Read kumam Génesis 38 Bible Online

Génesis 38 - kumam bible

Génesis 38

¹Tuj tq'ijlalil lu el tpa'n tib' Judá kyi'j qe terman, ex xi' najal tuj tja jun aj Adulam, Hira tb'i.

²Oktzun tke'yin Judá tme'jel jun aj Canaán, Súa tb'i, tzaj ti'n te t-xu'jil, ex kub' tan tuk'il.

³Oktzun ten tal, q'a tal ul itz'j ex Er tb'i ok tq'o'n.

⁴Ok tentl tal, ax q'a tal ul itz'j, ex Onán tb'i ok tq'o'n.

⁵Ok ten juntl tal, ax q'a tal ul itz'j, ex Sela tb'i ok tq'o'n. Atzun ul itz'j tej attoq tuj Quezib.

⁶Tzaj ti'n Judá t-xu'jil Er aju tnejel tky'ajal. Ate xu'j lu, Tamar tb'i.

⁷Ate Er, aju tnejel tky'ajal Judá, mya b'a'ntoq tb'inchb'en tuj twitz Qman ex o kyim naj tu'n.

⁸Xitzun tma'n Judá te Onán kyja': Moje'kuya tuk'il t-xu'jil qtzan ttzika, tu'ntzun tjapun tu'na aju ley q'mamaj tu'n Dios, porke t-xna'na, ex tu'n tjaw jlet tiyjil tu'na, chi Judá.

⁹Ok tkub' tan Onán tuk'il t-xu'jil qtzan ttzik, kub' tqo'n tiyaj twitz tx'otx' tu'ntzun mi'n ttzaj tiyjil qtzan ttzik tu'n, tu'nju b'a'ntoq tu'n mya te qe k'wa'l attoq kyulel itz'j.

¹⁰Mya b'a'n e'la tuj twitz Qman aju in tb'incha'ntoq Onán. Ax ikx te o kyim naj tu'n Qman.

¹¹Xitzun tma'n Judá te Tamar aju tlib' kyja': Tena te meb'a xu'j tja tmana okxi tch'iy Sela aju nky'ajale, chi Judá te Tamar, tu'nju kub' t-ximan Judá kyja': Mya yajku ikx te jaku kyim te ik tza'nx qe ttzik. Xi'tzun Tamar tja tman.

¹²El nim q'ij ex kyim t-xu'jil Judá, aju tme'jel Súa. Tejtzun tel tb'is Judá, jax jatum ate'toq qe q'il kytzmal t-ẍne'l, max tuj tnam Timnat. Xi' Hira aju aj Adulam tuk'il, aju tamiw.

¹³Pon tqanil tuk'il Tamar kyja': Lu tlib'a ma jax max Timnat tu'n tel kytzmal t-ẍne'l.

¹⁴Eltzun ti'n Tamar t-xb'alun te meb'yil, ok tmaqsi'n twitz tu'n jun xb'alun xaxj tu'n mi'n tel nik'b'aj ti'j, ex kub' qe' ttxa'n tnam Enaim, aju tkub' tuj tb'eyil Timnat. O tb'incha ikju tu'nju o til otoq ch'iy Sela ex na'nxtoq t-xi q'o'n tu'n tok te tchmil.

¹⁵Tejtzun tke'yinte Judá xu'j lu, kub' t-ximan qa jawni twitz kyuk'il xinaq, tu'nju otoq tz'ok tmaqsi'n twitz.

¹⁶Xitzun laq'e' ttxlaj xu'j ex minti' el tnik' ti'j atoq tlib'. Xi tma'n Judá te kyja': —¿Mlaype kub' tuj twitza tu'n nkub' tane tuk'ila? Chi Judá. —¿Titzun ktzajel tq'o'na weye ti'j tkub'len tana wuk'ile? Chi xu'j.

¹⁷—Ktzajel nsama'ne jun tal tchipa kyxol qe walune, chi Judá. —B'a'n, ex q'ontza jun ti'xti teya te jun tzuyb'il, ex k'ajel nq'o'ne okxi tul t-sama'na tal nchipe, chi xu'j.

¹⁸—¿Titzun taja tu'n t-xi nq'o'ne teya? Chi Judá xi tqanin. Xi ttzaq'we'n xu'j: —Q'ontza t-seya tuk'ix taq'al, tuk'ix tky'aqo'cha tzyu'n tu'na, chi xu'j. Xitzun tq'o'n Judá te xu'j, kub' tan tuk'il, ex ok ten tal.

¹⁹Tb'ajlenxi jlu ajtzun Tamar, el ti'n aju xb'alun toktoq twitz, ex ok tq'o'n juntl maj t-xb'alun te meb'yil.

²⁰Xitzun t-sama'n Judá tal chip. Ate aj Adulam aju tamiw xi q'inte te tu'n tpon tuk'il xu'j, tu'ntzun kyajtz tq'o'n qe tzuyb'il; ex minti' knet xu'j tu'n.

²¹Xi tqanin kye xjal tuj lugar lu: —¿Jatum ta' aju xu'j aj Enaim jawni twitz kyuk'il xinaq, aju in tentoq ttzi b'e? Chi tamiw Judá. —Tzalu minti' jun xu'j jawni twitz kyuk'il xinaq, che chi xjal.

²²Ajtzun meltz'aj tu'n tpon tuk'il Judá ex xi tma'n te kyja': —Minti' ma knet xu'j wu'ne, ax ikx ma tzaj kyma'n qe xjal tuj lugar ma chixin: Tzalu minti' jun xu'j jawni twitz kyuk'il xinaq, che chi, chi tamiw Judá.

²³Xitzun tma'n Judá te: —E kykyaj ten qe tzuyb'il tuk'il, tu'ntzun mi'n kyxmayin xjal qi'j; matzun tila ma txi nsama'ne tal chip te, ex minti' ma knet xu'j tu'na, chi Judá.

²⁴Tb'ajlenxi ox xjaw, e ul xjal q'malte te Judá kyja': —Aju tlib'a Tamar o yaẍin kyuk'il xinaq, ex o tz'ok ten tal, che chi. Tmatzun Judá kyja': —Kyi'metze ex kypatun kub'e.

²⁵Tejtzun tetz q'i'n Tamar kyu'n xjal, xi t-sama'n tqanil te tlib': —O tz'ok ten wale tu'n kyajaw qe jlu. Ke'yin oka al e qe jlu, aju sey tuk'ix taq'al, tuk'ix ky'aqo'ch, chi Tamar.

²⁶Tejtzun tel tnik' Judá kyi'j, tma kyja': —Ax tok mas tz'aql xu'j lu nwitze, tu'nju minti' jaw nmojb'a'ne tuk'il Sela aju nky'ajale, chi Judá. Minti'tl kub' tan tuk'il.

²⁷Tej tpon tq'ijlalil tu'n tul itz'j tal Tamar, yo'ẍ qe tal e ul itz'j.

²⁸Tej kyja'toq kyul itz'j, etz tq'o'n tq'ab' jun tal ne'. Oktzun tk'alo'n b'etx'lon jun piẍ noq' kyaq ke'yin ti'j tq'ab' ex tma: Ate jlu ma tz'itz'j nej.

²⁹Aj ti'n tal ne' tq'ab', ex a juntl ul itz'j nej. Tmatzun b'etx'lon kyja': Tza'n tten xjaqet b'e tu'na, chi b'etx'lon. Tu'ntzun jlu, Fares tb'i ok q'o'n.

³⁰Ultzun itz'j juntl, aju otoq tz'ok k'alo'n tq'ab' tu'n noq' kyaq ke'yin, ex Zara tb'i ok q'o'n.