Read kumam Génesis 31 Bible Online

Génesis 31 - kumam bible

Génesis 31

¹O tb'i Jacob in che yolintoq tky'ajal Labán ti'j kyja': O tz'el ti'n Jacob tkyaqilju tetoq qman ex ma tz'ok q'inun ti'j ju tetoq qman, che chi.

²Ax ikx el tnik' Jacob ti'j twitz Labán minti'xix in tzalaj ti'j ik tza'n nej.

³Tzajtzun tma'n Qman te Jacob: Taja max tuj tx'otx' jatum najl tmana, jatum ate' qe xjal at t-xilena kyuk'il, ex chin tele tuk'ila, chi Qman.

⁴Xi txokb'aj Raquel ex Lea tu'n Jacob, tu'n kyul tuj kojb'il jatum ta'toq Jacob kyuk'il qe t-ẍne'l,

⁵ex xi tma'n kye kyja': Ma tz'el nnik'e ti'j, minti'xix in tzalaj kymane wi'je ik tza'n nej; atzunte Dios, aju Tdios nmane, kukx at wuk'ile.

⁶B'a'n kyu'ne, o chin aq'nane tuk'il kymane tu'n tkyaqil wipune,

⁷atzunte kymane, o chin kub' t-sb'u'n, ex laj maj o ch'expaj twi nk'u'je tu'n, ex minti' xi tq'o'n Dios amb'il te tu'n tb'inchante mya b'a'n wi'je.

⁸Qa in tzaj tma'ntoq kyja': Kchjetel twi tk'u'ja wu'ne kyu'n qe alumaj pint kyi'j qa chi, oktzun tkub' kyal alumaj, kub' kyal pint kyi'j; ex qa in tzaj tma'ntoq kyja': Kchjetel twi tk'u'ja wu'ne kyu'n qe alumaj at tb'eyil kytzmal, qa chi, oktzun tkub' kyal, kykyaqil kub' kyal at tb'eyil kytzmal.

⁹Kyja'tzun e je'l ti'n Dios kykyaqil qe talun kymane, ex e tzaj tq'o'n weye.

¹⁰At jun q'ij, tej tpon kysaqch alumaj, ok jun nwitzik'e, ex o wile qe ttxu chip in che saqchantoq kyu'n tman chip at tb'eyil kytzmal ex qe pint kyi'j.

¹¹Tzaj tma'n t-anjel Dios weye tuj witzik': —Jacob, chi anjel. —Lu qine lu, nchiye xi ntzaq'we'ne.

¹²Tzaj tma'n weye: —Ke'yinxa ex ok tila'ya, kykyaqil qe tman chip at tb'eyil kytzmal ex pint kyi'j in che saqchan qe ttxu chip kyu'n, porke ma tz'ok nq'o'ne kwent ti'j tkyaqilju o tb'incha Labán ti'ja.

¹³Aqine aju Dios kub' tyek'un tib' twitza tuj Betel, jatum kub' tqo'na aseyt tib'aj ab'j ex tzaj ttziyana jun tyola weye. Ja'lo, we'ktza, texa tzalu ex taja tuj tx'otx' jatum itz'ja, chi Dios.

¹⁴Xi ttzaq'we'n Raquel ex Lea kyja': ¿Atpetzun qoklene ex qa qetzb'ile tuj tja qmane?

¹⁵¿Myapetzun ik tza'n stranjer xjal qo'ye tu'n? O qo etz k'ayine tu'n, ax ikx o txi tk'a'chin tk'u'j tu'n chojb'il qeye kyaj tq'o'na tej tmoje'ya quk'ile.

¹⁶Ax tok, tkyaqil q'inumab'l o tz'el ti'n Dios te qmane, qeye jlu ex kye qale. Tu'ntzun jlu b'inchama tkyaqilju ma tzaj tma'n Dios teya, che chi.

¹⁷E jax tq'o'n Jacob qe tk'wa'l ex qe t-xu'jil kyib'aj chej camey,

¹⁸tzaj ti'n tkyaqilju attoq te, kub' b'e tu'n kyuk'ix kykyaqil qe alumaj, aqeju otoq che tkamb'a tu'n taq'unb'en tuj Padan-aram, ex ajtz tu'n tul juntl maj tuj Canaán jatum najltoq Isaac aju tman.

¹⁹Atzunte Labán otoq txi' matzol ttzmal t-ẍne'l. Ik' telq'a'n Raquel qe sant ate'toq tuj tja tman.

²⁰Kub' sb'u'n Labán aju aj Arameo tu'n Jacob, tu'nju minti' xi tma'n qa tu'n tetz.

