Read kumam Génesis 16 Bible Online

Génesis 16 - kumam bible

Génesis 16

¹Mib'antoq alin Sarai aju t-xu'jil Abram, ex attoq jun tmajen, jun xu'j aj Egipto Agar tb'i.

²Xitzun tma'n Sarai te Abram: B'a'n wu'ne, tu'n Qman mib'an chin aline. Chin kub'sale twitza tkub' moje'ya tuk'il nmajene xu'j, qape jaku che tzaj wale ti'j, chi Sarai. Xitzun tniman Abram tyol Sarai aju t-xu'jil.

³Tzajtzun ti'n Sarai aju tmajen xu'j, aju aj Egipto, Agar tb'i, ex xi tq'o'n te Abram tu'n tjaw t-xu'jla'n. Otoq b'ant laj ab'q'i tkub'len ten Abram najal tuj tx'otx' Canaán.

⁴Kub'tzun tan Abram tuk'il Agar ex ok ten tal Agar. Tejtzun tna'nte Agar otoq tz'ok ten tal, ok ten ik'ul ti'j Sarai aju tpatrón.

⁵Tmatzun Sarai te Abram kyja': —Tu'n tlaja ma chin el ik'une tu'n Agar. Ax qine inx q'onte nmajene teya tu'n tok te t-xu'jila, tejtzun ma til ma tz'ok ten tal, ma chin el ik'une tu'n. E tmante Qman alkye at til, qa aqine ex qa aya, chi Sarai.

⁶Xitzun ttzaq'we'n Abram te kyja': —Tuj tkwenta ta' tmajena. B'inchama ti'j alkye b'a'n tuj twitza, chi Abram. Oktzun ten Sarai yajlal te Agar. Tu'ntzun jlu el oq Agar.

⁷Ok noj aju t-anjel Qman ti'j tuj tzqij tx'otx', niqayin jatum nne'tz jlet jun a' tuj tb'eyil Shur.

⁸Xitzun tqanin anjel te: —Aya Agar tmajen Sarai: ¿Jatum saja, ex jatum ma txi'ya? Ajtzun ttzaq'we'n Agar: —Ma chin el oqe twitz npatrone Sarai.

⁹Xitzun tma'n t-anjel Qman te: —Taj meltz'aja tuk'il tpatrona ex nimanxa tuj tkyaqil.

¹⁰Xi tma'ntl t-anjel Qman te kyja': Kchmetel nimxix tiyjila wu'ne, ex mi a'l jun kb'antel tajlante kye.

¹¹O tz'ok ten tala ex tzul itz'j jun tala xinaq. Ismael tb'i k'okel tq'o'na tu'nju o tb'i Qman aju yajb'il teya.

¹²Ate jlu k'okel te jun xinaq tx'u'j twi'; kq'ojlel kyi'j kykyaqil xjal, ex che q'ojlel kykyaqil xjal ti'j, ex part knajal kyi'j kykyaqil terman, chi Dios.

¹³Oktzun tq'o'n Agar tb'i Qman aju in yolintoq tuk'il: Aya Dios in chin tke'yin, porke tma: Ma wile tzalu aju in ke'yinte weye.

¹⁴Tu'ntzun jlu ok tq'o'n tb'i xoch lu: Beer-lahai-roi.[4] Aju xoch lu, atzun tkub' t-xol Cades ex Bered.

¹⁵Ultzun itz'j jun tal Agar, tky'ajal Abram, ex Ismael tb'i ok tq'o'n Abram.

¹⁶Otoq japun Abram twi' 86 ab'q'i tej tul itz'j Ismael aju tal Agar.