Read kumam Génesis 3 Bible Online

Génesis 3 - kumam bible

Génesis 3

¹Atzunte lob'aj mastoq jawni twitz kywitz kykyaqil txkup ate' tuj k'ul, aqeju otoq che b'ant tu'n Qman Dios. Xitzun tqanin lob'aj te xu'j kyja': —¿Maj o tzaj tma'n Dios kyeye tu'n mi'n t-xi kylo'ne twitz tkyaqil tze' kyxol awal lu?. Chi lob'aj.

²Xitzun ttzaq'we'n xu'j te lob'aj kyja': —B'a'n t-xi qlo'ne kywitz tze' kyxol awal lu,

³atzun ti'j twitz tze' tkub' tuj tmij awal tzaj tma'n Dios kyja': Mi'n txi kylo'ne ex mi'n tz'ok kymako'ne, tu'ntzun mi'n kykyime, chi Dios qeye.

⁴Xitzun tma'n lob'aj te xu'j kyja': —Mlay che kyime.

⁵Porke ojtzqi'n tu'n Dios, ok t-xi kylo'ne twitz tze' lu, kjaqetel kynab'le, che okele ik tza'n te Dios ex k'elel kynik'e ti'j b'a'n ex ti'j mya b'a'n, chi lob'aj.

⁶Tej ttil xu'j b'a'ntoq tlo'njtz twitz tze', tb'aniltoq ke'yin ex attoq tajb'en tu'n tok tnab'l, eltzun ti'n twitz tze' ex xi tlo'n; ax ikx xi tq'o'n te tchmil. Ax ikx te xi tlo'n.

⁷Jaqettzun kynab'l ex el kynik' kyi'j minti'toq kyxb'alun toksa'n. B'ajtzun kyslapun qe t-xaq higo te kylanter te txayb'il kye.

⁸Xi tb'i'n Adán tuk'ix t-xu'jil in b'ettoq Qman Dios t-xol awal tej otoq chewix q'ij te qale. Xitzun kyewan kyib' twitz Qman Dios kyxol tqan awal.

⁹Oktzun ten Qman Dios txkolte Adán, chi kyja': —¿Jatum ta'ya?

¹⁰Xitzun ttzaq'we'n Adán kyja': —Ma nb'iye in b'ettoqa t-xol awal ex ma tzaj nxob'ile tu'nju minti' txayb'il weye toksa'n. Tu'ntzun jlu ma txi wewan wib'e twitza, chi Adán.

¹¹Xitzun tma'n Dios te kyja': —¿Alkye ma q'mante teya tu'nju minti' txayb'il teya toksa'n? ¿Qape ma txi tlo'na twitz tze' o txi nma'ne teya tu'n mi'n txi tlo'na?.

¹²Xitzun ttzaq'we'n Adán kyja': —Aju xu'j tzaj tq'o'na te wuk'ile, atzunju saj q'onte twitz tze' weye, ex ma txi nlo'ne.

¹³Xitzun tma'n Qman Dios te xu'j kyja': —¿Alkye ma tb'inchaya? Xitzun tma'n xu'j kyja': —Aju lob'aj ma sb'unte weye, ex ma txi nlo'ne.

¹⁴Xitzun tma'n Qman Dios te lob'aj kyja': —Tu'nju ma tb'inchaya jlu, o'kx teya kb'el tcastiwoya kyxol kykyaqil alumaj ex kyxol kykyaqil txkup ate' tuj k'ul. Ok tb'eta, kxe'l tjaqu'n tk'u'ja twitz tx'otx', ex quq kxel tlo'na kyuj kykyaqil q'ij ktela twitz tx'otx'.

¹⁵Kb'el nq'o'ne q'oj kyxole tuk'il xu'j, ex kyxol tiyjila tuk'il tiyjil xu'j. Aju tiyjil xu'j kb'el pa'n twi'ya tu'n, atzun teya k'okel ttx'a'na t-xe tqan, chi Dios.

¹⁶Xitzun tma'n te xu'j kyja': —K'okel nq'o'ne mas nim ta'w ti'ja ok kyul itz'j tala, ex tuk'il k'ixk'oj che ul itz'j tala. Nim ok tajb'eya tchmila, atzun tchmila kkawil tib'aja, chi Dios.

¹⁷Xitzun tma'n te Adán kyja': —Tu'nju ma txi tnimana tyol t-xu'jila, ex ma txi tlo'na twitz tze' aju xi nma'ne teya: Mi'n txi tlo'na twitz, nchitzune, ja'lotzun kb'el t-sentens tx'otx' tu'n tlaja; tuk'il siktle'n knetel twaya twitz tx'otx' kyuj kykyaqil q'ij ktela twitz.

¹⁸Tzul tpoq'sa'n tx'otx' ch'i'x k'ul ex txqantl k'ul kyxol tawala ex kxel tchyo'na itzaj at tuj kojb'il.

¹⁹K'elel a' ti'j twi'ya tu'n tknet twaya okxi taj meltz'aja tuj tx'otx', porke ti'j tx'otx' kub' b'incha'na; tquqil tx'otx'a, ex ax tquqil tx'otx' k'okela ok tkyima, chi Dios.

²⁰Eva[2] tb'i t-xu'jil Adán ok tq'o'n tu'nju atzun k'okel te kytxu' kykyaqil xjal che ul itz'j.

²¹Kyi'j kytz'umal alumaj kub' tb'incha'n Qman Dios t-xb'alun Adán tuk'ix te t-xu'jil, oktzun tq'o'n kyi'j.

²²Tma Qman Dios kyja': —Lu ma tz'ok Adán ik tza'n jun qe. Ma tz'el tnik' ti'j b'a'n ex ti'j mya b'a'n. Ja'lotzun, mya yajku txi tnuqpi'n tq'ab' ti'j ju tze' in tq'o'n chwinqlal tu'n t-xi tlo'n twitz, ex jaku tz'anq'in te jumajx, chi Dios.

²³Tu'ntzun jlu etz tlajo'n Qman Dios Adán tuj awal Edén tb'i, tu'n tb'aj taq'na'n tx'otx' jatum jatz q'i'n ttx'otx'il.

²⁴Tejtzun tetz tlajo'n, e kub' tq'o'n querubín ttxlaj awal tuj tjawitz q'ij, tuk'ix jun spad in k'anttoq ex in yukchtoq tuj tkyaqil pak', tu'ntzun mi'n kyokx xjal ti'j ju tze' in tq'o'n chwinqlal.