Read kumam Génesis 23 Bible Online

Génesis 23 - kumam bible

Génesis 23

¹O ten Sara 127 ab'q'i,

²ex kyim tuj Quiriat-arba (aju ax juntl tb'i Hebrón) tuj kytx'otx' aj Canaán. Ok ten Abraham oq'el ti'j Sara tej tkyim, ex kyaj ten tuj b'is.

³Jawtzun we' Abraham jatum tkub'sa'n t-ximlal Sara, ex xi tma'n kye aj Heteo kyja':

⁴—Stranjer ex b'etin xjal qine kyxole. Kyk'ayintze jun piẍ tx'otx' te nmuqb'ile. Atzun k'okex maqut nkyimniye, chi Abraham.

⁵Xitzun kytzaq'we'n qe aj Heteo te Abraham kyja':

⁶—Tat, qo tb'intza. Aya jun nejenel qxole tu'n Dios. Maqu'nkxa tkyimniya tuj qmuqb'ile mas tb'anil. Mi a'l jun qeye jaku kub' t-xk'ayin tmuqb'il tu'n tku'x maqet tkyimniya.

⁷Jawtzun we' Abraham ex kub' mok'e' kywitz aj Heteo, aqeju najl tuj tx'otx' lu,

⁸ex xi tma'n kyja': —Qa ax tok kyajb'ile tu'n tokx nmaqu'ne nkyimniye tzalu, kyb'inchame xtalb'il tu'n kyyoline wi'je twitz Efrón aju tky'ajal Zohar,

⁹tu'n ttzaj tk'ayin aju toy' pik at tuj Macpela, aju tkub' ttzi ttx'otx'. Jaku txi nchjo'ne cabal twi' toy' pik, ex kyja'tzun jaku chin oke tajwil muqb'il kyxole, chi Abraham.

¹⁰Q'uqltoq Efrón kyxol aj Heteo, ex in che b'intoq aj Heteo ex kykyaqil qe xjal in che okxtoq ttzi tlamel tnam tej t-xi ttzaq'we'n Efrón te Abraham kyja':

¹¹—Mi'n, tat. Chin tb'intza. Jaku txi nq'o'ne tx'otx' teya, tuk'ix toy' pik tkub' tuj. Jaku txi nq'o'ne teya kywitz kykyaqil nxjalile. Maqu'nkx tkyimniya, chi Efrón.

¹²Atzunte Abraham kub' mok'e' juntl maj kywitz xjal, aqeju najl tuj tx'otx' lu,

¹³ex xi ttzaq'we'n te Efrón kywitz xjal kyja': —Chin tb'intza. Chin kub'sale twitza tu'n t-xi tk'mo'na twi tx'otx'. Jakutzun tz'okx nmaqu'ne nkyimniye tuj, chi Abraham.

¹⁴Xi ttzaq'we'n Efrón te Abraham kyja':

¹⁵—Chin tb'intza tat: kyaje syent tajlal saq pwaq twi tx'otx'. ¿Nimpetzun jlu te qe? Maqu'nkx tkyimniya, chi Efrón.

¹⁶Kub'tzun tuj twitz Abraham aju twi tx'otx' tma Efrón. Kywitz aj Heteo jaw tmalo'n Abraham aju kyaje syent tajlal saq pwaq ex xi tq'o'n te Efrón, cabalxix talil.

¹⁷Kyja'tzun o b'aj ti'j ttx'otx' Efrón tuj Macpela, aju tokx ti'jxi Mamre tuj tjawitz q'ij, tuk'ix toy' pik ex kykyaqil tze' ate'toq tuj tx'otx';

¹⁸ok Abraham tajwil tx'otx' lu kywitz qe aj Heteo ex kykyaqil qe xjal in che okxtoq ttzi tlamel tnam.

¹⁹Tb'ajlenxi tkyaqil jlu, xi'tzun Abraham maqulte qtzan Sara aju t-xu'jil. Okx tmaqu'n tuj toy' pik tkub' tuj Macpela, tokx ti'jxi Mamre (aju ax juntl tb'i Hebrón), tuj kytx'otx' qe aj Canaán.

²⁰Oktzun Abraham tajwil tx'otx' tuk'ix toy' pik tkub' tuj. Xi k'ayin jlu kyu'n aj Heteo tu'n tokx maqut kyimni tuj.