²¹Etz oq Jacob tuk'ix tkyaqilju attoq te. Jurat naj ik'tz jlajtzi nima Éufrates ex tzaj b'et tu'n tul kywi' qe witz tuj Galaad.

²²Tujxi toxin q'ij, tb'i Labán otoq tz'etz oq Jacob.

²³Qe xjal attoq kyxilen tuk'il Labán e tzaj ti'n te tuk'il tu'n tul kanun ti'j Jacob, ex tujxi twuqin q'ij tb'e ul knet tu'n kywi' qe witz tuj Galaad.

²⁴Kub' tyek'un tib' Dios twitz Labán aju aj Arameo tuj witzik' te qonik'an, ex tzaj tma'n te kyja': Ten tkwenta ti'ja. Mi'n txi yolina te Jacob tuj tx'u'jb'il, chi Dios.

²⁵Atzun ul knet Jacob tu'n Labán kywi' qe witz tuj Galaad, jatum otoq kub' tq'o'n Jacob tja, xb'alun ja. Ax kub' tq'o'n te Labán tja, kyuk'ix qe xjal at t-xilen kyuk'il.

²⁶Xitzun tma'n Labán te Jacob kyja': —¿Ti ma tb'inchaya? ¿Tiqu'n ma chin kub' t-sb'u'na? Ma che tzaj ti'na qe nme'jele mer ik tza'n qe xjal in che tzyet tuj q'oj ex in che'x q'i'n pres.

²⁷¿Tiqu'n ma chin kub' t-sb'u'na, ex ma tz'etza tuj ewaj? ¿Tiqu'n mi'n ma tzaj tma'na weye tu'n tb'aj nq'olb'e'ne tuk'il tzalajb'il, tuk'il b'itz ex tuk'il tq'ajq'ajel tanpor ex arpa?

²⁸Minti' ma tzaj tq'o'na amb'il tu'n tel ntz'ub'ane kywitz qe nme'jele ex qe tal nchmane. Ma tb'inchaya jlu mer ik tza'n jun xjal minti' tnab'l.

²⁹At wipumale tu'n nb'inchanteye jun mya b'a'n kyi'je; atzunte Tdios tmana saj tma'n weye qonik'an may' kyja': Ten tkwenta ti'ja. Mi'n txi yolina te Jacob tuj tx'u'jb'il, chi Dios.

³⁰Qa tajb'ilxixa tu'n tajtza tja tmana ex tu'ntzun jlu sajtza, ex ¿tiqu'n setz telq'a'na qe nsante?

³¹Xitzun ttzaq'we'n Jacob te Labán kyja': —Tu'nju tzaj nxob'ile twitza. Kub' nximane, yaqa nne'lku t-xk'ayina qe tme'jela nwitze, nchiye.

³²Qatzun at jun qxole tzalu ma che el knet qe t-santa ti'j, b'a'n tu'n tkyim. Qe xjal at qxilen kyuk'il jaku che ok testiw. Q'mantza weye qa at jun ti'xti teya wuk'ile, ex q'inxa, chi Jacob. Minti'toq b'a'n tu'n Jacob qa atoq Raquel otoq tz'etz elq'ante qe sant.

³³Okxtzun Labán tuj tja Jacob, aju xb'alun ja, ex tuj tja Lea, ax ikx okx tuj kyja qe kab'e majen xu'j, pero minti' e knet qe sant tu'n. Tej tetz tuj tja Lea, okx tuj tja Raquel.

³⁴Atzunte Raquel otoq che tzaj ti'n qe sant ex otoq che okx tq'o'n tjaq' tarkiy jun chej camey ex kub' qe' tib'aj. B'aj tjyo'n Labán tuj tkyaqil ja, pero minti' e knet tu'n.

³⁵Xitzun tma'n Raquel te tman: Tat, mi'n tzaj tq'oja wi'je. Mlay b'ant tu'n njaw we'ye twitza tu'nju yab' qine tu'n ẍwo'j, chi Raquel. E b'ajtzun tjyo'n Labán qe sant ex minti'x e knet tu'n.

³⁶Tzajtzun tq'oj Jacob ex xi yolin kyuwxix te Labán, ex xi tma'n te kyja': —¿Titzun ma nb'inchaye? ¿Alkye il ma b'ant wu'ne tu'nju ma tzaj lpe'ya wi'je?

³⁷Ma b'aj tjyo'na t-xol tkyaqilju at weye. ¿Alkyetzun ti'xti teya ma knet tu'na? Q'on kub'a tzalu kywitz qe t-xjalila ex kywitz qe weye, tu'ntzun kymante alkye at til.

