Read kumam Génesis 41 Bible Online

Génesis 41 - kumam bible

Génesis 41

¹Tb'ajlenxi kab' ab'q'i, ok twitzky'a'n Faraón: Lu wa'l tkub'toq ttzi nima Nilo,

²ex o til wuq vac tb'anilxix che ke'yin ex ulni kynab'l in che jatztoq tuj a' ex in che wa'ntoq k'ul kyxol tqan ajlaj.

³Lepchix kyjatz wuqtl vac, miyalnix che ke'yin ex okni kyi'j, in che jatztoq tuj a' ex e kub' ten ttzi a' niqayin kytxlaj qe txqantl.

⁴Atzun qe vac miyalnix che ke'yin ex okni kyi'j e ok ten chyo'lte kye qe wuq vac tb'anilxix che ke'yin ex ulni kynab'l. Eltzun twatl Faraón.

⁵Ik'tzun tantl ex ok juntl twitzik': Lu wuq twi triw nojnitoq kyi'j tu'n kywitz, tb'anilxix che ke'yin, ex in che ch'iytoq ti'j junx tqan.

⁶Lepchix kytzaj ch'iy wuqtl twi triw ch'in kyk'itz ex tz'e'naq qe tu'n kyq'iq' iqan kyaq tu'n.

⁷Atzun qe wuq twi triw tzqij e ok ten chyo'lte kye qe wuq twi triw nojnitoq kyi'j tu'n kywitz ex tb'anilxix che ke'yin. Eltzun twatl Faraón ex el tnik' ti'j, witzik'toq jlu.

⁸Tej tjawil q'ij otoq tzaj nim t-ximb'etz, e tzaj ttxko'n kykyaqil qe chman ex qe aj nab'l ate'toq tuj Egipto. Xitzun ttx'olb'a'n Faraón qe twitzik' kye, ex mi jun o tzaj chik'b'ante alkye kyxilen qe witzik'.

⁹Aju nejenel kyxol qe q'ol tk'a Faraón xi tma'n te kyja': Ja'lo ma tzul tuj nximb'etze aju mya b'a'n o nb'incha'ye.

¹⁰Tej ttzaj ttx'u'jila ti'j nejenel kye b'inchal pan, ax ikx wi'je, o jo'x t-sama'na pres tuj tja nejenel kye soldad kwentil teya.

¹¹At jun aq'b'il ok jun twitzik' nejenel kye b'inchal pan, ax ikx weye ok jun nwitzik'e, ex teyle te junjun witzik' attoq t-xilen.

¹²Attoq jun ku'xun aj Hebreo qxole, majentoq te nejenel kye soldad kwentil teya, xi qtx'olb'a'ne qwitzik'e te, el tnik' kyi'j, ex tzaj tchik'b'a'n alkye t-xilen twitzik' teyle te junjun qeye.

¹³Japun yol ik tza'nx otoq tma. Weye, o nk'ame waq'une juntl maj; atzun te juntl, jaw yob'in ti'j tze', chi nejenel kyxol qe q'ol tk'a rey.

¹⁴Tmatzun Faraón tu'n t-xi txokb'aj José. Jurat naj etz q'i'n José tuj pres, el ti'n t-xmatz, el tch'expu'n t-xb'alun, ex ul twitz Faraón.

¹⁵Xi tma'n Faraón te José kyja': —At jun nwitzik'e ok, ex mi a'l jun o tzaj chik'b'ante alkye t-xilen, ex ma nb'iye ti'ja in tzaj tchik'b'a'na kyxilen witzik', chi Faraón.

¹⁶Xitzun ttzaq'we'n José te Faraón kyja': —Mya wu'nxwe in b'ant jlu. Tu'n Dios ktzajel tma'n jun yol b'a'n teya, Tat rey, chi José.

¹⁷Xitzun tma'n Faraón te José kyja': —Tuj nwitzik'e wa'ltoq qine ttzi nima Nilo,

¹⁸ex o wile wuq vac tb'anilxix che ke'yin ex ulni kynab'l, in che jatztoq tuj a' ex in che wa'ntoq k'ul kyxol tqan ajlaj.

¹⁹Lepchix kyjatz wuqtl vac miyalnix che ke'yin ex okni kyi'j. Tuj tkyaqil tx'otx' Egipto na'nx kywile vac miyalnix che ke'yin ik tza'n qe vac lu.

²⁰Atzun qe vac miyalnix che ke'yin ex okni kyi'j e ok ten chyo'lte kye qe wuq vac ulni kynab'l.

