Read kumam Génesis 27 Bible Online

Génesis 27 - kumam bible

Génesis 27

¹Tej otoq tijin Isaac ex otoq moẍix twitz, tzaj ttxko'n aju tnejel tky'ajal Esaú tb'i, ex xi tma'n te kyja': —Nky'ajal. Atzun te xi ttzaq'we'n: —Lu qine lu, tat, chi Esaú.

²Xi tma'n Isaac te: —Ma tila ma chin tijine, ex minti' b'a'n wu'ne alkye q'ij chin kyime.

³Q'inxa qe tplecha tuj kykub'il, tuk'ix xob'l tplecha, txi'ya tuj kojb'il ex q'intza txkup kb'el tu'na.

⁴B'inchama jun laq nchi'ye k'ok'j ik tza'n nganiye, ex q'intza tu'n t-xi nchyo'ne, tu'ntzun tkub' nky'iwla'na na'nxtoq nkyime, chi Isaac.

⁵Atzunte Rebeca in b'intoq tej in yolintoq Isaac tuk'il Esaú aju tky'ajal. Tejtzun t-xi' Esaú tuj kojb'il kamb'alte txkup te tchi' tman,

⁶xi tma'n Rebeca te Jacob aju tal: —Ma nb'iye tyol tmana xi tma'n te Esaú aju ttzika, ex ma tma kyja':

⁷Q'intza txkup kb'el tu'na, ex b'inchama jun laq nchi'ye k'ok'j tu'n t-xi nchyo'ne, tu'ntzun tkub' nky'iwla'na twitz Qman na'nxtoq nkyime, chi tmana.

⁸Ja'lotzun wal, nimanxa aju kxel nma'ne teya.

⁹Txi'ya jatum ate' qe alumaj, ex q'intza kab'e tal chip tb'anilxix. Che b'ajel nb'incha'ne te tchi' tmana ik tza'nx tgan.

¹⁰Kxe'ltzun ti'na twitz tmana ex kxel tchyo'n, tu'ntzun tkub' ky'iwla'na tu'n na'nxtoq tkyim, chi Rebeca.

¹¹Xitzun tma'n Jacob te Rebeca aju ttxu': —Aju ntzike Esaú nojni ti'j tu'n xya'n, atzun weye mi'n.

¹²Yajtzun qa in chin ok mako'ne tu'n nmane, jakulo tma in chin xmayine ti'j, ex ktzajel wi'ne jun mya b'a'n wib'aje te t-xel ky'iwb'il, chi Jacob.

¹³Xitzun ttzaq'we'n ttxu': —Wal, aju mya b'a'n jaku tzaj tib'aja, e tkub' tz'aq wib'aje. O'kx txi'ya, b'inchama aju ma txi nma'ne teya ex q'intza qe tal chip, chi Rebeca.

¹⁴Xi'tzun Jacob q'ilte kye tal chip ex xi tq'o'n te ttxu'. Ok ten ttxu' b'inchalte chib'j k'ok'j ik tza'nx tgan Isaac.

¹⁵Tzajtzun ti'n Rebeca t-xb'alun Esaú aju tnejel tal. Aju xb'alun lu tb'anil, ex k'u'ntoq tu'n Rebeca tuj tja. Ok tq'o'n xb'alun lu ti'j Jacob aju tkab'in tal,

¹⁶ex ok tq'o'n kytz'umal tal chip kyi'j tq'ab' Jacob tuk'ix ti'j tqul jatum minti'toq xya'n.

¹⁷Xitzun tq'o'n chib'j tuj tq'ab' Jacob, tuk'ix wab'j aju otoq b'ant tu'n.

¹⁸Okxtzun Jacob jatum ta'toq tman ex xi tma'n te kyja': —Tat, chi Jacob. Xitzun ttzaq'we'n Isaac: —Lu qine lu. ¿Alkyeya, nky'ajal?

¹⁹Xitzun tma'n Jacob te tman: —Aqine Esaú aju tnejel tky'ajala. Ma b'ant wu'ne aju saj tma'na weye. Tjaw qe'ya, chyo'na ti'j txkup ma nkamb'aye, tu'ntzun nkub' tky'iwla'na.

²⁰Xitzun tqanin Isaac: —¿Tza'n tten xknet naj tu'na, nky'ajal? Xi ttzaq'we'n Jacob: —Ate Qman Dios ma onin weye tu'n tknet naj.

²¹Xi tma'n Isaac: —Laq'etza ex k'okel nmako'ne ti'ja nky'ajal, qa ax tok aya Esaú ex qa mi'n, chi Isaac.

²²Xitzun laq'e' Jacob twitz tman. Atzunte tman ok tmako'n ex tma kyja': —Aju tq'ajq'ajel wib'aj te Jacob, atzun qe q'ab'aj te Esaú, chi Isaac.

²³Minti' el tnik' ti'j tu'nju attoq nim xya'n kyi'j tq'ab', ik tza'n kyi'j tq'ab' Esaú aju ttzik. Tej kyja'toq tkub' tky'iwla'n,

²⁴xi tqanin juntl maj te: —¿Axpe tok aya Esaú aju nky'ajale? Xi ttzaq'we'n Jacob: —Ax tok aqine.

²⁵Xi tma'ntl Isaac: —Q'intza chib'j tu'n t-xi nchyo'ne aju xkub' tu'na nky'ajal, tu'ntzun tkub' nky'iwla'na, chi Isaac. Xitzun tq'o'n Jacob tchi' tman tuk'ix ta'l twitz uva. O wa'n ex o k'an Isaac.

²⁶Xitzun tma'n Isaac te tky'ajal: —Laq'etza nky'ajal, ex tz'ub'an ela nwitze.

