Read kumam Génesis 17 Bible Online

Génesis 17 - kumam bible

Génesis 17

¹Otoq japun Abram twi' 99 ab'q'i tej tkub' tyek'un tib' Qman twitz ex tma te kyja': Aqine Dios aju at wipumale tu'n tb'ant tkyaqil wu'ne. B'eta nwitze minti' tpaltila.

²Kyjel b'ant ti'j nyole tuk'ila, ex kchmetel nimxix kyajlal tiyjila wu'ne, chi Qman.

³Kub'tzun ẍmeje' Abram ex pon takl tib'aj twitz max twitz tx'otx'. Kukx o yolin Dios tuk'il, chi kyja':

⁴Aju yol kyjel b'ant ti'j wu'ne tuk'ila, atzun jlu: K'okela te kyman nimku nasyon.

⁵Mi'n tz'oktl tb'iya Abram.[5] Texju ja'lo, Abraham[6] tb'iya k'okel, tu'nju ma tz'ok nq'o'ne te kyman nimku nasyon.

⁶Che chmetel nimxix kyajlal tiyjila wu'ne; ti'j tiyjila che elel jlet rey ex qe nasyon.

⁷Te jumajx kyjel b'ant ti'j nyole tuk'ila ex kyuk'il tiyjila che ul itz'j te tib'ajxi, ex te jumajx ax qine Tdiosa ex Kydios tiyjila.

⁸Tkyaqil tx'otx' Canaán jatum najla ja'lo ik tza'n b'etin xjal kxel nq'o'ne teya ex kye tiyjila tu'n tok te kyetzb'ile te jumajx, ex chin okele te Kydios.

⁹Ax ikx tmatl Dios te Abraham kyja': Aju yol kyjel b'ant ti'j wu'ne tuk'ila, japunxtzun tu'na ex kyu'n qe tiyjila che ul itz'j te tib'ajxi.

¹⁰Aju yol kyjel b'ant ti'j wu'ne kyuk'ile ex aju il ti'j kjapunel kyu'n kykyaqil tiyjila che ul itz'j te tib'ajxi, atzun jlu: Kykyaqil xinaq ate' kyxole il ti'j tu'n kysircunsidarinjtz.

¹¹K'eleltzun kyqesine ttz'umal twi kytz'a'lb'ile, k'ajb'eltzun te jun techal ti'j yol otoq kyaj b'ant ti'j wu'ne kyuk'ile.

¹²Wajxaq q'ij tul-len itz'j teyle te junjun q'a kyxole ex kyxol qe tiyjila che ul itz'j te tib'ajxi, kb'ajel kysircunsidarine, tza'nx qe q'a che ul itz'j tuj kykwente, ax ikx qe majen laq'o'n tu'n pwaq kyuk'il stranjer xjal, aqeju mya t-xjalila.

¹³Tza'nx qeju che ul itz'j tuj kykwente, ax ikx qeju laq'o'n tu'n kypwaqe, che b'ajel kysircunsidarine. Atzun jun techal ti'j kychib'jale ti'j ju yol te jumajx xkyaj b'ant ti'j wu'ne kyuk'ile.

¹⁴Atzun teju xinaq minti' ma sircunsidarinjtz, b'i'x k'elex lajet tu'ntzun mi'n ttentl kyxol t-xjalil, tu'nju otoq tzik' tib'aj nyole aju otoq kyaj b'ant ti'j.

¹⁵Ax ikx tmatl Dios te Abraham kyja': Aju t-xu'jila mi'n tz'ok tq'o'ntla tb'i Sarai. Texju ja'lo Sara[7] tb'i k'okel.

¹⁶Kb'el nky'iwla'ne Sara ex tzul itz'j jun tky'ajala ti'j. Ax tok kb'el nky'iwla'ne. Ate xu'j lu k'okel te kytxu' nimku nasyon, ex kyi'j tiyjil che elel jlet rey kyib'aj tnam, chi Dios.

¹⁷Kub'tzun ẍmeje' Abraham, pon takl tib'aj twitz max twitz tx'otx', jaw tze'n, ex kub' t-ximan tuj tanmi kyja': ¿Jakupe tzaj tk'wa'l jun xinaq otoq tz'el twi' jun syent ab'q'i? ¿Jakupe tzaj jun tal Sara o tz'el twi' 90 ab'q'i?

¹⁸Xitzun tma'n Abraham te Dios kyja': —Kuchiwt tz'anq'in Ismael tjaq' t-xtalb'ila.

¹⁹Tzajtzun ttzaq'we'n Dios te kyja': —Ax tok tzul itz'j jun tky'ajala ti'j Sara aju t-xu'jila, ex Isaac[8] tb'i k'okel tq'o'na. Te jumajx kyjel b'ant ti'j nyole tuk'il ex kyuk'il qe tiyjil che ul itz'j te tib'ajxi.

²⁰Ax ikx ma nb'iye tqanb'etza ti'j Ismael. Kb'el nky'iwla'ne, che chmetel qe tk'wa'l wu'ne ex che chmetel nim kyajlal tiyjil. Che ulel itz'j kab'laj tk'wa'l Ismael, che okel jlu te nejenel nim kyoklen, ex kb'antel jun matij nasyon wu'ne kyi'j tiyjil.

²¹Atzun kyjel b'ant ti'j nyole tuk'il Isaac, aju ktzajel talin Sara tuj tq'ijlalil lu tuj juntl ab'q'i, chi Dios te Abraham.

²²B'ajtzun yolin Dios tuk'il Abraham, eltzun tpa'n tib' ti'j.

²³Axtzun q'ij lu b'aj t-sircunsidarin Abraham aju tky'ajal Ismael tb'i, ex kykyaqil qe majen otoq che ul itz'j tuj tkwent ex qeju otoq che tloq' tu'n tpwaq; kykyaqil xinaq najltoq tuj tja e b'aj t-sircunsidarin ik tza'nx otoq tma Dios te.

²⁴Otoq japun Abraham twi' 99 ab'q'i tej tel tqesin ttz'umal twi ttz'a'lb'il.

²⁵Atzunte Ismael aju tky'ajal otoq japun twi' oxlaj ab'q'i.

²⁶Ax q'ij sircunsidarinjtz Abraham tuk'ix Ismael aju tky'ajal,

²⁷kyuk'ix kykyaqil qe xinaq ate'toq tuj tkwent, tza'nx qe majen e ul itz'j tuj tkwent, ax ikx qeju otoq che laq'et tu'n tu'n tpwaq kyuk'il stranjer xjal.