Read kumam Génesis 4 Bible Online

Génesis 4 - kumam bible

Génesis 4

¹Moje'tzun Adán tuk'il Eva aju t-xu'jil. Oktzun ten tal Eva, ex ul itz'j jun tal, Caín tb'i ok. Tmatzun Eva kyja': Ma tzul itz'j jun wale xinaq. A Qman ma tzaj q'onte te, chi Eva.

²Ul itz'j juntl tal, Abel tb'i ok, titz'in Caín. Ate Abel ok pastoril ẍne'l; atzunte Caín aq'nal ti'j tx'otx'.

³Eltzun tyemp. At jun q'ij tzaj ti'n Caín twitz tawal tu'n t-xi tq'o'n te jun oyaj te Qman.

⁴Ax ikx te Abel e tzaj ti'n qe kynejel kyal t-ẍne'l aqeju tb'anilxix. Tzajtzun tke'yin Qman ex o tzalaj ti'j Abel tuk'ix ti'j toyaj.

⁵Atzun ti'j Caín ex ti'j toyaj, minti' o tzalaj Dios. Tzajtzun nim tq'oj Caín ex miyalnix ok twitz.

⁶Tzajtzun tma'n Qman te Caín: ¿Tiqu'n ma tzaj tq'oja ex miyalnix ma tz'ok twitza?

⁷Qa ma tb'inchaya b'a'n, ¿mlaypelo k'meta? Qatzun mi'n ma tb'inchaya b'a'n, aju il lepch ti'ja, ex in ayon tu'n tkub' ti'ja tu'n. Ex jaku kub' ti'j tu'na, chi Qman.

⁸At jun q'ij xi tma'n Caín te Abel aju titz'in: —Qo' b'etel tuj kojb'il, chi Caín. Tejtzun kypon tuj kojb'il, ok tzoqpaj Caín ti'j Abel aju titz'in, ex kub' tb'yo'n.

⁹Tzajtzun tqanin Qman te Caín: —¿Jatum ta' Abel aju titz'ina? Xitzun ttzaq'we'n Caín: —Minti' b'i'n wu'ne. ¿Baqa kwentil wermaniye qine?

¹⁰Tzajtzun tma'n Qman te: —¿Ti ma tb'inchaya? Aju tchk'el titz'ina ma kub' twitz tx'otx', mer ik tza'n in sch'in wi'je in tqanin tu'n tb'inchet ti'j.

¹¹Tu'ntzun jlu kb'el tcastiwoya ex k'elex lajo'na tuj tx'otx' lu, aju ma txi k'ante tchk'el titz'ina ma kub' tb'yo'na.

¹²Maske aq'nana twitz tx'otx', ex mlay tzaj tq'o'ntl nim twitz tawala. B'etin xjal k'okela twitz tx'otx' ex minti' tu'n tojlana, chi Qman.

¹³Xitzun ttzaq'we'n Caín te Qman: —Aju ncastiwoye lu ma'xix, mlay tzik'x wu'ne.

¹⁴Ja'lo chin elex tq'o'na ti'jxi tx'otx' lu, mlay chin tentle tuk'ila, b'etin xjal chin okele ex minti' tu'n wojlane. Kyja'tzun, noq alkyex ma tz'ok noj wi'je, chin b'el tb'yo'n, chi Caín.

¹⁵Tzajtzun ttzaq'we'n Qman: —Mi'n. Alkye ma kub' b'yonte teya, kb'el tcastiw wuq maj, chi Qman. Oktzun tq'o'n Qman jun techal ti'j Caín tu'ntzun mi'n tkub' b'yo'n tu'n jun xjal ok tok noj ti'j.

¹⁶Extzun Caín twitz Qman ex ax najan tuj tx'otx' Nod, tuj tjawitz q'ij ttxlaj Edén.

¹⁷Moje'tzun Caín tuk'il t-xu'jil. Oktzun ten tal t-xu'jil ex ul itz'j jun tal, Enoc tb'i ok. Kub'tzun tb'incha'n Caín jun tnam, ex Enoc tb'i ok tq'o'n, ik tza'nx tb'i tk'wa'l.

¹⁸Ate Enoc tman Irad; Irad tman Mehujael; Mehujael tman Metusael; Metusael tman Lamec.

¹⁹Kab'e t-xu'jil Lamec ten. Ada tb'i jun ex Zila tb'i juntl.

²⁰Ultzun itz'j jun tal Ada, Jabal tb'i ok, ex atzun kyxe'chel qeju najl tjaq' ja xb'alun, qe ch'isal kye alumaj.

²¹At jun titz'in Jabal, Jubal tb'i, ex atzun kyxe'chel kykyaqil qe chimb'al ti'j arpa ex xux.

²²Ax ikx te Zila ul itz'j jun tal, Tubal-caín tb'i ok. Ok te tx'inol k'uxb'il ex b'inchal makb'il ti'j k'uxb'il ex q'an k'uxb'il. Attoq jun tanb' Tubal-caín, Naama tb'i.

²³At jun q'ij xi tma'n Lamec kye t-xu'jil kyja': Aqeye nxu'jile, Ada ex Zila, kyb'intze aju kxel nma'ne: Kub' nb'yo'ne jun xinaq tu'nju ok tk'ixb'isa'n qine; kub' nb'yo'ne jun ku'xun tu'nju ok tb'aju'n qine.

²⁴Qa at jun ma kub' b'yonte Caín, wuq maj k'okel t-xel ti'j, atzun weye, qa ma chin ok k'ixb'isa'ne tu'n juntl, 77 maj k'okel t-xel ti'j, chi Lamec.

²⁵Kub'tzun tantl Adán tuk'il t-xu'jil. Ul itz'j juntl tal t-xu'jil, Set tb'i ok tq'o'n. Tmatzun Eva: Ma tzaj tq'o'n Dios juntl wale te t-xel Abel aju kub' tb'yo'n Caín, chi Eva.

²⁶Ax ikx te Set ul itz'j jun tky'ajal, Enós tb'i ok tq'o'n. Axtzun tq'ijlalil lu tzyet kyna'n xjal Dios, ajb'en tb'i Qman kyu'n.