Read kumam Génesis 40 Bible Online

Génesis 40 - kumam bible

Génesis 40

¹Te tib'ajxi jlu, aju q'ol tk'a rey ex aju b'inchal pan e kub' tz'aq tuj jun kyil twitz kypatrón, aju rey te Egipto.

²Tzaj tq'oj Faraón kyi'j kab'e tmajen lu, ti'j nejenel kye q'ol tk'a ex ti'j nejenel kye b'inchal pan,

³ex e okx tpresin max tja nejenel kye soldad kwentil te, tuj pres jatum tokxtoq José.

⁴Atzunte nejenel kye soldad kwentil te Faraón e je'x tq'o'n qe kab'e xjal lu tuj tkwent José, ex nim q'ij e ten tuj pres.

⁵At jun aq'b'il kykab'il pres lu, aju q'ol tk'a rey ex aju b'inchal pan, ok jun kywitzik' ex attoq t-xilen teyle te junjun witzik'.

⁶Tejtzun tpon José ke'yilte kye te prim, o til in che b'isuntoq.

⁷Xitzun tqanin José kye qeju ajb'el te Faraón, aqeju ate'toq tuk'il tuj pres max tuj tja tpatrón: —¿Tiqu'n b'is ta' kywitze ja'lo? Chi José.

⁸Xitzun kytzaq'we'n te kyja': —At jun qwitzik'e sok may', ex mi a'l jun chik'b'alte qeye ti t-xilen, che chi. Xitzun tma'n José kye kyja': —¿Myapetzun a Dios in tzaj chik'b'ante kyxilen witzik'? Kytx'olb'antze weye tza'n tten kywitzik'e sok, chi José.

⁹Atzunte nejenel kye q'ol tk'a rey xi ttx'olb'a'n twitzik' te José, ex xi tma'n te kyja': —Tuj nwitzik'e xwile jun wi' tqan uva tkub'toq nwitze,

¹⁰ex attoq ox tq'ab'. Jurat ẍe tzaj t-xul, ẍe japun t-xmakal, ex sul kyq'ij twitz.

¹¹Q'i'ntoq wu'ne tuj nq'ab'e aju tk'ab'l Faraón. Ẍe tzajtzun wi'ne qe uva, xku'x nyatz'o'ne kya'l tuj tk'ab'l Faraón ex xi nq'o'ne tuj tq'ab', chi nejenel kye q'ol tk'a rey.

¹²Xitzun tma'n José te kyja': —Aju t-xilen twitzik'a, atzun jlu: Qe ox tq'ab' uva, atzun in kyma'n kyi'j ox q'ij.

¹³Ok kyb'aj ox q'ij, k'elex q'i'na tu'n Faraón tuj pres, k'okel q'o'na juntl maj ti'j taq'una ex kxel tq'o'na tk'a ik tza'n nej.

¹⁴Oktzun texa tzalu, b'ix chin tzaj tna'na, b'ix tzaj q'aq'an tk'u'ja wi'je, b'ix yolina wi'je twitz Faraón ex b'ix chin ex ti'na tzalu,

¹⁵tu'nju noq o chin tzaj elq'a'ne tuj kytx'otx' aj Hebreo, ax ikx noqx gan in oktz q'o'ne tuj pres, porke minti' jun il o b'ant wu'ne tzalu, chi José.

¹⁶Tej tb'inte nejenel kye b'inchal pan tb'aniltoq tb'inx t-xilen witzik' otoq txi tchik'b'a'n José, xi tma'n te José kyja': —Ax ikx weye sok nwitzky'a'ne, xwile tjaxtoq ox chi'l tuj nwi'ye ex tku'xtoq saq pan kyuj.

¹⁷Aju chi'l tjaxtoq tib'ajxi, nojnitoq tu'n tkyaqil wiq pan in xi twa'n Faraón; atzun qe chyu'j in che wa'ntoq ti'j pan tku'x tuj chi'l tjaxtoq tuj nwi'ye, chi nejenel kye b'inchal pan.

¹⁸Xitzun ttzaq'we'n José te kyja': —Aju t-xilen teya twitzik', atzun jlu: Qe ox chi'l, atzun in kyma'n kyi'j ox q'ij.

¹⁹Ok kyb'aj ox q'ij, k'elel q'i'n twi'ya tu'n Faraón, kjawil yob'ina ti'j jun tze' ex kxel chyo'n tchib'jala kyu'n chyu'j.

²⁰Tujtzun toxin q'ij japun tab'q'iyil Faraón, ex kub' tik'sa'n jun ninq'ij junx kyuk'il qe aj sanjelal ate'toq ttxlaj. Kywitz kykyaqil xjal otoq che tzaj txko'n tuj ik'sab'l q'ij, xi tma'n tu'n tetz q'i'n tuj pres aju nejenel kye q'ol tk'a, tuk'ix nejenel kye b'inchal pan.

²¹Xi tq'o'n Faraón juntl maj taq'un nejenel kye q'ol tk'a, ex ok ten q'ol tk'a Faraón ik tza'nx nej;

²²atzunte nejenel kye b'inchal pan, jaw tyob'an ik tza'nx otoq txi tchik'b'a'n José.

²³Minti' tzaj na'n José tu'n nejenel kye q'ol k'ab'j, noq o'kx ik' tna'njtz tu'n.