Read kumam Génesis 24 Bible Online

Génesis 24 - kumam bible

Génesis 24

¹Otoq tijin Abraham ex otoq ky'iwlanjtz tu'n Qman tuj tkyaqil.

²At jun q'ij tzaj ttxko'n Abraham aju mas tij xjal kyxol qe tmajen, aju kwentil tkyaqilju attoq te, ex xi tma'n te kyja': —Q'o'nktz tq'ab'a tjaq' nkuxe,

³ex q'mantza jun yol axix tok twitz Qman aju Dios at tuj kya'j ex at twitz tx'otx', tu'n mi'n tq'onteya amb'il te Isaac aju nky'ajale tu'n tmoje' tuk'il jun xu'j tzalu tuj tx'otx' Canaán jatum najl qine,

⁴noq o'kx kxe'la tuj tx'otx' jatum tzajni qine ex kyxol qe xjal at nxilene kyuk'il, ex ktzajeltzun ti'na jun xu'j te t-xu'jil Isaac aju nky'ajale, chi Abraham.

⁵Xitzun ttzaq'we'n majen kyja': —¿Yajtzun qa tk'i' q'apoj tu'n ttzaj wuk'ile? ¿Kxe'lpetzun wi'ne tky'ajala tuj tx'otx' jatum etza? Chi majen.

⁶Xitzun tma'n Abraham te kyja': —Mi'n. Mi'n txi ti'na nky'ajale ma chixin.

⁷Ate Qman, aju Dios at tuj kya'j, aju etz q'inte weye tuj tja nmane ex tuj kytx'otx' qe xjal at nxilene kyuk'il, o tzaj ttziyan weye, chi kyja': Ktzajel nq'o'ne tx'otx' lu kye tiyjila; ex tzul t-sama'n t-anjel tu'n t-xi' nej twitza tu'n ttzaj ti'na jun t-xu'jil nky'ajale ma chixin.

⁸Qatzun tk'i' xu'j tu'n ttzaj tuk'ila, myatzun aya at til, tu'nju otoq japun tu'na aju otoq txi ttziyana, ex mi'n txi ti'na nkya'jale ma chixin, chi Abraham.

⁹Okxtzun tq'o'n majen tq'ab' tjaq' tkux Abraham aju tpatrón, ex xi ttziyan tu'n tjapun tu'n ik tza'n otoq tma Abraham.

¹⁰Jawtzun t-sk'o'n tkyaqil wiq oyaj tb'anilxix ti'j tkyaqilju attoq te Abraham, xi ti'n laj chej camey, ex pon tuj ttanmi Nacor tuj tx'otx' Mesopotamia.

¹¹E ojlantzun qe chej camey tu'n majen ttzi jun xoch ti'jtzi tnam, te qale tuj or ok in che ul qe xu'j q'il a'.

¹²Oktzun ten majen na'l Dios ex tma kyja': Nman Dios, aya Tdios npatrone Abraham, chin tonintza tu'n tel b'a'n tkyaqil, ex b'inchama xtalb'il te npatrone Abraham.

¹³Atine ttzi xoch lu, ex qe q'apoj te tnam lu, atzun in che ul q'il a'.

¹⁴Aju q'apoj kxel nma'ne te kyja': Chin kub'sale twitza, pich'b'antza twi t-ẍoq'a tu'n nk'ane a', ex qa ma tzaj ttzaq'we'n weye kyja': K'ana a', ax ikx kxel nq'o'ne kyk'a tcheja camey, qa chi, awttzun q'apoj lu aju sk'o'maj tu'na tu'n tok te t-xu'jil Isaac aju tmajena. Kyja'tzun k'elel nnik'e ti'j qa otoq tb'inchaya xtalb'il te npatrone, chi majen.

¹⁵Na'nxtoq tb'aj na'n Dios tej tul Rebeca, tjax t-ẍoq' twi t-semil. Ate Rebeca tme'jel Betuel, atzunte Betuel tal Milca ex tky'ajal Nacor. Ate Nacor terman Abraham.

