Read kumam Génesis 37 Bible Online

Génesis 37 - kumam bible

Génesis 37

¹Kyajtzun ten Jacob najal tuj tx'otx' Canaán jatum otoq najan tman.

²Atzun tx'olb'ab'l kyi'j qe tky'ajal Jacob jlu. Tej otoq japun José twi' wuqlaj ab'q'i in pastorintoq ẍne'l junx kyuk'il qe ttzik, aqeju tal Bilha ex qe tal Zilpa qe t-xu'jil tman. Kok'x xi tma'n José te tman aju mya b'a'n in kyb'incha'ntoq qe ttzik.

³Mas o k'ujlanjtz José tu'n Israel kywitz qe txqantl tky'ajal, tu'nju ul itz'j ku'xun lu tuj ttijil, ex o b'ant jun t-ẍjo'w tb'anilxix tu'n.

⁴Tejtzun tel kynik' qe ttzik José ti'j, mas k'ujla'ntoq José tu'n kyman, el kyik'un ex minti' e yolin te tuj cheb'a.

⁵At jun maj ok jun twitzik' José ex xi tma'n kye ttzik. Atzun kye, mas el ik'un José kyu'n.

⁶Xi tma'n kye kyja': —Kyb'intze aju nwitzik'e o tz'ok:

⁷Lu qo in qo k'alo'ntoq junjun che'l triw tuj kojb'il. Aju weye che'l ntriw jaw we' tu'nx tib' ex ax kyaj we'. Atzun kyeye che'l kytriw b'aj kytxolb'an kyib' ti'jele weye, ex e kub' mok'e' twitz weye, chi José.

⁸Xitzun kytzaq'we'n qe ttzik kyja': —¿Maj k'okela te qreye ex kkawila qib'aje? Che chi. Mas el ik'un José kyu'n tu'n kylaj twitzik' ex qe tyol.

⁹Te tib'ajxi ok juntl twitzik' José, ax ikx xi ttx'olb'a'n kye ttzik ex xi tma'n kye kyja': —Kyb'intze juntl nwitzik'e o tz'ok: Lu q'ij tuk'ix xjaw ex junlaj che'w in che kub' mok'e'toq nwitze, chi José.

¹⁰Ax ikx xi ttx'olb'a'n José te tman ik tza'nx otoq b'aj ttx'olb'a'n kye terman. B'ajtzun kawin tu'n tman ex xi tma'n tman te kyja': —¿Ti t-xilen twitzik'a lu? ¿Chin b'elpetzun mok'e'ye twitza ex tu'n tpon takl tib'aj nwitze twitz tx'otx' junx tuk'il ttxu'ya ex kyuk'ix qe termaniya? Chi tman.

¹¹Qe ttzik José tzaj tlo'ch kyk'u'j ti'j, atzunte tman ok ten ximal ti'j jlu.

¹²At jun q'ij e je'x ttzik José pastoril qe t-ẍne'l kyman max tuj Siquem.

¹³Xitzun tma'n Israel te José kyja': —In che kwentin qe ttzika qe ẍne'l max tuj Siquem. Tzaja, ex kxe'l nsama'ne kyuk'il, chi Israel. —Lu qine lu, chi José.

¹⁴Xi tma'n Israel te kyja': —Txi'ya ke'yilte tza'n ate' qe ttzika ex qe ẍne'l, ex q'intza tqanil wuk'ile, chi Israel. Tej t-xi t-sama'n, atzun najltoq tuj chq'ajlaj Hebrón. Pontzun José tuj Siquem.

¹⁵Akux in b'etje'toq tuj kojb'il, ok noj jun xjal ti'j ex xi tqanin xjal te kyja': —¿Ti in tjyo'na tzalu? Chi xjal.

¹⁶Xi ttzaq'we'n José kyja': —In chin jyone kyi'j qe ntzike. B'inchama xtalb'il q'mantza jatum in che pastorin ẍne'l, chi José.

¹⁷Xi tma'n xjal te kyja': —O che ik' tzalu. O nb'iye kyyol kyja': Qo'qe tuj Dotán, che chi, chi xjal. Xi'tzun José ke'yilte kye ttzik, ex e knet tu'n max tuj Dotán.

¹⁸Ilwaj José kyu'n najchaq, kyja' ttzaj. Tej na'nxtoq tkanun José kyuk'il, b'ant ti'j kyu'n tu'n tkub' kyb'yo'n.

