Read kumam Génesis 35 Bible Online

Génesis 35 - kumam bible

Génesis 35

¹Tzaj tma'n Dios te Jacob kyja': We'ktza ex tjaxa najal tuj Betel. B'inchan jawa jun altar nwitze ma chixin, aqine Dios aju kub' tyek'un tib' twitza tej tel oqa twitz ttzika Esaú, chi Dios.

²Xitzun tma'n Jacob kye kykyaqil qeju ate'toq tuj tja ex kye kykyaqil qeju ate'toq tuk'il, chi kyja': Kyi'metze kykyaqil tilb'ilal nno'k kydiosine, aqeju e tzaj kyi'ne tuj junxitl tx'otx', che chine tuj a', ex kych'expu'n ele kyxb'alune.

³Qo'qe tuj Betel. Atzun kjawil nb'incha'ne jun altar twitz Dios, aju o tz'onin wi'je tej atintoqe tuj xob'ajil, ex o b'et wuk'ile noq jatumchaq o chin b'ete, chi Jacob.

⁴E je'xtzun kyq'o'n te Jacob kykyaqil qe tilb'ilal nno'k kydiosin, aqeju otoq tzaj kyi'n tuj junxitl tx'otx', kyuk'ix qe tuj ẍkyinb'aj. E ku'x tmaqu'n Jacob tjaq' jun wi' tze' k'ol niqayintoq ttxlaj tnam Siquem.

⁵Tej kyik' tuj lugar lu, tzaj tq'o'n Dios nim t-xob'il kyi'j xjal ate'toq kyuj txqantl tnam kyi'jele, ex minti' e jo'k lpe' q'ojlel kyi'j qe tky'ajal Jacob.

⁶Ul Jacob tuj tnam Luz, kyuk'ix kykyaqil qe xjal uk'intoq tu'n, ex Betel juntl tb'i tnam lu, atzun ta' tuj Canaán.

⁷Jawtzun tb'incha'n jun altar, El-betel[20] tb'i lugar lu ok tq'o'n, tu'nju atzun kub' tyek'un tib' Dios twitz tej tel oq twitz ttzik.

⁸Atzun kyim Débora, aju xu'j otoq tz'ok kwentin te Rebeca, ex ku'x maqu'n tjaq' jun wi' tze' k'ol tjaq' tnam Betel. Alón-bacut[21] tb'i lugar lu ok tq'o'n Jacob.

⁹Tajtzlenxi Jacob tuj Padan-aram kub' tyek'un tib' Dios twitz juntl maj, ex kub' tky'iwla'n.

¹⁰Tzaj tma'n te kyja': Jacob tb'iya, atzun ja'lo mi'n tz'ok q'ma'ntl tb'iya Jacob. Texju ja'lo Israel tb'iya k'okel, chi Dios, ex Israel tb'i Jacob ok tq'o'n.

¹¹Tmatl Dios te kyja': Aqine Dios aju at tipumal tu'n tb'ant tkyaqil tu'n. Chmet-x nim tb'aja ex chmet-x nim tiyjila. Ti'ja k'elel jun nasyon ex nimku tnam, ex kyxol qe tiyjila che elel jlet qe rey.

¹²Aju tx'otx' o txi nq'o'ne te Abraham ex te Isaac, axju kxel nq'o'ne teya, ex te tib'ajxi kxel nq'o'ne kye tiyjila, chi Dios.

¹³Ik'tzun Dios tuj lugar jatum otoq yolin tuk'il Jacob.

¹⁴Tzaj ti'n Jacob jun ab'j, jaw twalb'a'n te jun techal jatum kub' ten Dios yolil tuk'il, kub' tqo'n aseyt ex ta'l twitz uva tib'aj, te jun aq'b'il chjonte te Dios,

¹⁵ex Betel tb'i lugar lu ok tq'o'n, jatum otoq yolin Dios tuk'il.

¹⁶Te tib'ajxitzun e ik' tuj Betel. Tej ch'ixtoq kyul tuj Efrata ul itz'j juntl tal Raquel, ex pen el k'wa'l ti'j.

¹⁷Tej toktoq tuj k'ixk'oj mas kyuwxix, xi tma'n b'etx'lon te kyja': Mi'n xob'a. Xinaq juntl tala ma tzul itz'j, chi b'etx'lon.

¹⁸Ch'ixtoq tkyim Raquel ex tej ch'ixtoq tjaw b'aj t-xew, Benoni[22] tb'i tal ne' ok tq'o'n; atzunte Jacob aju tman ne', Benjamín[23] tb'i ok tq'o'n.

¹⁹Kyja'tzun tten kyim Raquel ex ku'x maqu'n ttxlaj b'e aju in pon tuj Efrata, aju Belén tb'i tok ja'lo.

²⁰Jaw twalb'a'n Jacob jun ab'j te jun techal tib'aj tmuqb'il Raquel. Atzunju techal lu in tyek'un jatum ku'x maqu'n Raquel, ex ax ta' ja'lo.

²¹Ik'tzuntl Israel ex o tentl max ti'jxi Migdal-edar.

²²Tej najltoq Israel tuj tx'otx' lu, at jun maj xi' Rubén ex kub' tan tuk'il Bilha aju t-xu'jil tman. O tb'i Israel jlu. Kab'laj kyb'et tky'ajal Jacob.

²³Qe tky'ajal e tzaj ti'j Lea, atzun qe jlu: Rubén aju tnejel tky'ajal Jacob, tuk'ix Simeón, Leví, Judá, Isacar ex Zabulón.

²⁴Qe tky'ajal e tzaj ti'j Raquel, atzun qe jlu: José ex Benjamín.

²⁵Qe tky'ajal e tzaj ti'j Bilha aju tmajen Raquel, atzun qe jlu: Dan ex Neftalí.

²⁶Qe tky'ajal e tzaj ti'j Zilpa aju tmajen Lea, atzun qe jlu: Gad ex Aser. Kykyaqil qe jlu tky'ajal Jacob qe, aqeju e ul itz'j tuj Padan-aram.

²⁷Ul Jacob ke'yilte Isaac aju tman tuj tnam Mamre, ex ax juntl tb'i tnam lu Arba ex qa Hebrón. Atzun otoq anq'in Abraham tuk'ix Isaac.

²⁸O anq'in Isaac tu'n tkyaqil, 180 ab'q'i.

²⁹Tej otoq tijin Isaac wen jaw b'aj t-xew, kyim ex pon kyuk'il qtzan t-xe'chel. Okxtzun maqu'n tu'n Esaú ex Jacob aqeju tky'ajal.