¹⁶Ate q'apoj lu tb'anilxix ke'yin ex na'nxtoq tlonte xinaq. Ku'x ttzi xoch, ku'x tnojsa'n t-ẍoq' ex kyja'toq taj meltz'aj,

¹⁷xi'tzun qelan majen ti'j, ex xi tma'n te kyja': —Chin kub'sale twitza, q'ontza ch'in nk'aye a' tku'x tuj t-ẍoq'a, chi majen.

¹⁸Xi ttzaq'we'n q'apoj: —K'ana a' tat. Kub'tzun ti'n naj q'apoj t-ẍoq', o ttzuy tu'n tq'ab', ex xi tq'o'n tk'a majen.

¹⁹Tejtzun tb'aj k'an majen, xi tma'n q'apoj te kyja': —Ax ikx kjawitz wi'ne a' te kyk'a tcheja camey okxi kynoj, chi q'apoj.

²⁰Kyajtzun tqo'n naj tuj kyk'ab'l alumaj aju a' tku'xtoq tuj t-ẍoq', xi qelan, ex ela' maj b'ant tqan q'il a' ttzi xoch tu'n kyk'an kykyaqil qe chej camey.

²¹In ke'yintoq majen ti'j q'apoj, ex minti' o q'ajt, tu'n tel tnik' ti'j qa otoq tzaj onin tu'n Qman tuj tb'e ex qa mi'n.

²²Tejtzun kyb'aj k'an qe chej camey, xi tq'o'n majen jun argoy te txin, q'an pwaq ttx'otx'il, ch'ixmi mij mey ons talil. Ax ikx xi tq'o'n kab'e tqul q'ab'aj, q'an pwaq kytx'otx'il, ex kyaje ons talil junjun.

²³Xitzun tqanin te q'apoj kyja': —¿Alkye tmana? Najsama, ¿atpe posad max tja tmana tu'n qkyaj tene tuj qonik'an ja'lo? Chi majen.

²⁴Xi ttzaq'we'n q'apoj: —Tme'jel Betuel qine, aju tal Milca ex tky'ajal Nacor.

²⁵Ax ikx at ttxa triw ex nim kywa chej, ex at posad qjaye tu'n kykyaj tene tuj qonik'an ja'lo, chi q'apoj.

²⁶Kub'tzun mok'e' majen, ok ten k'ulul te Qman,

²⁷ex tma kyja': —Nimanxwit tb'i Qman aju Tdios npatrone Abraham. Kukx tzaj tq'o'n t-xtalb'il te npatrone, ex ma japun tyol aju tzaj ttziyan te; ex ma chin tzaj t-ẍaqlu'n tu'n wule kyja t-xjalil npatrone, chi majen.

²⁸Xitzun qelan Rebeca max tja q'malte te ttxu' ti'j tkyaqilju otoq b'aj.

²⁹Attoq jun t-xib'an Rebeca, Labán tb'i. Atzun te jlu xi qelan lolte tmajen Abraham max ttzi xoch,

³⁰tu'nju otoq tz'ok tke'yin Labán aju oyaj ex qe tqul q'ab'aj tkub'toq tqul tq'ab' tanb' ex otoq tb'i aju in tma'ntoq tanb' ti'j tkyaqilju yol otoq tma xinaq te; ultzun laq'e' Labán ti'j tmajen Abraham axtoq ta' ttzi xoch kyuk'il qe chej camey.

³¹Xitzun tma'n Labán kyja': —Tzaja, aya ky'iwla'n tu'n Qman. ¿Tiqu'n kyjel tena tzalu? Ma b'ant tten ja wu'ne jatum tu'n ttena, ex at posad kye tcheja, chi Labán.

³²Xi'tzun majen max tja Labán. El ti'n Labán kyiqatz qe chej camey, ex xi tq'o'n kywa tuk'ix ttxa triw; ax ikx tzaj ti'n a' tu'n tel tx'jet kyi'j tqan majen, kyuk'ix kyqan qe tuk'il.

³³Kub'tzun q'o'n wab'j kywitz tu'n kywa'n, atzunte majen xi tma'n kyja': —Mlay chin wa'ne qa na'nxtoq t-xi nma'ne nsanjelale. Xitzun ttzaq'we'n Labán: —Yolina, chi Labán.

³⁴Tmatzun majen kyja': —Majen qine te Abraham.