¹⁹Kymatzun kyxolx kyja': —Kyke'yinxe, lu witzky'al tzul.

²⁰Kytzaje, e tkub' qb'yo'n, e tku'x qxo'n tuj jul, ex jaku txi qma'n te qman kyja': Jun txkup mya b'a'n ma kub' b'yonte te, qo chi kxel qma'n. Qila'tzun qa che japunel qe twitzik', che chi.

²¹Tejtzun tb'inte Rubén jlu, ok ten kolol ti'j José ex tma kye titz'in kyja': —Mi'n kub' qb'yo'n.

²²Mi'n tz'el kyi'ne tchk'el. Kyq'on ku'xe tuj jul lu, aju at tuj tzqij tx'otx', ex mi'n tz'ok kyq'o'n kyq'ab'e ti'j tu'n tkub' kyb'yo'ne, chi Rubén. Tma Rubén ikju tu'nju tajb'iltoq tu'n tklet José ex tu'n taj t-sama'n tuk'il tman.

²³Tejtzun tpon kanun José kyuk'il ttzik, tzyet kyu'n ex el kyi'n t-ẍjo'w tb'anil, aju toktoq ti'j.

²⁴Xitzun kyi'n ex ku'x kyq'o'n tuj jul. Aju jul lu minti'toq tuj ex tzqijtoq tuj.

²⁵E kub'tzun qe' wa'l, ex xi kyke'yin kyja'toq kytzaj txqan xjal aj Ismael, tzajni qe max tuj Galaad, q'i'ntoq perjum, bálsamo ex ttxk'omil tze' mirra, kyu'n kychej camey; kyja'toq kyxi' tu'n kypon tuj Egipto.

²⁶Tmatzun Judá kye terman: —¿Ti ok qkamb'a' qa ma kub' qb'yo'n qitz'in ex tu'n tkub' qewan qa qu'n kub' qb'yo'n?

²⁷Mas b'a'n tu'n t-xi qk'ayin kye aj Ismael, twitz tu'n tkub' qb'yo'n, tu'nju ax qitz'in ex ax qchib'jal, chi Judá. B'a'n e'la jlu tuj kywitz qe terman,

²⁸ex tej kyul kanun qe comersyant aj Madián, aqeju aj Ismael juntl kyb'i, jatz q'i'n José tuj jul kyu'n terman, xi kyk'ayin kye, ex o kyk'am winqin saq pwaq twi'. Xitzun q'i'n José tuj Egipto.

²⁹Tej tul meltz'aj Rubén, ku'x tke'yin tuj jul, ex mi a'ltoq te José tuj. Eltzun t-sb'it'un t-xb'alun tu'n tb'is.

³⁰Aj meltz'aj jatum ate'toq qe titz'in ex xi tma'n kye kyja': Mi a'l ku'xun tuj jul. Atzun weye ¿jatum chin xe'le ja'lo? Chi Rubén.

³¹Tzajtzun kyi'n aju t-ẍjo'w José, kub' kyb'yo'n jun tal chip, ex ku'x kymu'n ẍjo'w tuj tchk'el.

³²Xi kyi'n ẍjo'w tuk'il kyman ex xi kyma'n te kyja': —O qo ok noje ti'j jlu. Ke'yin oka qa a t-ẍjo'w tky'ajala ex qa mya a, che chi.

³³Eltzun tnik' Jacob ti'j ex tma kyja': —Ax tok te nky'ajale José ẍjo'w lu. Atlo jun txkup o b'aj chyo'nte te ex o b'aj tpaẍu'n, chi Jacob.

³⁴Eltzun t-sb'it'un Jacob t-xb'alun, ok tq'o'n t-xb'alun ch'i'x twitz te jun techal ti'j tb'is, ex o b'isun nim q'ij ti'j tky'ajal.

³⁵Kykyaqil qe tky'ajal ex qe tme'jel e ok ten q'uqb'alte tk'u'j, atzun te minti' o kub' tuj twitz tu'n tq'uqb'anjtz tk'u'j; noq o'kx ok ten oq'el ti'j tky'ajal ex in tma'ntoq kyja': Kukx chin b'isule ti'j nky'ajale, ex max kxel nkoline okxi npone tuk'il kyxol kyimni, chi Jacob.

³⁶Xitzun q'i'n José tuj Egipto kyu'n aj Madián, ex xi kyk'ayin ma chixin te Potifar. Ate xjal lu ajb'eltoq te Faraón ex nejeneltoq kye soldad kwentil te.