Read kumam Génesis 39 Bible Online

Génesis 39 - kumam bible

Génesis 39

¹Tponlen q'i'n José max tuj Egipto kyu'n aj Ismael, xi kyk'ayin te Potifar aju aj Egipto. Ate xjal lu ajb'eltoq te Faraón ex nejeneltoq kye soldad kwentil te.

²Atzunte Qman attoq tuk'il José, ex b'a'n e'la tq'ij tuj tja tpatrón aju aj Egipto.

³El tnik' tpatrón ti'j attoq Qman tuk'il, ex tkyaqilju in tb'incha'ntoq, b'a'ntoq nne'la.

⁴Kyja'tzun tten o tzalaj Potifar ti'j José, ok tq'o'n te ajb'el te ex te tmayordom tuj tja, ex xi tq'o'n toklen ti'j tkyaqilju attoq tuk'il.

⁵Tej tkyaj tq'o'n Potifar tkyaqil aq'untl ex tkyaqilju attoq te tuj tkwent José, o kub' tky'iwlan Qman noq tu'n tlaj José, ex tk'am t-xtalb'il Qman tuj tja ex ti'j ttx'otx'.

⁶Kyaj tq'o'n tuj tkwent José tkyaqilju attoq te. Tu'ntzun jlu minti'tl o b'isun Potifar ti'j taq'un, noq o'kx ti'j twa. Tb'anilxix ke'yin twitz José, ax ikx t-ximlal.

⁷Tejtzun tel q'ij, aju t-xu'jil Potifar ok tq'o'n twitz ti'j José, ex xi tma'n te kyja': —Tankuya wuk'ile, chi xu'j.

⁸Atzunte José minti' o tajb'e, ex xi tma'n te t-xu'jil tpatrón kyja': —B'intza, minti' in b'aj tk'u'j npatrone wi'je ti'j tkyaqilju at tuj tja ex o tzaj tq'o'n tuj nkwente tkyaqilju at te.

⁹Tuj ja lu mi a'l juntl mas ma' toklen nwitze, ex minti' in kub' t-xk'ayin jun ti'xti weye, noq o'kx aya tu'nju aya t-xu'jil. ¿Tza'ntzun tten tu'n nb'inchanteye matij il lu ex tu'n nb'inchanteye il twitz Dios? Chi José.

¹⁰Kykyaqil q'ij in xi tma'ntoq te José tu'n tkub' tan tuk'il ex tu'n tkub' ten ttxlaj. Atzunte José minti' xi tq'o'n amb'il te.

¹¹At jun q'ij okx José tuj ja tu'n tb'ant taq'un, ex mi a'ltoq jun xjal at tuj ja.

¹²Tzyet José ti'j t-xb'alun tu'n xu'j ex xi tma'n te kyja': —Tankuya wuk'ile, chi xu'j. Atzunte José etz ojqelan, ex ax kyaj ten t-xb'alun tuj tq'ab' xu'j.

¹³Tejtzun tlonte xu'j otoq tz'etz oq José ex ax kyaj ten t-xb'alun tuj tq'ab',

¹⁴e tzaj ttxko'n qe majen ate'toq tuj tja ex xi tma'n kye kyja': —Kyb'intze, tzaj ti'n nchmile jun aj Hebreo tu'n t-xmayin qi'j. Soktz wi'je tu'n tkub' tan wuk'ile; atzun weye ẍin jaw sch'ine kyuw wen.

¹⁵Tejtzun ẍin jaw sch'ine, sex oq, ex ax xkyaj tz'aq t-xb'alun wuk'ile, chi xu'j.

¹⁶Kub' tq'o'n t-xb'alun José ttxlaj tejxi tpon tchmil.

¹⁷Tej tpon tchmil ax yol xi tma'n te, ex chi kyja': Aju majen aj Hebreo tzaj ti'na, soktz wi'je tu'n tkub' tan wuk'ile.

¹⁸Tejtzun ẍin jaw sch'ine sex oq, ex ax xkyaj tz'aq t-xb'alun wuk'ile.

¹⁹Kyja'tzun ma tb'incha tmajena wi'je, chi xu'j te tchmil. Tejtzun tb'inte tpatrón José tkyaqilju otoq tzaj tma'n t-xu'jil, tzaj nimxix tq'oj.

²⁰Tzajtzun tzyu'n José tu'n tpatrón ex okx tq'o'n tuj tjayil tze' jatum ate'toq qe pres otoq che okx tq'o'n rey. Axtzun kyaj ten tuj pres.

²¹Atzunte Qman attoq tuk'il José, tzaj q'aq'an tk'u'j ti'j, ex o tz'onin ti'j tu'n tel b'a'n tuj twitz nejenel kyib'aj qe pres.

²²Kykyaqil qe pres ate'toq tuj tjayil tze' lu, e kyaj tq'o'n nejenel tuj tkwent José, ex ate José o q'mante tkyaqil aq'untl in b'anttoq kyxol.

²³Minti'tltoq tb'is nejenel ti'j tu'n tb'aj tke'yin aju attoq tuj tkwent José, tu'nju attoq Qman tuk'il José ex o tz'onin ti'j, kyja'tzun, tkyaqil aju in b'ant tu'n b'a'n nne'la.