²¹E ku'x b'aj qe vac ulni kynab'l tuj kyk'u'j qeju okni kyi'j, ex minti'x yek'un qa otoq che ku'x b'aj tuj kyk'u'j, tu'nju ttenx che ke'yin ik tza'nx nej. Eltzun nwatle.

²²Ax ikx o wiltle tuj witzik' wuq twi triw nojnitoq kyi'j tu'n kywitz, tb'anilxix che ke'yin ex in che ch'iytoq ti'j junx tqan.

²³Lepchix kytzaj ch'iy wuqtl twi triw ch'in kyk'itz, mutx'jni qe ex tz'e'naq qe tu'n kyq'iq' iqan kyaq tu'n.

²⁴Atzun qe wuq twi triw ch'in kyk'itz, e ok ten wa'lte kye qe wuq twi triw tb'anilxix che ke'yin. Ma txi ntx'olb'a'ne jlu kye chman, ex mi a'l jun kye ma tzaj chik'b'ante alkye t-xilen, chi rey.

²⁵Xitzun ttzaq'we'n José te Faraón kyja': —Qe kab'e twitzik'a lu junx kyxilen. O tzaj tyek'un Dios teya aju kb'antel tu'n.

²⁶Qe wuq vac tb'anilxix che ke'yin, atzun in kyma'n kyi'j wuq ab'q'i; ax ikx qe wuq twi triw tb'anilxix che ke'yin, ax in kyma'n kyi'j wuq ab'q'i. Qe kab'e witzik' lu, junx kyxilen.

²⁷Qe wuq vac miyalnix che ke'yin ex okni kyi'j, aqeju lepchix kyjatz, ax in kyma'n kyi'j wuq ab'q'i, ax ikx qe wuq twi triw ch'in kyk'itz ex mutx'jni tu'n kyq'iq' iqan kyaq tu'n, wuq ab'q'i we'yaj jlu.

²⁸Atzun jlu aju ma txi nma'ne teya: O tzaj tyek'un Dios teya aju kb'antel tu'n.

²⁹Tuj tkyaqil tx'otx' Egipto, wuq ab'q'i kyjel nim twitz awal,

³⁰ex kyb'ajlenxi qe jlu, che ul wuq ab'q'i we'yaj. Mi a'l jun xjal ktzajel na'nte tej tkyaj nim twitz awal tuj tx'otx' Egipto, tu'nju k'okel ta'w we'yaj lu kyi'j.

³¹Nimxix we'yaj tzul, ex misikyer ch'in techal kyjel ti'j nim twitz awal otoq tzaj nej.

³²Tu'nju kab' maj tzaj yek'un witzik' teya, atzun t-xilen jlu: Ax tok o kub' t-ximan Dios tu'n tb'ant jlu, ex kb'antel naj tu'n.

³³Tu'ntzun jlu, b'a'n tu'n tknet jun xinaq tu'na at t-sek'al ex at tnab'l, ex q'onxa tx'otx' Egipto tuj tkwent.

³⁴Atzun jlu b'inchama Tat rey: Jyoma txqan nejenel, ex samanxa qe tuj tkyaqil tx'otx' Egipto, tu'n tjaw kychmo'n aju tjwe'yin b'yuj twitz awal tuj Egipto, okxi kyjapun b'aj qe wuq ab'q'i nim twitz awal.

³⁵E tok kychmo'n triw kyuj qe wuq ab'q'i ok tkyaj nim twitz awal, e tul kyi'n tajlal tuj tkwenta, ex e t-xi k'u't tuj junjun tnam, tu'ntzun at kywa xjal ok tul kanun we'yaj.

³⁶Kyja'tzun, kk'u'tel triw tu'n tajb'en kye xjal, tu'ntzun mi'n kykyim tu'n we'yaj ok kyul kanun qe wuq ab'q'i we'yaj tuj tx'otx' Egipto, chi José te Faraón.

³⁷B'a'n e'la tb'inx tyol José tuj twitz Faraón ex tuj kywitz qe aj sanjelal ate' ttxlaj.

³⁸Xitzun tma'n Faraón kye aj sanjelal kyja': —¿Jakupetzun knet juntl xinaq qu'n ik tza'n te jlu, at t-xew Dios tuk'il? Chi Faraón.

³⁹Xi tma'n Faraón te José: —Mi a'l juntl xjal at tnab'l ex at t-sek'al ik tza'n teya, tu'nju ma tzaj tyek'un Dios tkyaqil jlu teya.

