Read kumam Génesis 33 Bible Online

Génesis 33 - kumam bible

Génesis 33

¹Tejtzun tke'yinte Jacob kyja'toq ttzaj Esaú tuk'ix kyaje syent xinaq tuk'il, e b'aj tpa'n qe k'wa'l t-xol Lea ex Raquel ex kyxol qe kab'e majen xu'j;

²e kub' tnejsa'n Jacob qe kab'e majen xu'j kyuk'il qe kyal, lepchix Lea kyuk'il qe tal, ex mankb'il xi' Raquel tuk'il José.

³Kub'tzun nej Jacob kywitz, ex wuq maj kub' ẍmeje' ex pon takl tib'aj twitz twitz tx'otx', tejxi tul kanun twitz ttzik.

⁴Xitzun qelan Esaú tuk'il, tzaj tchle'n, xi paqe' tib'aj tqul, ex el ttz'ub'an twitz. E jawtzun oq' kykab'il.

⁵Xitzun tke'yin Esaú qe xu'j kyuk'ix qe kyal, ex xi tqanin kyja': —Yajtzun qe jlu, ¿alkye qe? Chi Esaú. —Atzun qe nk'wa'le o che tzaj tq'o'n Dios, aqine ajb'el teya, chi Jacob xi ttzaq'we'n.

⁶E ultzun laq'e' qe majen xu'j kyuk'ix kyal ex e kub' mok'e' twitz tx'otx'.

⁷Ax ikx ul laq'e' Lea kyuk'ix qe tal ex e kub' mok'e'. Te mankb'il ul José tuk'ix Raquel; ax ikx e kub' mok'e'.

⁸Ax ikx xi tqanin Esaú: —¿Alkye t-ximb'etza kyi'j junjun b'yuj alumaj ma che ok nk'ulb'a'ne? Chi Esaú. —Waje tu'n tk'monteya tu'n nkamb'anteye xtalb'il teya, chi Jacob xi ttzaq'we'n.

⁹—Mi'n, witz'in. Ax at nim weye. E tten te teya aju teya, chi Esaú.

¹⁰Xi tma'ntl Jacob kyja': —Mi'n, najsama. Qa ax tok ma nkamb'aye t-xtalb'ila, k'momxa aju oyaj lu tu'nju ma wile twitza; a jlu mer ik tza'n aku Dios ma wile, ex b'a'n ma chin k'mete tu'na.

¹¹In chin kub'sane twitza k'momxa aju oyaj ma tzaj wi'ne teya, porke o chin tzaj xtaline tu'n Dios ex minti' jun atx taj weye. Tu'nju kukx t-xi tma'n Jacob ikju, kub' tuj twitz Esaú tu'n t-xi tk'mo'n aju oyaj,

¹²ex xi tma'n Esaú kyja': —Qo ik' tzalu. Jaku chin kub' neje twitza.

¹³Xi tma'n Jacob kyja': —Tat, b'a'n tu'na, ne'x qe tal k'wa'l, ax ikx uk'in qe ẍne'l wu'ne ex qe wakẍ k'itzqe kub' kyal. Qatzun ma che sikt, tujlo junx q'ij jaku che kyim kykyaqil ẍne'l.

¹⁴Mas b'a'n tu'n t-xi neja nwitze, aqine tmajena; atzun weye, cheb'a chin xe'le, ik tza'nx che b'et qe alumaj aqeju nejni nwitze, ex ik tza'nx che b'et qe tal nk'wa'le, okxi npon kanune tuk'ila tuj Seir, chi Jacob.

¹⁵Xi tma'n Esaú kyja': —B'a'n. Jaku che kyaj nq'o'ne junjun xinaq tuk'ila, aqeju uk'in wu'ne, chi Esaú. Xi tma'n Jacob: —¿Ti kyajb'en qe jlu? O'kx wajb'ile tu'n nkamb'anteye t-xtalb'ila, chi Jacob.

¹⁶Tujxtzun q'ij lu aj meltz'aj Esaú tu'n tpon tuj Seir.

¹⁷Atzunte Jacob kyja' ttzaj tu'n tul tuj Sucot. Atzun jaw tb'incha'n tja ex qe kyja talun. Tu'ntzun jlu Sucot[19] tb'i lugar lu ok tq'o'n.

¹⁸B'a'n ul Jacob tuj tnam Siquem tuj tx'otx' Canaán, tej tajtz meltz'aj tuj Padan-aram, ex atzun kub' ten twitz tnam.

¹⁹Tu'n jun syent saq pwaq o tloq' jun piẍ tx'otx' kye tk'wa'l Hamor aju tman Siquem. Atzun kub' tq'o'n Jacob tja, xb'alun ja.

²⁰Ax ikx jaw tb'incha'n jun altar, ex El-elohe-israel tb'i ok tq'o'n.