Read kumam Génesis 19 Bible Online

Génesis 19 - kumam bible

Génesis 19

¹Ch'ixtoq tok yupj tej kypon qe kab' anjel tuj Sodoma. Q'uqltoq Lot ttzi tlamel tnam. Tejtzun kyxi tke'yin, jaw we' k'molte kye, kub' ẍmeje', pon takl tib'aj twitz max twitz tx'otx',

²ex xi tma'n kye kyja': —Chin kub'sale kywitze, Tat, kyxi'ye tuj njaye, aqine kymajene, ex kykyaj tene tuj aq'b'il lu. Atzun b'a'n tel kytx'jo'ne kyqane, ex nchi'jxi te prim b'a'n ttzyetl kyb'eye, chi Lot kye. Atzun kye anjel kyma: —Mi'n. Ax k'elex aq'b'il qeye tuj cay, che chi anjel.

³Atzunte Lot kub'sanxix kywitz, ex kub'tzun tuj kywitz tu'n kyxi' max tja. Tejtzun kypon tja Lot, ok ten Lot b'inchalte kywa, tb'incha pan minti' t-samel tuj, ex e wa'n.

⁴Na'nxtoq kykub' tan, b'aj kytxolb'an kyib' kykyaqil qe xinaq aj Sodoma ti'jele tja Lot, tza'nx qe ku'xun ax ikx qe tij xjal,

⁵ex e ok ten sch'il ti'j Lot in kyma'ntoq kyja': —¿Jatum ate' qe xinaq ẍe ul tjaya te qonik'an ja'lo? Q'i'metza qe. Qajb'ile tu'n qkub' tane kyuk'il, che chi qe xinaq aj Sodoma.

⁶Etztzun Lot yolil kyuk'il, kyaj tlamo'n ja,

⁷ex xi tma'n kye: —Aqeye wamiw, chin kub'sale kywitze, mi'n kyb'inchaye mya b'a'n lu.

⁸At kab'e nme'jele na'nx kylonte xinaq; che eletz wi'ne tu'ntzun kyb'inchanteye alkye kyajb'ile kyi'j. O'kx mi'n kyb'inchaye mya b'a'n kyi'j qe xinaq lu. Atzun til ma che ul wuk'ile tuj njaye, chi Lot.

⁹Tzajtzun kytzaq'we'n xjal: —Laq'eb'ila. Aya jun stranjer xjal ma tzula najal tzalu ex ja'lo tajb'ila tu'n tkawina qib'aje. Ok qb'inchaye mas mya b'a'n ti'ja kywitz qe kab'e xjal ate'kx tuj tjaya, che chi. E pon tilj ti'j Lot ex e pon laq'e' tu'n tokx kypa'n tlamel ja.

¹⁰Etztzun kynuqpi'n kyq'ab' qe xinaq ate'kxtoq tuj tja Lot, okx kyi'n tuj ja ex jurat naj etz kylamo'n tlamel ja.

¹¹Atzun qe xjal ate'toq ttzi ja, b'i'x kub' moẍix kywitz kyu'n qe xinaq, tza'nx qe ku'xun ax ikx qe tij xjal, ex e takpaje'; kyja'tzun tten, minti'tl knet ttzi ja kyu'n.

¹²Tzajtzun kyma'n qe xinaq te Lot kyja': —¿Atpe txqantl xjal tuk'ila tzalu? Qe tji'ya, qe tky'ajala, qe tme'jela, ex tkyaqilju at teya tuj tnam lu, q'i'mexa qe tzalu,

¹³porke kb'el qxitune tnam lu. O japun tuk'il Qman nimxix tqanil kyil xjal tuj. Tu'ntzun jlu ma qo tzaj sama'ne xitul te.

¹⁴Etztzun Lot q'malte kye tji', aqeju otoq b'ant ti'j tu'n kymoje' kyuk'il tme'jel, ex xi tma'n kye kyja': —Chuxqeye ex kyexe tzalu, porke kb'el t-xitun Qman aju tnam lu, chi Lot. Atzun kye tji' ok kyq'o'n qa noq in la'jintoq Lot.

¹⁵Tej tkub' q'ij, xi kyma'n anjel te Lot kyja': —Chuxa, we'ktza, q'i'mexa t-xu'jila tzalu kyuk'ix qe kab'e tme'jela, qa mi'n taja tu'n tnaja ok tkub' tcastiw tnam lu qu'ne.

¹⁶Minti'x b'ant naj tten Lot. Tu'ntzun jlu, lach'o'n etz kyu'n qe xinaq, tuk'ix t-xu'jil ex qe kab'e tme'jel, tu'nju tzaj q'aq'an tk'u'j Qman ti'j. E je'tz q'i'n tu'n kyetz ti'jxi tnam tu'ntzun kyklet.

