Read kumam Génesis 25 Bible Online

Génesis 25 - kumam bible

Génesis 25

¹Moje' Abraham tuk'il juntl t-xu'jil, Cetura tb'i.

²Qe tky'ajal Abraham e ul itz'j ti'j xu'j lu, atzun qe jlu: Zimram, Jocsán, Medán, Madián, Isbac ex Súa.

³Ate Jocsán tman Seba ex Dedán. Qe tiyjil Dedán, atzun qe jlu: qe aj Asureo, qe aj Letuseo ex qe aj Leumeo.

⁴Qe tky'ajal Madián, atzun qe jlu: Efa, Efer, Hanoc, Abida ex Elda. Kykyaqil qe jlu tiyjil Cetura qe.

⁵Ate Isaac ok te tajwil tkyaqil tq'inumab'l Abraham.

⁶Atzun kye tky'ajal Abraham e ul itz'j kyi'j kab'etl xu'j, xi tq'o'n oyaj kye, ex tej itz'xtoq b'i'x e je'l tpa'n ti'j Isaac aju tky'ajal, ex e je'x t-sama'n tu'n kyxi' najal tuj tjawitz q'ij.

⁷O ten Abraham twitz tx'otx' 175 ab'q'i tu'n tkyaqil.

⁸Otoq tijin Abraham wen tej tkyim ex otoq ten nim ab'q'i twitz tx'otx'. Kyja'tzun tten o pon kyuk'il qe t-xe'chel.

⁹Okxtzun maqu'n tu'n Isaac ex Ismael aqeju tky'ajal tuj toy' pik tuj Macpela, tokx ti'jxi Mamre tuj tjawitz q'ij, tuj ttx'otx' Efrón aju tky'ajal Zohar aju aj Heteo.

¹⁰Atzun tx'otx' lu aju laq'et tu'n Abraham kye aj Heteo. Ax okx maqut Abraham junx tuk'il Sara aju qtzan t-xu'jil.

¹¹Tkyimlenxi Abraham, kub' ky'iwla'n Isaac tu'n Dios. Atzun kyaj ten Isaac najal ttzi xoch tok tb'i: Xoch te Dios itz' ex in chin til.

¹²Atzun tx'olb'ab'l lu kyi'j tiyjil Ismael aju tky'ajal Abraham ex tal Agar, aju tmajen Sara ex aj Egipto.

¹³Qe tky'ajal Ismael, atzun qe jlu: Nebaiot aju tnejel tky'ajal, Cedar, Adbeel, Mibsam,

¹⁴Misma, Duma, Massa,

¹⁵Hadar, Tema, Jetur, Nafis ex Cedema.

¹⁶Atzun kyb'i qe kab'laj tky'ajal Ismael, teyle te junjun ok te nejenel kyxol qe t-xjalil ex teyle te junjun ok tb'i ti'j ttx'otx' ex ti'j tnajb'il.

¹⁷Otoq japun Ismael twi' 137 ab'q'i tej tkyim ex pon kyuk'il qtzan t-xe'chel.

¹⁸Qe tiyjil Ismael e ul najal tuj tx'otx' t-xol Havila ex Shur, a tkub' jlu twitz Egipto tumlal kyja' qtzaj tuj Asiria. Atzun e najan kywitz kyerman.

¹⁹Atzun tx'olb'ab'l lu kyi'j tiyjil Isaac aju tky'ajal Abraham.

²⁰Otoq japun Isaac twi' 40 ab'q'i tej tmoje' tuk'il Rebeca aju tme'jel Betuel ex tanb' Labán, aqe jlu aj Arameo, najltoq qe tuj Padan-aram.

²¹O kub'san Isaac twitz Qman ti'j t-xu'jil tu'nju mib'antoq alin. O tb'i Qman aju tna'j Dios, ex ok ten tal Rebeca.

²²Ok q'oj kyu'n tal k'wa'l yo'ẍ tuj talb'il kytxu', ex tma Rebeca: Qa kukx kxe'l jlu ikju, ¿ti til tu'n wanq'intle? Chi Rebeca. Xi' b'ilte te Qman.

²³Tzajtzun ttzaq'we'n Qman te kyja': Kab'e nasyon ate' tuj talb'ila; kab'e tnam k'elel kypa'n kyib' jun ti'j juntl ax tuj talb'ila na'nx kyul itz'j. Jun tnam k'okel mas tipun twitz juntl, ex aju tzikb'aj k'okel te tmajen tz'inb'aj.

²⁴Pon q'ij tu'n tul itz'j tal Rebeca, ex yo'ẍ qe tal e ul itz'j.

²⁵Aju tnejel ul itz'j, kyaqnin ke'yin, tkyaqil ti'j nojnitoq tu'n xya'n, ex Esaú[10] tb'i ok q'o'n.

²⁶Ul naj itz'j titz'in, tzyu'n t-xe t-su'ẍ Esaú tu'n tq'ab', ex Jacob[11] tb'i ok q'o'n. Otoq japun Isaac twi' 60 ab'q'i tej kyul itz'j tal Rebeca.

²⁷E ch'iy qe k'wa'l. Ate Esaú ok te jun mejor kamb'al ex attoq tgan tu'n tten tuj kojb'il; atzunte Jacob jun xinaq mib'antoq lab't ex attoq tgan tu'n tkyaj ten ja.

²⁸O k'ujlanjtz Esaú tu'n Isaac tu'nju in chyo'ntoq Isaac ti'j chib'j in kub' tub'antoq Esaú tuj kojb'il; atzunte Rebeca o k'ujlanjtz Jacob tu'n.

²⁹At jun q'ij in b'inchantoq Jacob chib'j tej tul Esaú tuj kojb'il, otoq sikt wen.

³⁰Xi tma'n Esaú te Jacob kyja': —Chin kub'sale twitza, q'ontza nchi'ye ti'j ju in ttzq'ajsa'na, aju kyaqnin ke'yin, tu'nju ch'ix nkyime tu'n we'yaj, chi Esaú. Tu'ntzun jlu, Edom[12] tb'i Esaú ok.

³¹Xi ttzaq'we'n Jacob: —K'ayintza weye ja'lo aju toklena te tnejel k'wa'lb'aj.

³²Xitzun tma'n Esaú te kyja': —Ch'ix nkyime ex ¿ti til weye aju woklene te tnejel k'wa'lb'aj? Chi Esaú.

³³Xi tma'n Jacob te: —Q'mantza ja'lo jun tyola axix tok twitz Dios. Xitzun tma'n Esaú jun tyol axix tok te Jacob, ex xi tk'ayin toklen te tnejel k'wa'lb'aj.

³⁴Xitzun tq'o'n Jacob pan tuk'ix tchi chenaq'. Tejtzun tb'aj wa'n ex tej tb'aj k'an Esaú, jaw we' ex kub' b'e tu'n. Kyja'tzun tten tej tel tik'un Esaú toklen te tnejel k'wa'lb'aj.