Read kumam Génesis 30 Bible Online

Génesis 30 - kumam bible

Génesis 30

¹Tej tke'yinte Raquel minti'toq in tzaj tk'wa'l Jacob ti'j, tzaj tlo'ch tk'u'j ti'j Lea aju ttzik, ex xi tma'n te Jacob kyja': —Jat wale tu'na; qa mi'n, chin kymele, chi Raquel.

²Tzajtzun tq'oj Jacob ti'j Raquel, ex xi tma'n te kyja': —¿Baqa Dios qine? Tu'n te Dios minti' in tzaj tala.

³Xitzun tma'n Raquel te: —Lu nmajene Bilha lu. Mojb'anku tib'a tuk'il. Oktzun ttzaj tal, a jlu mer ik tza'n weye wal otoq tzul itz'j. Kyja'tzun tten che okel te wale qe tal che ul itz'j, chi Raquel.

⁴Kyja'tzun tten xi tq'o'n Raquel aju tmajen Bilha tb'i te Jacob tu'n tok te t-xu'jil. Kub'tzun tmojb'an tib' Jacob tuk'il Bilha.

⁵Oktzun ten tal Bilha ex tzaj jun tky'ajal Jacob ti'j.

⁶Tmatzun Raquel kyja': Ma tzaj tb'incha'n Dios wi'je, ma tzaj tb'i'n aju nna'j Diose ex ma tzaj tq'o'n jun wale, chi Raquel. Tu'ntzun jlu, Dan tb'i ok tq'o'n.

⁷Ok ten juntl tal Bilha aju tmajen Raquel, ex tzaj juntl tky'ajal Jacob ti'j.

⁸Tmatl Raquel kyja': Nim ma tz'ok tilil wu'ne tu'n nkamb'ane ti'j ntzike ex ma kub' ti'j wu'ne, chi Raquel. Tu'ntzun jlu, Neftalí tb'i ok tq'o'n.

⁹Tejtzun tke'yinte Lea minti'tl o tzaj tal, tzaj ti'n tmajen aju Zilpa tb'i, ex xi tq'o'n te Jacob tu'n tok te t-xu'jil.

¹⁰Tejtzun ttzaj jun tky'ajal Jacob ti'j Zilpa,

¹¹tma Lea kyja': B'a'nxix ma tz'ok, ex Gad tb'i ok tq'o'n.

¹²Te tib'ajxi jlu ul itz'j juntl tky'ajal Jacob ti'j Zilpa,

¹³kyja'tzun tmatl Lea kyja': Nim tzalajb'il weye. Ok kyma' qe xu'j weye, tuj tzalajb'il atine, chi Lea, ex Aser tb'i ok tq'o'n.

¹⁴At jun q'ij xi' Rubén tuj kojb'il tuj tq'ijlalil ok in jaw chmet twitz triw. Ok noj ti'j jun wiq lo'j mandrágora tb'i, ex tzaj ti'n te Lea aju ttxu'. Tejtzun tke'yinte Raquel lo'j, xi tma'n te Lea kyja': —Chin kub'sale teya, q'ontza kab'e weye nlo' mandrágora kyi'j qeju ẍe ul ti'n tala.

¹⁵Xi ttzaq'we'n Lea: —¿Ch'inpetzun t-xilen o tz'el ti'na nchmile, ax ikx ja'lo tajb'ila tu'n kyel ti'na qe mandrágora ẍe ul ti'n wale? Xi tma'n Raquel te: —Jaku kub' tan Jacob tuk'ila te qonik'an ja'lo te kyxel qe tmandrágora tala.

¹⁶Tej tul meltz'aj Jacob tuj kojb'il te qale, etz Lea kanul ti'j ex xi tma'n te kyja': —Ja'lo a kb'el tana wuk'ile, tu'nju ma chjeta wu'ne kyu'n qe mandrágora ẍe ul ti'n wale, chi Lea. Axtzun tan Jacob tuk'il Lea te qonik'an lu.

¹⁷Tb'i Dios tna'j Dios Lea, ok ten tal ex ul itz'j aju tjwe'yin tky'ajal Jacob ti'j.

¹⁸Tmatzun Lea: Ma tzaj tq'o'n Dios jun chojb'il weye tu'nju xi nq'o'ne nmajene xu'j te nchmile tu'n tkub' tmojb'an tib' tuk'il, chi Lea. Tu'ntzun jlu, Isacar tb'i ok tq'o'n.

¹⁹Te tib'ajxi ok ten juntl tal Lea ex ul itz'j aju tqaqin tky'ajal Jacob ti'j.

²⁰Tmatzun Lea: Ma tzaj tq'o'n Dios jun tb'anil oyaj weye. Ja'lo a ktel nchmile wuk'ile tu'nju ma tzaj qaq tky'ajal wi'je, chi Lea. Tu'ntzun jlu, Zabulón tb'i ok tq'o'n.

²¹Te tib'ajxi ul itz'j juntl tal Lea tme'jel Jacob, ex Dina tb'i ok tq'o'n.

²²Tzajtzun na'n Raquel tu'n Dios, tzaj tb'i'n tna'j Dios ex b'ant talin.