³⁸Tuj winqin ab'q'i o chin aq'nane tuk'ila, mi jun t-ẍne'la noq o tz'el tal, mi qe ttxu' tchipa, ex mi jun tman t-ẍne'la o txi nchyo'ne;

³⁹minti' ul wi'ne tuk'ila jun taluna otoq kub' b'yo'n tu'n txkup, noq o'kx o txi nchjo'ne aju otoq naj; qa q'ijl ex qa qonik'an ok t-xi elq'a'n jun alumaj, noq o'kx ok tel tqanina twi' wi'je.

⁴⁰Q'ijl, noq ch'ixmi o chin kyime tu'n ta'w kyaq; atzun qonik'an, noq ch'ixmi o chin kyime tu'n ta'w che'w, ex minti' okx watl tuj nwitze.

⁴¹Winqin ab'q'i o chin tene tjaya. Kyajlaj ab'q'i o chin aq'nane tuk'ila kyi'j kab'e tme'jela, qaq ab'q'i o chin aq'nane kyi'j qe taluna, ex o b'aj tch'expu'na laj maj twi nk'u'je.

⁴²Noqwit mi a'ltoq Dios wuk'ile, aju Tdios nchmane Abraham ex aju Dios o k'ulun nmane Isaac twitz, ax tok owtlo chin etz tlajo'na minti' jun ti'xti q'i'n wu'ne. Ex ma til Dios aju nb'ise ex waq'unb'ene tuk'ila. Tu'ntzun jlu, sok mayo'na tu'n qonik'an may'.

⁴³Xi ttzaq'we'n Labán te Jacob kyja': —Qe xu'j lu nme'jele qe; qe k'wa'l lu tal nchmane qe; ex qe ẍne'l ax weye qe. Tkyaqilju nno'k tke'yina lu weye. ¿Titzun b'a'n tb'ant wu'ne kyi'j qe nme'jele ex kyi'j qe kyal o che ul itz'j?

⁴⁴Ja'lo e tkyaj b'ant ti'j jun yol qxol, tu'ntzun tajb'en te jun testiw qxol qkab'il, chi Labán.

⁴⁵Jawtzun ti'n Jacob jun ab'j, kub' twalb'a'n te jun techal,

⁴⁶ex xi tma'n kye xjal attoq kyxilen tuk'il: Kychmontze ab'j, chi Jacob. Kykyaqiltzun e ok ten chmol ab'j tu'n tb'ant jun b'yuj kyu'n. Atzun e kub' ten wa'l ttxlaj b'yuj ab'j otoq b'aj kyb'uyin.

⁴⁷Oktzun tq'o'n Labán tb'i lugar lu tuj tex tyol, Jegar Sahaduta; atzunte Jacob ok tq'o'n juntl tb'i tuj tex tyol, Galaad.

⁴⁸Tmatzun Labán: Aju b'yuj ab'j lu, atzunju k'okel te testiw qxol qkab'il, chi Labán. Tu'ntzun jlu, Galaad tb'i ok q'o'n,

⁴⁹ex Mispa juntl tb'i ok, tu'nju o tma Labán kyja': Awt Qman k'okel ten xq'uqil qe qkab'il ok tb'aj qpa'n qib' jun ti'j juntl, chi Labán.

⁵⁰Qa ma che kub' tyajla'na qe nme'jele ex qa ma moje'ya kyuk'il txqantl xu'j, maske minti' jun testiw qxol, ex axte Dios testiw qi'j.

⁵¹Ax ikx xi tma'ntl Labán te Jacob: Lu b'yuj ab'j lu, ex lu techal lu, aqeju ma che kub' nq'o'ne qxol qkab'il.

⁵²Aju b'yuj ab'j ex aju techal lu che ajb'el tu'n mi'n wokxe tujxi tmojona b'inchalte jun mya b'a'n ti'ja, ax ikx teya, tu'n mi'n toktza tujxi nmojone b'inchalte jun mya b'a'n wi'je.

⁵³Aju Tdios tchmana Abraham, ex aju Tdios nchmane Nacor, awttzun b'inchante qi'j, chi Labán. Xitzun tma'n Jacob jun yol axix tok twitz Dios, aju o k'ulun Isaac twitz.

⁵⁴Kub'tzun tb'yo'n Jacob alumaj te jun oyaj te Dios twi witz lu, ex e tzaj ttxko'n qe xjal attoq kyxilen tuk'il tu'n kywa'n junx. Kykyaqiltzun e wa'n, ex ax e kub' tan twi witz tuj qonik'an lu.

⁵⁵Te prim te juntl q'ij jaw we' Labán ex el ttz'ub'an kywitz qe tal tchman, ax ikx kye tme'jel; ex te tib'ajxi e kub' tky'iwla'n ex aj meltz'aj tu'n tpon tuj ttanmi.