Read kumam Génesis 18 Bible Online

Génesis 18 - kumam bible

Génesis 18

¹Kub' tyek'un tib' Qman twitz Abraham kyjaq' tze' k'ol tuj ttx'otx' Mamre. Q'uqltoq Abraham ttzi tja xb'alun ja, tej nimtoq kyaq, tb'ajlen chilkuq'ij.

²Xitzun tke'yin Abraham ex o til ox xinaq wa'l kykub' twitz. Tejtzun tke'yinte Abraham qe xinaq lu, jurat naj jaw we' k'molte kye, kub' ẍmeje', pon takl tib'aj twitz max twitz tx'otx',

³ex tma kyja': —Tat, qa ma knet xtalb'il wu'ne tuj twitza, chin kub'sale twitza, mi'n tz'aj naja tuj njaye, aqine tmajena.

⁴E ttzaj q'it ch'in a' tu'n tel tx'jet kyi'j kyqane, ex che ojlane tjaq' t-xlekumal tze' lu.

⁵Ktzajel wi'ne ch'in kywaye tu'ntzun toktl kyipune, ex tb'ajlenxi kywaye, jakutzun tzyettl kyb'eye. Atzun til ma che ule wuk'ile, aqine kymajene, chi Abraham. Tzaj kytzaq'we'n qe xinaq: —B'inchama ik tza'n ma tmaya, che chi.

⁶Okxtzun naj Abraham tuj tja ex xi tma'n te Sara: —Jurat-x q'intza ox malb'il harin aju tb'anil, xyoq'in b'aja, ex b'inchama junjun pan, chi Abraham.

⁷Jurat naj xi ojqelan Abraham jatum ate'toq twakẍ, etz tjyo'n aju tal wakẍ mas tb'anil ex xi tq'o'n te jun tmajen. Atzunte jlu, jurat naj b'aj tb'incha'n.

⁸Ax ikx tzaj ti'n Abraham kyes ex lech tuk'ix chib'j otoq tzq'aj, ex kub' tq'o'n kywitz. Ax o kub' we' kytxlaj tej in che wa'ntoq tjaq' tze'.

⁹Tzajtzun kyqanin te kyja': —¿Jatum ta' Sara aju t-xu'jila? Atzun te xi ttzaq'we'n kye: —Max ta' tuj ja.

¹⁰Tmatzun jun kyxol qe ox xinaq kyja': —Tuj juntl ab'q'i chin ultle tuk'ila, ex tzul itz'j jun tal Sara aju t-xu'jila, chi xinaq. Atzunte Sara in b'intoq ti'j yol, tajsa'ntoq ti'jxi Abraham ttzi ja.

¹¹Otoq che tijin Abraham tuk'ix Sara ex otoq we' ttxjon Sara ik tza'nx in b'aj kyi'j xu'j teyle junjun xjaw.

¹²Tu'ntzun jlu xi ttze'n Sara tuj tanmi ex kub' t-ximan kyja': ¿Axpelo tok tzul itz'j jun wale, porke ma chin tijine ax ikx te nchmile ma tijin?

¹³Tmatzun Qman te Abraham: —¿Tiqu'n ma jaw tze'n Sara ex ma tma kyja': Axpelo tok tzul itz'j jun wale ex ma chin tijine?.

¹⁴¿Atpelo jun ti'xti kyuw mlay b'ant wu'ne? Tuj tq'ijlalil b'animaj ti'j chin ultle tuk'ila ex tzul itz'j jun tal Sara, chi Qman.

¹⁵Tzaj t-xob'il Sara ex kub' tewan. —Minti'we ma chin jaw tze'n, chi Sara. Tzajtzun ttzaq'we'n Qman te kyja': —Mi'n. B'a'n wu'ne ma jaw tze'na, chi Qman.

¹⁶E jawtzun we' qe xinaq, tzyet kyb'e ex xi kyke'yin tumlal tnam Sodoma. Xi b'et ch'in Abraham kyuk'il tu'n kyb'aj kyq'olb'en kyib'.

¹⁷Tmatzun Qman: ¿Kb'elpelo wewane twitz Abraham aju kb'antel wu'ne?

¹⁸Ax tok k'okel Abraham te jun nintz nasyon ex nim tipun, ex ti'j che b'el nky'iwla'ne kykyaqil xjal twitz tx'otx'.