¹⁷Tejtzun kyetz ti'jxi tnam, tzajtzun tma'n jun kyxol qeju kab'e xinaq kyja': —Tel oqa tu'ntzun tkleta. Mi'n tz'ajtz tke'yina ti'jtza ex mi'n kub' we'ya tuj tkyaqil chq'ajlaj lu. Txi'ya kywi witz tu'ntzun mi'n tnaja, chi xinaq.

¹⁸Xitzun tma'n Lot kye kyja': —Mi'n. Chin kub'sale kywitze tat.

¹⁹Ma kyb'inchaye nim xtalb'il weye tu'nju ma chin kolpete kyu'ne. Mlay chinxe kywi witz, tu'nju mya yajku jaku nk'ulb'a'ye jun ti'xti mya b'a'n tuj b'e, ex axlo jaku chin kyime.

²⁰Kyke'yinxe tal tnam niqayin ta' ma chixin. Jaku chinx oqe tuj. Kyq'o'ntze amb'il weye tu'n nxi'ye, tu'ntzun nklete tuj. ¿Myapelo ax tok ch'in tal tnam lu? Chi Lot.

²¹Tzajtzun ttzaq'we'n xinaq te kyja': —Ax ikx b'a'n ma tz'e'la tuj nwitze aju tkub'sb'ila ti'j jlu, ex mi'n kub' nxitune aju tnam ma tmaya,

²²ex jurat-x naj txi'ya klol tib'a ma chixin. Minti' kb'antel wu'ne akux na'nxtoq tpona ma chixin, chi xinaq.

²³Otoq jawil q'ij tej tpon Lot tuj Zoar.

²⁴Atzunte Qman tzaj tchitun q'aq' ex azufre kyib'aj tnam Sodoma ex Gomorra. Tzaj jlu twitz kya'j tuk'il Qman.

²⁵E kub' t-xitun, tuk'ix tkyaqil chq'ajlaj, kyuk'ix kykyaqil qeju najl kyuj tnam, tuk'ix tkyaqilju in ch'iytoq twitz tx'otx'.

²⁶Atzunte t-xu'jil Lot lepcho'ktoq ti'j, ajtz tke'yin ti'jtzi. Axtzun kyaj we', ex b'aj noj ti'j tu'n atz'an.

²⁷Tuj juntl q'ij te prim, xi' Abraham jatum kub' ten yolil tuk'il Qman.

²⁸Xi tke'yin tumlal Sodoma ex Gomorra, ex tuj tkyaqil chq'ajlaj o til in jawtoq sib', mer ik tza'n sib' in jaw tuj jun jorni.

²⁹Kyja'tzun, tej tkub' t-xitun Dios qe tnam tuj chq'ajlaj, ul Abraham tuj t-ximb'etz, ex etz ti'n Lot tuj xitb'il kye tnam jatum otoq najan.

³⁰Jax Lot najal tuj tiwitz tx'otx', ex e jax ti'n qe kab'e tme'jel tuk'il, ex tzaj t-xob'il ti'j tu'n tkyaj ten tuj Zoar. Atzun najan kyuk'il qe kab'e tme'jel tuj jun toy' pik.

³¹Xitzun tma'n tzikb'aj te tz'inb'aj kyja': Ma tijin qman, ex tuj tkyaqil tx'otx' lu mi a'l jun xinaq tu'n tmoje' quk'il, ik tza'n in b'ant kyu'n xjal.

³²Tu'ntzun jlu, qq'o'nk vin te qman tu'n tchyo'n twi', ex e qkub' tan tuk'il tu'ntzun ttzaj tk'wa'l qi'j, chi tzikb'aj.

³³Axtzun qonik'an ok kyq'o'n vin te kyman, ex kub' tan tzikb'aj ttxlaj tman. Atzunte mamb'aj minti' o tna' tej tkub' tan tme'jel ttxlaj, mi tej tjaw we'.

³⁴Te juntl q'ij xi tma'n tzikb'aj te tz'inb'aj kyja': Qonik'an may' ma chin kub' tane tuk'il tat. Ax ikx qq'o'nk vin te tuj qonik'an ja'lo, jakutzun kub' tan teya tuk'il tu'ntzun ttzaj tk'wa'l qi'j, chi tzikb'aj.

³⁵Axtzun qonik'an ok kyq'o'n vin te kyman, ex kub' tan tz'inb'aj ttxlaj tman. Atzunte Lot minti' o tna' tej tkub' tan tme'jel ttxlaj, mi tej tjaw we'.

³⁶Kyja'tzun tten ok ten kyal qe kab'e tme'jel Lot tu'nx Lot.

³⁷Ultzun itz'j tal tzikb'aj, Moab tb'i ok, aju kyxe'chel qe aj Moab, aqeju ate'x ja'lo.

³⁸Ax ikx te tz'inb'aj ul itz'j tal, Ben-ammí tb'i ok, aju kyxe'chel qe aj Amón, aqeju ate'x ja'lo.