla'ne qeju che b'el ky'iwlante teya, ex ktzajel nq'o'ne mya b'a'n kyib'aj qeju che tzajel qaninte mya b'a'n tib'aja; ex noq ti'ja che ky'iwlanjtzel kykyaqil xjal twitz tx'otx', chi Qman.

⁴Etztzun Abram tuj tnam Harán ik tza'nx otoq tma Qman te; ex tuk'ix Lot etz tuk'il. Otoq japun Abram twi' 75 ab'q'i tej tetz tuj tnam Harán.

⁵Tzaj ti'n Sarai tuk'il, aju t-xu'jil, tuk'ix Lot aju tky'ajal terman, ex xi kyi'n tkyaqil kyq'inumab'l aju otoq knet kyu'n, kyuk'ix qe kymajen aqeju otoq che knet tuj tnam Harán. Kub'tzun b'e kyu'n tu'n kyul tuj tx'otx' Canaán, ex tuj tx'otx' Canaán e ul.

⁶Tzajtzun b'et Abram tuj tx'otx' lu ex ul tuj Siquem, kanun t-xe' jun wi' tze' k'ol tuj lugar More. Tuj tq'ijlalil lu atzun najltoq qe aj Canaán.

⁷Atzun kub' tyek'un tib' Qman twitz Abram ex xi tma'n te kyja': Atzun tx'otx' lu kxel nq'o'ne kye tiyjila, chi Qman. Tujtzun lugar lu jaw tb'incha'n Abram jun altar twitz Qman aju kub' tyek'un tib' twitz.

⁸Ik'tzun tuj lugar lu tu'n tul twi' jun witz ttxlaj tnam Betel tuj tjawitz q'ij. Atzun kub' tq'o'n tja, xb'alun ja, t-xol kab'e tnam; atzun tkub' tnam Betel tuj telex q'ij, atzunte tnam Hai tkub' tuj tjawitz q'ij. Tujtzun lugar lu jaw tb'incha'n Abram juntl altar tu'n tk'ulun te Dios, ex o kub'san twitz Qman.

⁹Tzajtzun b'et Abram tuj lugar lu tu'n tul tuj tx'otx' Néguev.

¹⁰Tujtzun tq'ijlalil lu tzaj nim we'yaj tuj tx'otx' Canaán. Xi'tzun Abram tuj Egipto tu'n tnajan nik'xi q'ij ma chixin, tu'nju nimxix we'yaj tzaj jatum najltoq.

¹¹Tejtzun ch'ixtoq tpon tuj Egipto xi tma'n te Sarai aju t-xu'jil: B'a'n wu'ne tb'anilxix ke'yina,

¹²ex ok tok ke'yina kyu'n qe aj Egipto oklo kyma': T-xu'jil xinaq lu aju xu'j lu, che chilo. Oklo chin b'el b'yo'ne kyu'n, atzun teya mlay kub' b'yo'na kyu'n.

¹³Tu'ntzun jlu, b'inchama xtalb'il, b'ix txi tma'na: Tanb' xjal lu qine, chikuya, tu'ntzun ntene b'a'n ex tu'n mi'n nkub' b'yo'ne tu'n tlaja.

¹⁴Tejtzun tpon Abram tuj Egipto, ok kyke'yin qe aj Egipto tb'anilxix ke'yin t-xu'jil.

¹⁵Ax ikx ok kyke'yin qe aj sanjelal ate'k ttxlaj Faraón. E je'xtzun q'malte te: Tb'anilxix ke'yin xu'j lu, che chi. Xitzun kyi'n tuj tja Faraón.

¹⁶Tu'n tlaj Sarai tb'incha Faraón nimxix xtalb'il te Abram, ex xi tq'o'n qe ẍne'l te, kyuk'ix wakẍ, bur, chej camey, majen xinaq ex majen xu'j.

¹⁷Ex tu'n tlaj Sarai kub' tcastiw Faraón tu'n Qman, ex kyuk'ix qeju ate'toq tuj tja, tzaj nimxix yab'il kyi'j.

¹⁸Tzajtzun ttxko'n Faraón Abram ex xi tma'n te kyja': ¿Tiqu'n ma tb'inchaya jlu wi'je? ¿Tiqu'n mi tzaj tma'na weye qa t-xu'jila aju xu'j lu?

¹⁹¿Tiqu'n o tmaya qa tanb'a xu'j lu? Kyja'tzun tzaj wi'ne tu'n tok te nxu'jile. Ja'lotzun, lu t-xu'jila lu. Q'inxa ex txi'ya, chi Faraón.

²⁰Xitzun tma'n Faraón kye t-xjalil tu'n tex kyi'n Abram tuj Egipto junx tuk'il t-xu'jil ex tkyaqilju attoq te.