²⁷Xi laq'e' Jacob ex el ttz'ub'an twitz tman. O tna' Isaac tk'ok'jal t-xb'alun ex kub' tky'iwla'n kyu'n qe yol lu: Ax tok, a tk'ok'jal nky'ajale jlu ik tza'n tk'ok'jal tuj kojb'il aju o kub' tky'iwla'n Qman.

²⁸Tzajwit tq'o'n Dios jb'al teya twitz kya'j, nimxwit twitz tawala tz'ok twitz tx'otx', ex tenwt nim triw ex nim ta'l twitz uva tuk'ila.

²⁹Che ajb'enwit xjal kyuj txqantl tnam teya ex che kub'wit ẍmeje' twitza qe xjal ate' kyuj txqantl nasyon. Tz'okxwita te kawil kyib'aj tiyjil termaniya ex che kub'wit mok'e' qe tiyjil tal ttxu'ya twitza. Tzajwit mya b'a'n kyib'aj qeju kxel kyqanin mya b'a'n tib'aja ex che kub'wit ky'iwla'n qeju che b'el ky'iwlante teya, chi Isaac.

³⁰B'ajtzun ky'iwla'n Jacob tu'n Isaac, ex matoq nne'x jatum ta'toq tman tej tul meltz'aj Esaú kamb'al.

³¹Ax ikx te Esaú b'aj tb'incha'n chib'j k'ok'j, xi ti'n te tman ex xi tma'n te kyja': —Tjaw qe'ya tat, ex chyo'na ti'j txkup ma kub' wu'ne, aqine tky'ajala, tu'ntzun nkub' tky'iwla'na.

³²Xitzun tqanin Isaac te: —¿Alkyetzuna? Xi ttzaq'we'n Esaú: —Aqine Esaú aju tnejel tky'ajala, chi Esaú.

³³Jawtzun lu'lun Isaac nimxix ex xi tma'n te kyja': —¿Alkyetzun xi aj kamb'al ex ma tzul ti'n chib'j weye? Ma b'aj nchyo'ne tkyaqil tej na'nxtoq tula. Ma kub' nky'iwla'ne, ex ja'lo ky'iwlamajtl.

³⁴Tejtzun tb'inte Esaú aju tma tman, ok ten oq'el kyuwxix, ex jaw tq'ajq'ajel twi' b'isb'ajilxix: —Tat, ax ikx weye chin tky'iwlan kub'a, chi Esaú.

³⁵Xi tma'n Isaac: —Ma tzul aj termaniya, ma chin kub' t-sb'u'n, ex ma tk'am ky'iwb'il aju tetoqa.

³⁶Xi ttzaq'we'n Esaú. —Tuj tumelxlo Jacob tb'i toksa'n. Atzun tkab'in maj lu chin kub' t-sb'u'n. Tnejel o tz'el ti'n woklene te tnejel k'wa'lb'aj, atzun ja'lo ma tz'el ti'n ky'iwb'il, aju wetoqe. ¿Minti'pe juntl ky'iwb'il ma kyaj tklo'na te weye? Chi Esaú.

³⁷Xi ttzaq'we'n Isaac te Esaú kyja': —Ma txi nq'o'ne toklen Jacob tu'n tkawin tib'aja ex ma che'x nq'o'ne kykyaqil qe tiyjila te tmajen, ax ikx ma txi nma'ne tu'n tten nim triw ex nim ta'l twitz uva tuk'il. Nky'ajal, ¿titzun kb'antel ti'ja wu'ne ja'lo?

³⁸Xi tma'ntl Esaú te tman: —Tat, ¿o'kxpe junx ky'iwb'il at tuk'ila? Ax ikx weye chin tky'iwlan kub'a, chi Esaú. Jaw oq'tl Esaú.

³⁹Xitzun tma'n Isaac te Esaú kyja': Knajala najchaq ti'j tb'anil tx'otx' ex najchaq ti'j jb'al twitz kya'j.

⁴⁰Ok tkla' tib'a tu'n t-spadiya ex k'okela tmajen termaniya; oktzun tok tipuna, kkolpetela tjaq' tkawb'il.

⁴¹Eltzun ik'un Jacob tu'n Esaú tu'n tlaj ky'iwb'il xi q'o'n te tu'n tman, ex tma Esaú tuj tanmi: Ch'ix tpon tq'ijlalil tu'n tkyim nmane, ex te tib'ajxi jlu kb'el nb'yo'ne witz'ine Jacob.

⁴²Tejtzun tb'inte Rebeca aju in ximantoq Esaú ti'j, xi tma'n tu'n t-xi txokb'aj Jacob aju tkab'in tal. Xitzun tma'n te kyja': Taj ttzika Esaú tu'n tkub' b'yo'na tu'n, tu'ntzun t-xelin aju mya b'a'n tb'inchaya ti'j.

⁴³Atzun ja'lo wal, b'intza aju kxel nma'ne teya. B'incham ttena ex txi oqa tja nxib'ane Labán, aju najl tuj Harán.

⁴⁴Tena tuk'il junjun q'ij, akux in b'aj tq'oj ttzika,

⁴⁵akux in b'aj ttx'u'jil ti'ja, ex akux nnik' tna'l tu'n aju tb'inchaya ti'j. B'a'ntzun t-xi nsama'ne jun xjal txkolte teya tu'n tajtza. Mi'n waje tu'n kynaj qe kab'e wale te junx q'ij.

⁴⁶Xitzun tma'n Rebeca te Isaac: Mya b'a'n atine kyu'n qe xu'j aj Heteo, aqeju kab'e t-xu'jil Esaú. Qa ma moje' Jacob tuk'il jun xu'j aj Heteo ik tza'n qe jlu, aqeju najl tzalu tuj Canaán, maslo b'a'n tu'n nkyime, chi Rebeca.