Read kumam Génesis 29 Bible Online

Génesis 29 - kumam bible

Génesis 29

¹Kub'tzun b'e tu'n Jacob ex pon tuj kytx'otx' xjal tuj tjawitz q'ij.

²O til Jacob jun xoch tuj kojb'il, in che ojlantoq ox k'loj ẍne'l niqayin ttzi' tu'nju atzun in che k'an qe alumaj a'. Tkub'sa'ntoq jun ab'j matij te maqsib'l ttzi xoch.

³Ok tok kyjunin kyib' kykyaqil qe ẍne'l ttzi xoch, in jawtzun kyi'n pastor aju ab'j tkub' te maqsib'l ttzi' tu'ntzun kyk'an ẍne'l a'. Oktzun kyb'aj k'an ẍne'l, in kub'tl kyq'o'n ab'j te maqsib'l ttzi xoch.

⁴Xitzun tqanin Jacob kye pastor: —¿Jatum tzajni qeye, nxjalil? Xi kytzaq'we'n pastor: —Aj Harán qo'ye.

⁵Xi tqanintl Jacob: —¿Ojtzqi'npe Labán kyu'ne, aju tiyjil Nacor? Xi kytzaq'we'n pastor: —Ojtzqi'n.

⁶Xi tqanintl Jacob: —¿B'a'npe ta' Labán? Ex kymatzun pastor: —B'a'n ta'. Ke'yinxa, lu Raquel aju tme'jel tzul kyuk'ix t-ẍne'l.

⁷Xitzun tma'n Jacob kye pastor: —Atx q'ij ex junya'x. Na'nx tpon or tu'n kyok chmet alumaj. Kyq'onxe kyk'a ẍne'l a' ex kyxi'tle pastoril kye.

⁸Xi kytzaq'we'n pastor: —Mlay b'ant ikju, maxitzun kjawil q'it ab'j tkub' ttzi xoch okxi kyul b'aj kykyaqil ẍne'l tu'ntzun kyk'an a'.

⁹Kukxtoq tyolin Jacob kyuk'il pastor tej tul Raquel kyuk'il t-ẍne'l tman, tu'nju atoq Raquel tok te pastor kye ẍne'l.

¹⁰Tej t-xi tke'yin Jacob lu Raquel aju tme'jel Labán aju t-xib'an ttxu', kyuk'ix t-ẍne'l Labán, xi'tzun naj Jacob ex jaw ti'n aju ab'j tkub'toq ttzi xoch ex e k'an qe t-ẍne'l Labán tu'n, aju t-xib'an ttxu'.

¹¹El ttz'ub'an Jacob twitz Raquel ex ok ten oq'el.

¹²Xi tma'n Jacob te Raquel kyja': Aqine Jacob, tal Rebeca aju tanb' tmana, chi Jacob. Xi'tzun qelan Raquel q'malte te tman.

¹³Tej tb'inte Labán tqanil ti'j Jacob aju tal tanb', etz qelan k'molte te, b'aj tchle'n, el ttz'ub'an twitz ex xi ti'n tja. Oktzun ten Jacob q'malte tkyaqilju otoq b'aj ti'j.

¹⁴Xitzun tma'n Labán te kyja': Ax tok, at nxilene tuk'ila, chi Labán. Kyaj ten Jacob tuk'il Labán jun xjaw.

¹⁵Xitzun tma'n Labán te Jacob: —Mlay tz'aq'nana wuk'ile noq kukx. Baqa tu'nju at nxilene tuk'ila k'aq'nala wuk'ile noq kukx. Q'mantza weye jte' twi tk'u'ja.

¹⁶Attoq kab'e tme'jel Labán: Aju tzikb'aj Lea tb'i; atzunte tz'inb'aj Raquel tb'i.

¹⁷Ate Lea myaxix b'a'n che ke'yin qe tb'aq' twitz, atzunte Raquel tb'anilxix ke'yin twitz tuk'ix tkyaqil t-ximlal.

¹⁸Tu'nju otoq t-xo' tgan Jacob ti'j Raquel, tma: —Chin aq'nale wuq ab'q'i tuk'ila ti'j Raquel aju tme'jela tz'inb'aj, chi Jacob.