⁴⁰K'okel nq'o'ne toklena kyib'aj kykyaqil qeju ate' tuj njaye, ex kykyaqil qe nxjalile kxel kyniman tkawb'ila. Atzun tuj kawb'il, o'kx aqine mas ma' woklene twitza.

⁴¹B'intza: Ma tz'ok nq'o'na te gobernador tib'aj tkyaqil tx'otx' Egipto, chi Faraón.

⁴²Eltzun ti'n Faraón t-xmulq'ab' toktoq sey ti'j, ex ok tq'o'n ti'j tq'ab' José. Xi tma'n tu'n tok q'o'n xb'alun tb'anilxix ti'j ex tu'n tkub' q'o'n jun uwj tqul, q'an pwaq ttx'otx'il.

⁴³Xi tma'n tu'n tjax q'o'n tib'aj tkab'in tcarwaj, ex in kyma'ntoq qe xjal nejni twitz: Che ẍmejekuye twitz, che chi. Kyja'tzun tten, ok tq'o'n te gobernador tib'aj tkyaqil tx'otx' Egipto.

⁴⁴Xi tma'ntl Faraón te José: —Aqine rey, ex mi jun xjal tuj tkyaqil tx'otx' Egipto jaku b'ant jun ti'xti tu'n, qa minti' ma tk'am amb'il tu'na.

⁴⁵Tuj kyyol aj Egipto Zafnat-panea tb'i José ok tq'o'n Faraón, ex jaw tmojb'a'n tuk'il Asenat tme'jel Potifera, aju pal tuj tnam On. Extzun José b'etel tuj tx'otx' Egipto.

⁴⁶Otoq japun José twi' 30 ab'q'i tej t-xi q'i'n twitz Faraón aju rey te Egipto. Etztzun José twitz Faraón ex tzyet tb'et tuj tkyaqil tx'otx' Egipto.

⁴⁷Nimxix twitz awal tzaj tq'o'n tx'otx' kyuj qe wuq ab'q'i tej tkyaj nim twitz awal.

⁴⁸Ok tchmo'n José tkyaqil twitz triw kyuj qe wuq ab'q'i tej tkyaj nim twitz awal tuj tx'otx' Egipto, xi tk'u'n kyuj qe tnam, ex teyle te junjun tnam ax kyaj k'u't twitz awal tuj, aju jaw chmet kyuj kojb'il ti'jele tnam.

⁴⁹Nimxix triw jaw tchmo'n José, mer ik tza'n ttxa tz'a'n ttzi mar; nimxix wen ex minti' o b'ant tmalonjtz, ex minti' b'ant ti'njtz tajlal.

⁵⁰Na'nxtoq tul kanun tnejel ab'q'i we'yaj, e ul itz'j kab'e tky'ajal José ti'j Asenat aju tme'jel Potifera, aju pal tuj tnam On.

⁵¹Manasés tb'i tnejel tky'ajal ok tq'o'n, ex tma: Ma tz'onin Dios weye tu'n tik' tna'l wu'ne tkyaqil yajb'il weye ex kykyaqil qeju ate' tuj tja nmane, chi José.

⁵²Efraín tb'i tkab'in tky'ajal ok tq'o'n, ex tma: Ma tzaj tq'o'n Dios nk'wa'le tuj tx'otx' jatum o chin yajlanjtze, chi José.

⁵³E japun b'aj qe wuq ab'q'i tej tkyaj nim twitz awal tuj tx'otx' Egipto,

⁵⁴ex e qe' qe wuq ab'q'i we'yaj, ik tza'n otoq tma José. Tzajtzun we'yaj tuj tkyaqil twitz tx'otx'; atzun tuj Egipto attoq kywa xjal.

⁵⁵Tejtzun tok ta'w we'yaj kyi'j xjal tuj tkyaqil tx'otx' Egipto, e je'xtzun qanil kywa te Faraón. Atzunte Faraón xi tma'n kye kykyaqil aj Egipto kyja': Kyxi'ye tuk'il José, ex kyb'inchame ik tza'nx tzul tma'n kyeye, chi Faraón.

⁵⁶Otoq tzaj we'yaj tuj tkyaqil tx'otx' Egipto. E jaqettzun qe tx'utx' tkub'il triw tu'n José, ex xi tk'ayin kye aj Egipto, tu'nju otoq tzaj nim we'yaj tuj tx'otx' Egipto.

⁵⁷Qe xjal tuj tkyaqil twitz tx'otx' e pon laq'ol triw tuj Egipto tuk'il José, tu'nju otoq tzaj nim we'yaj tuj tkyaqil twitz tx'otx'.