Read kumam Génesis 2 Bible Online

Génesis 2 - kumam bible

Génesis 2

¹Iktzun tten e b'aj b'ant kya'j ex tx'otx' tuk'ix tkyaqilju at kywitz.

²Tujtzun twuqin q'ij ojlan Dios, tb'antlenxi tkyaqil taq'un.

³Kub' tky'iwla'n Dios twuqin q'ij, ex el tpa'n tu'n tajb'en o'kx te, tu'nju atzun q'ij ojlan, tb'antlenxi tkyaqil taq'un.

⁴Iktzun tten tx'olb'ab'l ti'j kya'j ex tx'otx' tej kyb'ant tu'n Qman Dios. Tej tkub' tb'incha'n Dios tx'otx' ex kya'j,

⁵minti'toq jun awal twitz tx'otx', ex na'nxtoq ttzaj poq'l k'ul, tu'nju na'nxtoq ttzaj tq'o'n Qman Dios jb'al, ex mi a'ltoq jun xjal tu'n tok ten aq'nal twitz tx'otx'.

⁶Maske minti'toq jb'al, ex ax tuj tx'otx' in jatz jlettoq xmu's, ex atzun jlu in a'lin twitz tx'otx'.

⁷Kub'tzun tb'incha'n Qman Dios xinaq ti'j tquqil tx'otx', ex okx t-xupin Dios t-xew tuj ttxa'n tu'n tq'onte tchwinqlal. Iktzun tten ok xjal te itz'.

⁸Kub'tzun tq'o'n Qman Dios txqan awal tuj Edén tuj tjawitz q'ij, ex atzun kub' tq'o'n aju xinaq otoq kub' tb'incha'n.

⁹Jawtzun tch'isan Qman Dios tuj tx'otx' lu tkyaqil wiq tze' tb'anilxix ke'yin ex b'a'n tlo'njtz twitz, ax ikx jaw tch'isan tuj tmij awal aju tze' in tq'o'n chwinqlal, tuk'ix aju tze' tu'n tel nik'b'aj ti'j b'a'n ex ti'j mya b'a'n.

¹⁰Tuj Edén nne'tztoq jun nima, atzun in b'aj a'lintoq t-xol awal. Tetzlenxi tuj Edén, nne'ltoq tpa'n tib', kyaje nima nne'ltoq.

¹¹Aju tnejel nima Pisón tb'i; atzunju in b'aj tb'etintoq ti'jele tkyaqil tx'otx' Havila tb'i, jatum at q'an pwaq.

¹²Tb'anilxix aju q'an pwaq at tuj tx'otx' lu, ax ikx atzun in knet tq'olil tze' tb'anilxix tk'ok'jal, tuk'ix ab'j tb'anilxix, ónice tb'i.

¹³Aju tkab'in nima Gihón tb'i; atzunju in b'aj tb'etintoq ti'jele tkyaqil tx'otx' Cus tb'i.

¹⁴Aju toxin nima Tigris tb'i; atzunju in b'aj tb'etintoq tuj tjawitz q'ij ttzi'yile tx'otx' Asiria. Aju tkyajin nima Éufrates tb'i.

¹⁵Tejtzun tokx tq'o'n Qman Dios aju xinaq t-xol awal tuj Edén tu'n tok ten aq'nal ti'j ex tu'n tok tk'ujla'n,

¹⁶xi tma'n te kyja': B'a'n t-xi tlo'na twitz tkyaqil tze' at tuj tqan awal;

¹⁷atzunju twitz tze' tu'n tel nik'b'aj ti'j b'a'n ex ti'j mya b'a'n, mi'n txi tlo'na; qatzun ma txi tlo'na, ax tok kymela, chi Dios te.

¹⁸Tmatzun Qman Dios kyja': Mya b'a'n tu'n tten xinaq tjunal. Kb'el nb'incha'ne jun tuk'il te onil te, chi Dios.

¹⁹Tkyaqil txkup ex tkyaqil chyu'j, tuk'ix tkyaqil jil in che lipan twitz kya'j, aqeju otoq che kub' tb'incha'n Qman Dios ti'j tx'otx', e tzaj ti'n twitz xinaq, Adán[1] tb'i, tu'ntzun tok tq'o'n Adán kyb'i; ex teyle te junjun ok tb'i ik tza'nx ok tq'o'n.

²⁰Ok tq'o'n Adán kyb'i alumaj, kyb'i chyu'j ex txqantl jil in che lipan twitz kya'j ex kyb'i txqantl txkup ate' tjaq' k'ul, ex kyxol kykyaqil txkup lu, minti' knet jun tuk'il te onil te.

²¹Tzajtzun ti'n Qman Dios nim watl tuj twitz Adán, ex tej in tantoq, jatz ti'n Dios jun t-xu'k ex kyaj tmojb'a'n jatum otoq jatz ti'n.

²²Ti'jtzun xu'kb'aj lu, kub' tb'incha'n Qman Dios jun xu'j. Tzajtzun ti'n twitz Adán.

²³Tej ttil Adán aju xu'j, tma kyja': Ate jlu k'okel tb'i xu'j, tu'nju ti'jx xinaq ma jatz q'i'n, chi Adán.

²⁴Tu'ntzun jlu, kyjel tq'o'n xinaq tman ex ttxu', k'okeltzun moje' tuk'il t-xu'jil, ex kykab'il che okel te junx.

²⁵Kykab'il xjal lu, ate Adán ex t-xu'jil, minti'toq kyxb'alun toksa'n, ex minti'toq in tzaj kych'ixwi.