¹⁹Xi ttzaq'we'n Labán kyja': —Maslo b'a'n tu'n t-xi nq'o'ne teya twitzju tu'n t-xi nq'o'ne te junxitl xjal. Tencja wuk'ile, chi Labán.

²⁰Kyja'tzun aq'nan Jacob wuq ab'q'i ti'j Raquel, ex aju wuq ab'q'i mer ik tza'n noq jte' q'ij e'la tuj twitz Jacob, tu'nju at nimxix tgan ti'j.

²¹Xitzun tma'n Jacob te Labán kyja': —Q'ontza nxu'jile tu'n nmoje'ye tuk'il, tu'nju ma japun b'aj tyemp wu'ne, aju xi nma'ne teya.

²²E tzajtzun ttxko'n Labán kykyaqil qe tvesin, ex ok jun nintz wa'n kyu'n tej tb'ant mejeb'le'n.

²³Te qonik'an tzaj ti'n Labán tme'jel aju Lea tb'i, xi tq'o'n te Jacob, ex kub' tan Jacob tuk'il.

²⁴Xi tq'o'n Labán jun tmajen xu'j te Lea te ajb'el te, Zilpa tb'i.

²⁵Tejtzun t-sqix te juntl q'ij, el tnik' Jacob ti'j atoq Lea. Xitzun tma'n te Labán: —¿Ti ma tb'inchaya wi'je? ¿Baqa mya ti'j Raquel o chin aq'nane tuk'ila? ¿Tiqu'ntzun ma chin kub' t-sb'u'na?

²⁶Xi ttzaq'we'n Labán: —Minti' in b'ant qu'ne ikju, tu'n tmoje' jun qme'jele tz'inb'aj nej twitz tzikb'aj.

²⁷E tjapun b'aj wuq q'ij ninq'ij tu'na te mejeb'le'n ti'j Lea, ex b'a'ntzun t-xi nq'o'ne Raquel teya, qa ma kub' tuj twitza tu'n taq'nana wuqtl ab'q'i wuk'ile.

²⁸Kub'tzun tuj twitz Jacob ikju, ex japun b'aj wuq q'ij ninq'ij tu'n ti'j mejeb'le'n. Xitzun tq'o'n Labán tme'jel aju Raquel tb'i, tu'n tok te t-xu'jil Jacob.

²⁹Ax ikx xi tq'o'n Labán jun tmajen xu'j te Raquel tu'n tajb'en te, Bilha tb'i.

³⁰Moje'tzun Jacob tuk'il Raquel, ex o tk'ujla nimxix wen, mas o tk'ujla twitz Lea, ex aq'nan tuk'il Labán wuqtl ab'q'i.

³¹O til Qman myaxix k'ujla'ntoq Lea tu'n Jacob, ex o onin ti'j tu'n ttzaj tal; atzunte Raquel mib'antoq alin.

³²Oktzun ten tal Lea. Tej tul itz'j tal, Rubén tb'i ok tq'o'n, ex tma kyja': Ma tzaj tke'yin Qman atine tuj b'is. Tu'ntzun jlu chin k'ujlanjtzele ja'lo tu'n nchmile, chi Lea.

³³Ok ten juntl tal Lea. Tej tul itz'j tmatl kyja': Tu'nju ma tb'i Qman myaxix k'ujla'n qine, ma tzaj tq'o'n juntl wale, chi Lea. Tu'ntzun jlu, Simeón tb'i ok tq'o'n.

³⁴Ok ten juntl tal Lea. Tej tul itz'j tmatl kyja': Atzun ja'lo ktel mas tmojb'ab'l tib' nchmile wuk'ile, tu'nju ma che tzaj ox tky'ajal wi'je, chi Lea. Tu'ntzun jlu, Leví tb'i ok tq'o'n.

³⁵Ok ten juntl tal Lea. Tej tul itz'j tmatl kyja': Atzun ja'lo kjawil nnimsa'ne tb'i Qman, chi Lea. Tu'ntzun jlu, Judá tb'i ok tq'o'n. We'tzun tu'n ttzaj tal.