³⁵Tkub' nim tky'iwb'il Qman tib'aj npatrone, ex o tz'ok q'inun tu'n: o che tzaj q'o'n t-ẍne'l kyuk'ix twakẍ, saq pwaq tuk'ix q'an pwaq, tmajen xinaq ex tmajen xu'j, tchej camey ex tbur.

³⁶Tej otoq tijin Sara aju t-xu'jil npatrone, ul itz'j jun tal tky'ajal npatrone, ex tetzun q'a lu o txi tq'o'n tkyaqil tq'inumab'l.

³⁷Tzaj tma'n npatrone weye tu'n t-xi nma'ne jun yol axix tok twitz Qman Dios, ex tma kyja': Mi'n taq'a amb'il te nky'ajale tu'n tmoje' tuk'il jun xu'j aj Canaán jatum najl qine ja'lo.

³⁸Txi'ya kyxol qe wermaniye ex jyo'metza jun t-xu'jil nky'ajale kyxol qeju at nxilene kyuk'il, chi weye.

³⁹Xitzun nma'ne te kyja': Tat, ¿yajtzun qa tk'i' q'apoj tu'n ttzaj wuk'ile? Nchiye.

⁴⁰Tzajtzun ttzaq'we'n npatrone: Ate Qman aju in chin b'ete twitz, ktzajel t-sama'n t-anjel tuk'ila, ex b'a'n k'elel tb'eya tu'n. Ktzajel ti'na t-xu'jil nky'ajale kyxol qeju at nxilene kyuk'il ex kyxol qe wermaniye.

⁴¹Oktzun tpona kyxol qe xjal at nxilene kyuk'il, qatzun mi'n saj kyq'o'n q'apoj tu'n ttzaj tuk'ila, minti'tzun tila ti'j yol ma tzaj ttziyana weye, chi npatrone Abraham.

⁴²Kyja'tzun tten, ẍin ule ttzi xoch, ẍin ok tene na'l Dios ex xi nma'ne te kyja': Qman, aya Tdios npatrone Abraham, qa ok tb'inchaya tu'n wele b'a'n tuj nsanjelale lu,

⁴³ok tul q'apoj q'il a' ttzi xoch lu jatum atine, ex ok t-xi nma'ne te: Chin kub'sale twitza, q'ontza ch'in nk'aye a' tuj t-ẍoq'a, nchiloye te,

⁴⁴ex qa ma tzaj ttzaq'we'n weye kyja': K'ana a', ex kjawitz wi'ne a' te kyk'a tcheja camey, qa chi, awttzun q'apoj lu aju sk'o'maj tu'na, Nman, tu'n tok te t-xu'jil tky'ajal npatrone, nchiye.

⁴⁵Na'nxtoq nb'aj na'ne Dios tuj wanmiye tej kyja' t-xi' Rebeca tuk'il t-ẍoq' tjax twi t-semil. Tejtzun xpon ttzi xoch, xi nma'ne te kyja': Chin kub'sale twitza, q'ontza ch'in nk'aye a'.

⁴⁶Xkub'tzun ti'n naj t-ẍoq' ex xtma weye kyja': K'ana a', ax ikx kxel nq'o'ne kyk'a tcheja camey, chi Rebeca. Ẍin k'ane a', ax ikx xi tq'o'n kyk'a ncheje camey.

⁴⁷Xitzun nqanine te kyja': ¿Alkye tmana? Atzun te saj ttzaq'we'n: Tme'jel Betuel qine, aju tky'ajal Nacor ex tal Milca, chi txin. Soktzun nq'o'ne jun argoy ti'j ttxa'n, ex kab'e tqul q'ab'aj sok nq'o'ne ti'j tq'ab'.

⁴⁸Ẍin kub'tzun mok'e'ye, ẍin ok tene k'ulul twitz Qman, ex xjaw nnimsa'ne tb'i Qman aju Tdios npatrone Abraham, aju Dios otoq ẍaqlunte weye tuj jun b'e tuj tumelxix, tu'n t-xi wi'ne tme'jel terman npatrone, tu'ntzun tok te t-xu'jil tky'ajal.

⁴⁹Ja'lotzun, kymantze weye qa ok kyb'inchaye xtalb'il te npatrone ex axix tok kyu'ne, ex qatzun mi'n, kymantze weye, jakutzun wile alkye kb'antel wu'ne, chi majen.

