Read kumam Génesis 36 Bible Online

Génesis 36 - kumam bible

Génesis 36

¹Atzun tx'olb'ab'l jlu kyi'j tiyjil Esaú, aju Edom juntl tb'i.

²Moje' Esaú kyuk'il kab'e xu'j aj Canaán, atzun qe jlu: Ada aju tme'jel Elón aju aj Heteo, tuk'ix Aholibama aju tme'jel Aná, ex tal tchman Zibeón aju aj Heveo.

³Ax ikx moje' tuk'il Basemat aju tme'jel Ismael ex tanb' Nebaiot.

⁴Elifaz tb'i tky'ajal Esaú tzaj ti'j Ada, Reuel tb'i tky'ajal tzaj ti'j Basemat,

⁵ex qe tky'ajal e tzaj ti'j Aholibama, atzun qe jlu: Jeús, Jaalam ex Coré. Atzun qe tky'ajal Esaú jlu e ul itz'j tej najltoq tuj tx'otx' Canaán.

⁶E ik'tzun ti'n Esaú qe t-xu'jil, qe tky'ajal ex qe tme'jel, kyuk'ix kykyaqil qe xjal najltoq tuk'il, ex xi' tuj juntl tx'otx' tu'n tlaq'e' najchaq ti'j Jacob aju titz'in. E je'x ti'n kykyaqil talun tuk'ix tkyaqilju otoq knet tu'n tuj Canaán.

⁷Tu'nju otoq knet nimxix q'inumab'l kyu'n kykab'il, minti' tumel tu'n kykub' ten najal junx; ax ikx aju tx'otx' jatum najltoq qe mlaytoq kanun tu'n kywa'n kyalun.

⁸Kyja'tzun ul Esaú najal tuj tiwitz tx'otx' Seir. Edom juntl tb'i Esaú.

⁹Atzun tx'olb'ab'l jlu kyi'j tiyjil Esaú, aju kyxe'chel aj Edom aqeju e najan tuj tiwitz tx'otx' Seir.

¹⁰Atzun kyb'i tky'ajal Esaú jlu: Elifaz tal Ada, ex Reuel tal Basemat.

¹¹Qe tky'ajal Elifaz, atzun qe jlu: Temán, Omar, Zefo, Gatam ex Cenaz.

¹²Attoq juntl t-xu'jil Elifaz, Timna tb'i. Ul itz'j jun tky'ajal ti'j xu'j lu, Amalec tb'i. Atzun qe tiyjil Ada jlu, aju t-xu'jil Esaú.

¹³Qe tky'ajal Reuel, atzun qe jlu: Nahat, Zera, Sama ex Miza. Atzun qe tiyjil Basemat jlu, aju juntl t-xu'jil Esaú.

¹⁴Aholibama tb'i juntl t-xu'jil Esaú, atzun qe tal jlu: Jeús, Jaalam ex Coré. Ate xu'j lu tme'jel Aná ex tal tchman Zibeón.

¹⁵Atzun qe nejenel kyxol qe tiyjil Esaú. Kyxol qe tky'ajal Elifaz aju tnejel tky'ajal Esaú, atzun qe nejenel jlu: Temán, Omar, Zefo, Cenaz,

¹⁶Coré, Gatam ex Amalec. Atzun qe nejenel kyxol qe tiyjil Elifaz tuj tx'otx' Edom, ex aqe jlu tiyjil Ada.

¹⁷Kyxol qe tky'ajal Reuel aju tky'ajal Esaú, atzun qe nejenel jlu: Nahat, Zera, Sama ex Miza. Atzun qe nejenel kyxol qe tiyjil Reuel tuj tx'otx' Edom, ex aqe jlu tiyjil Basemat aju t-xu'jil Esaú.

¹⁸Kyxol qe tal Aholibama aju t-xu'jil Esaú, atzun qe nejenel jlu: Jeús, Jaalam ex Coré. Aqe nejenel lu e ul itz'j ti'j Aholibama, aju t-xu'jil Esaú ex tme'jel Aná.

¹⁹Atzun qe jlu tiyjil Esaú, ex nejenel qe kyxol qe tiyjil. Edom juntl tb'i Esaú.

²⁰Qe tky'ajal Seir aju aj Horeo, aqeju najltoq tuj tx'otx' lu, atzun qe jlu: Lotán, Sobal, Zibeón, Aná,

²¹Disón, Ezer ex Disán. Atzun qe nejenel kyxol qe aj Horeo, aqeju tiyjil Seir ex atzun najl qe tuj tx'otx' Edom.

²²Qe tky'ajal Lotán, atzun qe jlu: Hori ex Hemam. Timna tb'i tanb' Lotán.

²³Qe tky'ajal Sobal, atzun qe jlu: Alván, Manahat, Ebal, Sefo ex Onam.

²⁴Qe tky'ajal Zibeón, atzun qe jlu: Aja ex Aná. Ate Aná ok noj ti'j jun twi' a' tuj tzqij tx'otx' tej in pastorintoq qe tbur Zibeón aju tman.

²⁵Qe tk'wa'l Aná, atzun qe jlu: Disón tb'i tky'ajal ex Aholibama tb'i tme'jel.

²⁶Qe tky'ajal Disón, atzun qe jlu: Hemdán, Esbán, Itrán ex Querán.

²⁷Qe tky'ajal Ezer, atzun qe jlu: Bilhán, Zaaván ex Acán.

²⁸Qe tky'ajal Disán, atzun qe jlu: Uz ex Arán.

²⁹Qe nejenel kyxol qe aj Horeo, atzun qe jlu: Lotán, Sobal, Zibeón, Aná,

³⁰Disón, Ezer ex Disán. Atzun qe nejenel kyxol junjun k'loj aj Horeo tuj tx'otx' Seir.

³¹Qe rey e kawin tuj tx'otx' Edom tej na'nxtoq tok kyrey qe aj Israel, atzun qe jlu:

³²Bela aju tky'ajal Beor o kawin tuj Edom, ex Dinaba tb'i ttanmi.

³³Tej tkyim Bela o kawin Jobab te t-xel, aju tky'ajal Zera aju aj Bosra.

³⁴Tej tkyim Jobab o kawin Husam te t-xel, tzajnitoq tuj tx'otx' Temán.

³⁵Tej tkyim Husam o kawin Hadad te t-xel, aju tky'ajal Bedad. Ate Hadad o kub' ti'j Madián tu'n tuj q'oj tuj tx'otx' Moab. Avit tb'i ttanmi.

³⁶Tej tkyim Hadad o kawin Samla te t-xel, aju aj Masreca.

³⁷Tej tkyim Samla o kawin Saúl te t-xel, aju aj Rehobot; aju tnam lu tkub'toq ttxlaj nima.

³⁸Tej tkyim Saúl o kawin Baal-hanán te t-xel, aju tky'ajal Acbor.

³⁹Tej tkyim Baal-hanán aju tky'ajal Acbor, o kawin Hadar te t-xel, ex Pau tb'i ttanmi. Mehetabel tb'i t-xu'jil Hadar, aju tal Matred ex tal tchman Mezaab.

⁴⁰Atzun kyb'i qe nejenel jlu kyxol tiyjil Esaú, ik tza'nx kyiyjil ex kynajb'il: Timna, Alva, Jetet,

⁴¹Aholibama, Ela, Pinón,

⁴²Cenaz, Temán, Mibzar,

⁴³Magdiel ex Iram. Atzun qe nejenel kyxol qe aj Edom, ik tza'nx kynajb'il tuj kytx'otx' etzan kyu'n. Edom juntl tb'i Esaú aju kyxe'chel qe aj Edom.