²³Ok ten tal ex ul itz'j tal ex tma kyja': Ma tz'el ti'n Dios nch'ixwiye tu'nju minti' in tzaj wale, chi Raquel.

²⁴Ex tmatl: Awt Qman tzaj q'onte juntl wale, chi Raquel, ex José tb'i ok tq'o'n.

²⁵Tul-lenxi itz'j José aju tal Raquel, xi tma'n Jacob te Labán kyja': —Q'ontza amb'il weye tu'n waje tuj ntanmiye.

²⁶Q'ontza qe nxu'jile, aqeju in aq'nane kyi'j, kyuk'ix qe nk'wa'le, ex chin ttzoqpintza tu'n waje. B'a'n tu'na nik'pun ma chin aq'nane tuk'ila.

²⁷Xitzun ttzaq'we'n Labán: —B'inchama xtalb'il ax tena wuk'ile. Ma chin pone ti'j, noq tu'na ma chin kub' tky'iwla'n Qman.

²⁸Q'mantza jte' twi tk'u'ja taja ex kxel nq'o'ne.

²⁹Xitzun tma'n Jacob: —B'a'n tu'na tza'n tten o chin aq'nane tuk'ila ex tza'n tten o che k'ujlet qe taluna wu'ne.

³⁰Tej na'nxtoq wule mya nimtoq taluna. Atzun ja'lo o chmet nimxix ex o kub' ky'iwla'na tu'n Qman wul-lene tuk'ila. ¿Jtojtzun b'a'n ttzyet waq'nane tu'n kyanq'in qe nk'wa'le?

³¹Xi tqanin Labán juntl maj: —¿Alkye kxel nq'o'ne teya? Xi ttzaq'we'n Jacob: —Minti' alkye tu'n ttzaj tq'o'na weye. Qa jaku kub' tuj twitza aju kxel nma'ne, che okel npastorintle qe t-ẍne'la.

³²Q'ontza amb'il weye tu'n kyel npa'ne kykyaqil qe ẍne'l pint kyi'j, ex qe q'eq kyi'j, ex kykyaqil qe chip pint kyi'j. Atzun jlu k'okel te twi nk'u'je.

³³Kyja'tzun, ok tpona ke'yilte twi nk'u'je, atzun k'elel tnik'a ti'j nb'inchb'ene tz'aqlxix. Kyxol qe walune, qa at jun chip mya pint ti'j ex qa jun ẍne'l mya q'eq ti'j, eleq'tzun qine ti'ja ikju.

³⁴Xi tma'n Labán te: —B'a'n, e tb'ant ik tza'n in tma'na.

³⁵Axtzun q'ij lu e je'l tpa'n Labán kykyaqil qe tman chip at tb'eyil kytzmal ex qe pint kyi'j, kykyaqil qe ttxu chip pint kyi'j, ex qa at ch'in saq kyi'j, ex kykyaqil qe ẍne'l q'eq kyi'j, e je'x tq'o'n kye tky'ajal tu'n kyok kykwentin.

³⁶El tpa'n tib' Labán ti'j Jacob te ox q'ij tb'e. Atzunte Jacob ax kyaj ten pastoril kye txqantl t-ẍne'l Labán.

³⁷Oktzun ten Jacob tx'emil txqan tq'ab' tze' álamo tb'i, juntl almendro tb'i, atzun juntl castaño tb'i, ex e je'l ti'n junjun sil kytxk'omil, tu'ntzun tq'ancha'lin junjun tb'eyil saq kyi'j tq'ab' tze'.

³⁸E tzaj ti'n Jacob qe tq'ab' tze' otoq che b'aj t-silin kyi'j ex e kub' ttxolb'a'n kywitz qe alumaj kyuj chok jatum in che ultoq k'al a'. Atzun in che saqchantoq qe alumaj ok kyul k'al a'.

³⁹Kyja'tzun nno'k ten kyal kywitz qe tq'ab' tze', ex nnu'l itz'j kyal at tb'eyil kytzmal ex pint kyi'j.

⁴⁰In che el tpa'ntoq Jacob qe ẍne'l, qeju at tb'eyil kytzmal ex qeju q'eq kyi'j, ex in che okx tq'o'ntoq kyxol qe te t-ẍne'l. Minti' b'aj t-smo'n qe te t-ẍne'l kyuk'il qe te Labán.

⁴¹Tkyaqil maj ok in che saqchantoq qe alumaj ulni kynab'l, in kub' tq'o'ntoq Jacob qe tq'ab' tze' jatum in che pontoq qe alumaj k'al a', tu'ntzun kyke'yin kyi'j qe tq'ab' tze' ok kysaqchan.

⁴²Oktzun kyul qe alumaj okni kyi'j, minti'toq in che kub' tq'o'n Jacob qe tq'ab' tze'. Kyja'tzun e jo'k te te Labán qe alumaj okni kyi'j, atzun qe alumaj ulni kynab'l e jo'k te te Jacob.

⁴³Oktzun Jacob q'inunxix wen, chmet nim t-ẍne'l, nim tmajen xinaq, nim tmajen xu'j, nim tchej camey ex nim tbur.