⁵⁰Xitzun ttzaq'we'n Labán ex Betuel kyja': —Tkyaqil jlu tuk'il Qman ma tzaj, ex mlay b'ant tu'n t-xi qma'ne teya ok, ex qa mi'n.

⁵¹Lu Rebeca lu, q'inxa ex txi'ya. E tok te t-xu'jil tky'ajal tpatrona ik tza'nx ma tma Qman, che chi.

⁵²Tejtzun tb'inte tmajen Abraham qe yol lu, kub' ẍmeje' twitz Qman, pon takl tib'aj twitz max twitz tx'otx'.

⁵³Jatztzun ti'n majen qe oyaj q'an pwaq ex saq pwaq kytx'otx'il, kyuk'ix xb'alun, ex xi tq'o'n te Rebeca. Ax ikx xi tq'o'n qe oyaj tb'anilxix te t-xib'an ex te ttxu'.

⁵⁴Tb'ajlenxitzun tkyaqil jlu, ok ten majen wa'l ex k'al kyuk'ix qe tuk'il, ex axtzun e kyaj ten te qonik'an. Te prim tuj juntl q'ij tej kyjaw we', tma majen kyja': —Kyq'ontze amb'il weye tu'n waj meltz'aje tja npatrone.

⁵⁵Xitzun ttzaq'we'n t-xib'an Rebeca ex ttxu' kyja': —E tkyaj ten q'apoj laj q'ijtl quk'ile, ex qa mastl, ex b'a'ntzun tajxi tuk'ila.

⁵⁶Atzunte majen xi tma'n: —Mi'n chin kub' kytzyuntle. Ma tz'onin Qman weye ex b'a'n ma tz'el nb'eye. Tu'ntzun jlu, kyq'ontze amb'il weye tu'n waje tja npatrone, chi majen.

⁵⁷Xitzun kytzaq'we'n: —Qtxkontz q'apoj, ex qqaninx te chi tok tu'n.

⁵⁸Txkettzun Rebeca kyu'n, ex xi kyqanin te kyja': —¿Kxe'lpeya tuk'il xinaq lu? Che chi. Xi ttzaq'we'n Rebeca: —Ok. Chin xe'le.

⁵⁹Xitzun kyq'o'n amb'il tu'n t-xi' Rebeca tuk'ix ju xu'j kwentil te, tuk'ix tmajen Abraham ex qe tuk'il.

⁶⁰Kub'tzun ky'iwla'n Rebeca kyu'n ex kyma kyja': Aya qanb'e, tz'okxwita te txuyb'aj kye ela' mil xjal ex tz'elwit kyetzan qe tiyjila kytanmi qe aj q'oj kyi'j.

⁶¹Atzunte Rebeca kyuk'ix qe tmajen xu'j e jaxtzun kyib'aj chej camey, ex e ok lpe' ti'j tmajen Abraham. Kyja'tzun tten xi' Rebeca tuk'il tmajen Abraham, ex kub' b'e kyu'n.

⁶²Otoq tz'ajtz Isaac ttzi xoch Beer-lahai-roi, tu'nju atzun najltoq tuj tx'otx' Néguev.

⁶³Otoq tz'etz Isaac na'l Dios tuj kojb'il te qale, jaw tke'yin ex o til kyja' kytzaj laq'e' junjun chej camey.

⁶⁴Ax ikx te Rebeca xi tke'yin, ex o ilwaj Isaac tu'n. Tejtzun tlonte, ku'tz tib'aj chej camey.

⁶⁵Xi tqanin te majen: —¿Alkye xinaq in b'et ttzaj ma chixin? Xitzun ttzaq'we'n majen: —Atzun npatroneju. Tzajtzun ti'n t-xmuj Rebeca, ex ok tmaqsi'n twitz tu'n.

⁶⁶Xi ttx'olb'a'n majen te Isaac tkyaqilju otoq tb'incha.

⁶⁷Xitzun q'i'n Rebeca tu'n Isaac tuj tja Sara aju qtzan ttxu', ex moje' Isaac tuk'il. Nim o k'ujlanjtz Rebeca tu'n Isaac. Kyja'tzun tten o qe' tk'u'j Isaac ti'j tkyimlen qtzan ttxu'.