¹⁹O jaw nsk'o'ne tu'n t-xi tma'n kye tk'wa'l ex kye tiyjil tu'n tkub' kyb'i'n qe nxnaq'tzb'ile, ex tu'n kyb'inchante aju b'a'n ex tz'aqlxix, tu'ntzun tjapun wu'ne tkyaqilju o txi ntziyane te, chi Qman.

²⁰Tzajtzun tma'n Qman te kyja': —Ma nb'iye tqanil ti'j tkyaqil mya b'a'n in kyb'incha'n qe aj Sodoma ex qe aj Gomorra, ex kyja' tch'iy nimxix kyil.

²¹Tu'ntzun jlu chin b'elexe ke'yilte ja'lo, ex ok wila'ye qa ax tok o chmet mya b'a'n ik tza'n o nb'iye, ex qa mi'n. Atzun k'elel nnik'e ti'j, chi Qman.

²²Kub'tzun b'e kyu'n qe kab'e xinaq tu'n kypon tuj Sodoma, atzunte Abraham ax kyaj we' twitz Qman.

²³Xi laq'e' ch'intl Abraham ttxlaj ex xi tma'n te kyja': —¿Che najelpe qe xjal tz'aqlxix tu'na junx kyuk'il qe b'inchal mya b'a'n?

²⁴¿Yajtzun qa ma knet 50 xjal tz'aqlxix tuj tnam? ¿Knajelpe tnam tu'na? ¿Mlaype kub' tnajsa'na til tu'n tk'ujlalila kyi'j 50?

²⁵Mya tuj tumel tu'n kykub' tb'yo'na qe xjal tz'aqlxix junx kyuk'il qe b'inchal mya b'a'n, ex tu'n tb'inchanteya kyi'j qe tz'aqlxix ik tza'nx kyi'j b'inchal mya b'a'n. Mi'n tb'inchaya ikju. Aya jwes kyib'aj kykyaqil xjal twitz tx'otx', ¿mlaype tb'inchaya aju tz'aqlxix? Chi Abraham.

²⁶Tzajtzun ttzaq'we'n Qman te kyja': —Qa ma knet 50 xjal tz'aqlxix wu'ne tuj Sodoma, kb'el nnajsa'ne kyil kykyaqil qeju najl ma chixin tu'n nk'ujlalile kyi'j 50.

²⁷Xitzun tma'n Abraham juntl maj: —Nman, najsama tu'nju nno'kx nq'on wib'e tu'n nyoline tuk'ila ikju, maske weye tquqil tx'otx' qine.

²⁸B'alo atx jwe'tl tu'n ttz'aqet 50 xjal tz'aqlxix. ¿Kb'elpe t-xituna tkyaqil tnam tu'nju jwe'tl minti' ma tz'aqet? Tzajtzun ttzaq'we'ntl Qman: —Mlay kub' nxitune tnam qa ma knet 45 xjal tz'aqlxix wu'ne.

²⁹Xitzun tma'n Abraham juntl maj: —¿Yajtzun qa ma knet noq 40 xjal tz'aqlxix ma chixin? Tzajtzun ttzaq'we'ntl Qman: —Mlay kub' nxitune, tu'n nk'ujlalile kyi'j 40.

³⁰Xitzun tma'n Abraham juntl maj: —Nman, chin kub'sale twitza, mi'n jaw q'ojla wi'je qa kukx in chin yoline. ¿Yajtzun qa ma knet noq 30 xjal tz'aqlxix ma chixin? Tzajtzun ttzaq'we'ntl Qman: —Mlay kub' nxitune qa ma knet 30 xjal tz'aqlxix wu'ne.

³¹Xitzun tma'n Abraham juntl maj: —Nman, najsama tu'nju nno'kx nq'on wib'e tu'n nyoline tuk'ila ikju. ¿Yajtzun qa ma knet noq winqin xjal tz'aqlxix ma chixin? Tzajtzun ttzaq'we'ntl Qman: —Mlay kub' nxitune, tu'n nk'ujlalile kyi'j winqin.

³²Xitzun tma'n Abraham juntl maj: —Nman, chin kub'sale twitza, mi'n jaw q'ojla wi'je qa ma chin yoline o'kx juntl maj. ¿Yajtzun qa ma knet noq laj xjal tz'aqlxix ma chixin? Tzajtzun ttzaq'we'ntl Qman: —Mlay kub' nxitune, tu'n nk'ujlalile kyi'j laj.

³³Ik'tzun Qman tuj lugar tej tb'aj yolin tuk'il Abraham; atzunte Abraham aj meltz'aj tuj tja.