Read kumam Génesis 14 Bible Online

Génesis 14 - kumam bible

Génesis 14

¹Tuj tq'ijlalil lu toktoq Amrafel te rey tuj Sinar, atzunte Arioc toktoq te rey tuj Elasar, atzunte Quedorlaomer toktoq te rey tuj Elam ex atzunte Tidal toktoq te rey tuj Goím.

²Aqe jlu e q'ojin ti'j Bera rey te tnam Sodoma, ti'j Birsa rey te tnam Gomorra, ti'j Sinab rey te tnam Adma, ti'j Semeber rey te tnam Seboím ex ti'j rey te tnam Bela (aju ax juntl tb'i Zoar).

³Aqeju jwe' rey lu ok kychmon kyib' kyuk'ix qe kysoldad tuj chq'ajlaj Sidim, jatum ta' mar at nim atz'an tuj.

⁴Ate rey Quedorlaomer otoq kawin kab'laj ab'q'i kyib'aj, ex tuj toxlajin ab'q'i jaw kyi'n kyib' tu'n kyq'ojin ti'j.

⁵Tuj juntl ab'q'i tzaj Quedorlaomer kyuk'ix qe txqantl rey mojl kyyol tuk'il. Kub' kyi'j aj Refaim kyu'n tuj Astarot Karnaim, kub' kyi'j aj Zuzim kyu'n tuj Ham, kub' kyi'j aj Emim kyu'n tuj Save-quiriataim,

⁶ex kub' kyi'j aj Horeo kyu'n tuj tiwitz tx'otx' Seir, ul b'aj max tuj chq'ajlaj Parán aju tkub' ttxa'n tzqij tx'otx'.

⁷Ajtzun meltz'aj Quedorlaomer kyuk'ix qe tuk'il, ex e pon tuj En-mispat, ex ax juntl tb'i Cades. Tkyaqil b'aj naj kyu'n tuj kytx'otx' aj Amalec, ax ikx kyb'incha kyi'j aj Amorreo, aqeju najltoq tuj Hazezon-tamar.

⁸Ultzun rey te Sodoma tuj chq'ajlaj Sidim, tuk'ix rey te Gomorra, rey te Adma, rey te Seboím ex rey te Bela (aju ax juntl tb'i Zoar), ex atzun tzyet q'oj kyu'n.

⁹E q'ojin qeju jwe' rey kyi'j qe kyaje rey lu: Quedorlaomer rey te Elam, Tidal rey te Goím, Amrafel rey te Sinar ex Arioc rey te Elasar.

¹⁰Tejtzun tel oq rey te Sodoma tuk'ix rey te Gomorra, e ku'x tz'aq junjun kyuj qe jul nojni tu'n asfalt, aqeju ate'toq tuj tkyaqil chq'ajlaj Sidim. Atzun qe txqantl e jax oq twi witz.

¹¹Qeju e kamb'an xi kyi'n tkyaqil kywa ex tkyaqil kyq'inumab'l aj Sodoma ex aj Gomorra, ex e ik'tzun.

¹²Tuk'ix Lot xi kyi'n pres, aju tky'ajal terman Abram, tu'nju najltoq tuj Sodoma, ax ikx xi kyi'n tkyaqilju attoq te.

¹³Jun xinaq otoq tzoqpaj tuj q'oj, ul q'malte te Abram aju aj Hebreo ti'j tkyaqilju otoq b'aj. Atzun najltoq Abram kyjaq' qe tze' k'ol tuj ttx'otx' Mamre aju aj Amorreo. Ate Mamre terman Escol ex Aner. Aqe jlu mojl kyyol tuk'il Abram.

¹⁴Tejtzun tb'inte Abram otoq tz'okx presin tky'ajal terman, e b'aj tchmo'n qe tmajen aqeju ax e itz'j tuj tkwent. Tu'n tkyaqil 318 kyb'et qe tmajen, ex kykyaqil qe jlu e je'x lpe' kyi'j qe rey tejxi kypon tuj tnam Dan.

¹⁵Te qonik'an ok tzoqpaj Abram kyuk'ix qe t-xjalil q'ojlel kyi'j qe rey; kub' kyi'j tu'n ex ok lpe' kyi'j tejxi kypon tuj Hoba, aju tkub' tuj tumlal tb'anq'ab' q'ij te tnam Damasco.

¹⁶El ti'n tkyaqil q'inumab'l otoq txi kyi'n qe rey. Tuk'ix Lot kolpet tu'n, aju tky'ajal terman. El ti'n kye rey tkyaqil tq'inumab'l Lot. Ax ikx qe xu'j ex qe txqantl xjal e kolpet tu'n.

¹⁷Tej tajtz Abram tkub'lenxi ti'j Quedorlaomer tu'n, kyuk'ix qe rey ate'toq tuk'il, etztzun rey te Sodoma k'molte Abram tuj chq'ajlaj Save (aju ax juntl tb'i Tchq'ajlaj Rey).

¹⁸Ate Melquisedec rey te Salem ex pal te Dios, aju Dios Ma'xix Toklen, ul ti'n pan ex ta'l twitz uva.

¹⁹Kub' ky'iwla'n Abram tu'n, chi kyja': Ky'iwla'nxwit Abram tu'n Dios, aju Dios Ma'xix Toklen, aju b'inchante kya'j ex tx'otx';

²⁰ex nimanxwit Dios, aju Dios Ma'xix Toklen, aju tzaj q'onte qe aj q'oj ti'ja tuj tq'ab'a, chi Melquisedec. Ex xi tq'o'n Abram te Melquisedec tlaji'n ti'j tkyaqilju otoq tz'el ti'n kye rey.

²¹Aju rey te Sodoma tzaj tma'n te Abram kyja': —Q'ontza qe xjal weye, atzun teya, q'inkja qe q'inumab'l.

²²Atzunte Abram xi ttzaq'we'n kyja': —O txi ntziyane te Nmane, aju Dios Ma'xix Toklen, aju b'inchante kya'j ex tx'otx':

²³Mlay txi wi'ne jun noq', mi jun taq'al xjab' ex mi jun ti'xti teya, tu'ntzun mi'n tmanteya kyja': Wu'ne o tz'ok Abram q'inun.

²⁴Noq o'kx ok nk'maye aju b'aj kywa'n qe majen. Ex qe xinaq ẍe'x aj wuk'ile: Aner, Escol ex Mamre, b'a'n tu'n kyk'monte aju at kyoklen ti'j.