Read kumam Génesis 28 Bible Online

Génesis 28 - kumam bible

Génesis 28

¹Txket Jacob tu'n Isaac, kub' tky'iwla'n ex xi tma'n te kyja': Mi'n moje'ya tuk'il jun xu'j aj Canaán.

²B'incham ttena, txi'ya tuj tx'otx' Padan-aram, max tja tchmana Betuel, ex moje'ya ma chixin tuk'il jun tme'jel Labán aju t-xib'an ttxu'ya.

³Awt Dios ky'iwlante teya, aju Dios at tipumal tu'n tb'ant tkyaqil tu'n, chmet-xwit nim tiyjila, ex che elwit poq'l nimku k'loj xjal ti'ja.

⁴Tzajwit tq'o'n teya ex kye tiyjila aju ky'iwb'il tzaj ttziyan te Abraham, ex tz'okwita tajwil tx'otx' lu jatum najl qo' ja'lo ik tza'n stranjer xjal, aju tx'otx' o tzaj ttziyan Dios te Abraham, chi Isaac.

⁵Kyja'tzun tten, xi sama'n Jacob tu'n Isaac tuj Padan-aram. Pontzun Jacob tja Labán aju tky'ajal Betuel aju aj Arameo; ate Labán t-xib'an Rebeca, aju kytxu' Jacob ex Esaú.

⁶O tb'i Esaú otoq kub' ky'iwla'n Jacob tu'n Isaac, ex otoq txi t-sama'n tuj Padan-aram tu'n tmoje' ma chixin, ex tej tkub' tky'iwla'n Isaac otoq txi tma'n te kyja': Mi'n moje'ya tuk'il jun xu'j aj Canaán.

⁷Ax ikx o tb'i Esaú otoq txi tniman Jacob tyol tman ex tyol ttxu', ex otoq txi' tuj Padan-aram.

⁸Kyja'tzun el tnik' Esaú ti'j, mya b'a'n in che e'la qe xu'j aj Canaán tuj twitz Isaac aju tman.

⁹Xi'tzun Esaú tuk'il Ismael aju tky'ajal Abraham, ex moje' tuk'il Mahalat, aju tanb' Nebaiot ex tme'jel Ismael, ex mya o'kx jlu, ax ikx attoq mastl t-xu'jil.

¹⁰Etztzun Jacob tuj Beerseba tu'n tpon tuj Harán.

¹¹Pon tuj jun lugar ex ax kyaj ten te qonik'an tu'nju otoq tz'ex q'ij. Ax jaw ti'n jun ab'j ma chixin ex kub' tq'o'n te t-xwi' ex kub' tan tuj lugar lu.

¹²Ok jun twitzik' ex o til lu jun scaler xi'yni twitz tx'otx' japun b'aj max twitz kya'j. Lu qe t-anjel Dios in che jaxtoq ex in che ku'tztoq twi scaler.

¹³Ax ikx o til Jacob lu Qman wa'ltoq max twi scaler, ex tzaj tma'n te kyja': Aqine Tmana, aju Tdios tchmana Abraham ex Tdios tmana Isaac. Teya ex kye tiyjila kxel nq'o'ne tx'otx' jatum tx'ayl tkub'a ja'lo.

¹⁴Che chmetel qe tiyjila wu'ne ik tza'n tquqil tx'otx', kb'ajel kysipan kyib' jawni ex kub'ni, okni ex elni; noq tu'n tlaja ex tu'n kylaj tiyjila, che b'el ky'iwla'n kykyaqil xjal twitz tx'otx'.

¹⁵Lu qine atine tuk'ila; k'okel nkwentine noq jatumchaq kpola, ex k'ajetz meltz'aja wu'ne juntl maj tuj tx'otx' lu. Mlay kyaj nkolina qa na'nxtoq tjapun aju in xi nma'ne teya, chi Dios.

¹⁶Tejtzun tel twatl Jacob kub' t-ximan: Ax tok at Qman tuj lugar lu ex minti'toq b'a'n wu'ne.

¹⁷Tzaj t-xob'il ex tma: Xob'ajilxix te lugar lu. A jlu tja Dios ex ttzi kya'j.

¹⁸Te prim tuj juntl q'ij jaw we' Jacob, jaw ti'n aju ab'j otoq tz'ajb'en te t-xwi', jaw twab'an te jun techal ex kub' tqo'n aseyt tib'aj.

¹⁹Betel[16] tb'i lugar lu ok tq'o'n, maske Luz tb'i tnam nej.

²⁰Xitzun ttziyan Jacob jun yol te Qman ex tma kyja': Qa ma txi' Dios wuk'ile, qa ma chin ok kwentine tu'n tuj nb'eye, qa ma tzaj tq'o'n nwaye tuk'ix nxb'alune,

²¹qa b'a'n ma chin pon meltz'aje tja nmane, k'okeltzun Qman te Ndiose.

²²Aju ab'j ma jaw nwab'ane te jun techal, k'okel nq'o'ne te tja Dios, ex kxel nq'o'ne teya aju tlaji'n ti'j tkyaqilju ktzajel tq'o'na weye, chi Jacob.