Read kumam Génesis 21 Bible Online

Génesis 21 - kumam bible

Génesis 21

¹Tzajtzun ke'yin Sara tu'n Qman, ex japun tyol Qman ik tza'n otoq tzaj ttziyan te.

²Oktzun ten tal Sara ex ul itz'j jun tal, te Abraham tky'ajal, tej otoq tijin Abraham. Ul itz'j tuj tq'ijlalil otoq tma Dios te.

³Isaac tb'i k'wa'l ok tq'o'n Abraham, aju ul itz'j ti'j Sara.

⁴B'aj t-sircunsidarin Abraham aju tky'ajal Isaac tb'i, tej otoq b'ant wajxaq q'ij tul-len itz'j, ik tza'nx otoq tma Dios te.

⁵Otoq tz'el Abraham twi' jun syent ab'q'i tej tul itz'j Isaac aju tky'ajal.

⁶Tmatzun Sara kyja': Ma chin jaw tze'ne tu'n Dios, ex alkyexju ok tb'i' ti'j jlu, ktze'l junx wuk'ile.

⁷Tmatl kyja': ¿Atpe jun o q'mante te Abraham qa attoq t-xiyil nq'o'ne kych'u' k'wa'l? Atzun ja'lo ma tzul itz'j jun tky'ajal Abraham wi'je ex ya ma tijin Abraham, chi Sara.

⁸Ch'iytzun Isaac ex el q'i'n ti'j tch'u'. Aju q'ij tej tel q'i'n ti'j tch'u' ok jun nintz wa'n tu'n Abraham.

⁹O til Sara in xmayintoq Ismael ti'j Isaac. Ate Ismael tky'ajal Abraham ex tal Agar aju aj Egipto.

¹⁰Xitzun tma'n Sara te Abraham kyja': Lajon exa Agar aju majen, tuk'ix tal. Aju tal majen xu'j lu minti' toklen ti'j etzb'il junx tuk'il wale Isaac, chi Sara.

¹¹Tzaj nim tb'is Abraham tu'nju yol tzaj tma'n Sara te, porke in yolintoq ti'j Ismael aju tky'ajal.

¹²Tzajtzun tma'n Dios te Abraham kyja': Mi'n b'isuna ti'j q'a mi ti'j tmajena xu'j. Nimanxa tkyaqilju in tma'n Sara teya, porke o'kx qe tk'wa'l Isaac che okel te tiyjila.

¹³Ax ikx ti'j tal tmajena xu'j k'elel itz'j jun nasyon wu'ne, tu'nju ax tk'wa'la jlu, chi Dios.

¹⁴Tuj juntl q'ij te prim wen, xi tq'o'n Abraham pan te Agar tuk'ix jun bols tz'u'm nojni tu'n a', jaw tq'o'n tkyaqil jlu tzal ti'j Agar, xi tq'o'n aju q'a tuj tkwent ex b'aj kyq'olb'en kyib'. Extzun Agar tuk'ix Ismael ex o b'etje' tuj tzqij tx'otx' Beerseba.

¹⁵Tejtzun tkub' b'aj a' tuj bols tz'u'm, kyaj tq'o'n Agar aju q'a tjaq' jun wi' tze',

¹⁶ex xi' qeb'el najchaq ch'in, ik tza'n jatum in pon tz'aq plech, tu'nju mi'n tajb'iltoq tu'n tke'yinte ok tkyim q'a. Tejtzun tkub' qe' Agar, ok ten oq'el.

¹⁷Tb'itzun Dios tq'ajq'ajel twi q'a in oq'toq. Tzaj q'ajt t-anjel Dios max twitz kya'j ex tzaj tma'n te Agar kyja': Agar, ¿alkye ma tzaj ti'ja? Mi'n xob'a, porke ma tb'i Dios aju tq'ajq'ajel twi q'a max jatum tkub'sa'n.

¹⁸We'ktza. Lach'o'n jawa q'a, ex tzyuma tu'n tq'ab'a, porke ti'j q'a lu kb'antel jun nintz nasyon wu'ne.

¹⁹Tzajtzun tyek'un Dios jun xoch te Agar. Xi' Agar nojsalte bols tz'u'm tu'n a' ex xi tq'o'n tk'a q'a.

²⁰O ten Dios tuk'il q'a. O najan tuj tzqij tx'otx', o ch'iy ex ok te jun xo'l plech.

²¹O najan tuj tzqij tx'otx' Parán ex o moje' tuk'il jun xu'j aj Egipto, aju tzaj ti'n ttxu'.

²²Tujx tq'ijlalil lu, xi' Abimelec yolil tuk'il Abraham, tuk'ix te Ficol xi' tuk'il, aju nejenel kye t-soldad. Xi tma'n Abimelec te Abraham kyja': —Ate Dios at tuk'ila tuj tkyaqilju in b'ant tu'na.

²³Ja'lotzun, ax tzalu q'mantza jun yol axix tok twitz Dios, qa mlay tb'inchaya mya b'a'n wi'je, mi kyi'j qe nk'wa'le, mi kyi'j qe wiyjile; noq o'kx tu'n tb'inchanteya b'a'n wi'je, ax ikx kyi'j qe xjal ate' tuj tx'otx' lu jatum najliya ja'lo, ik tza'n weye o nb'inchaye b'a'n ti'ja.

²⁴Xi ttzaq'we'n Abraham kyja': —Kxel nma'ne jun yol axix tok twitz Dios.

²⁵Xi tma'n Abraham jun yol te Abimelec ti'j jun xoch otoq tz'el kyetzan qe tmajen Abimelec.

²⁶Xitzun ttzaq'we'n Abimelec kyja': —Minti' b'a'n wu'ne alkye o b'inchante jlu ex minti' o tzaj tma'na jlu weye. Matzun ja'lo ma nb'iye ti'j jlu.

²⁷Tzajtzun ti'n Abraham qe ẍne'l ex wakẍ, ex e je'x tq'o'n te Abimelec. Atzun q'ij kyaj b'ant ti'j jun kyyol kykab'il.

²⁸E je'l tpa'n Abraham wuq ttxu ẍne'l kyi'j qe txqantl talun.

²⁹Xitzun tqanin Abimelec te kyja': —¿Ti kyajb'en qe wuq ẍne'l ma che el tpa'na?

³⁰Xi ttzaq'we'n Abraham kyja': —Aqeju wuq ttxu ẍne'l lu, che xel nq'o'ne teya tu'n kyajb'en te jun yek'b'il, wu'ne b'ant xoch lu, chi Abraham.

³¹Tu'ntzun jlu, Beerseba[9] tb'i lugar lu ok q'o'n, porke atzun kyaj b'ant ti'j jun yol kyu'n kykab'il.

³²Kyja'tzun kyaj b'ant ti'j jun yol kyu'n tuj Beerseba. Ajtzun meltz'aj Abimelec tuk'ix Ficol, aju nejenel kye t-soldad, ex e je'x tuj kytx'otx' aj Filisteo.

³³Ku'x tawa'n Abraham jun wi' tze' tamarisco tuj Beerseba. Atzun o kub'san Abraham twitz Qman aju Dios te jumajx.

³⁴O ten Abraham nim q'ij tuj kytx'otx' aj Filisteo.